بلوچستان ءِ دمگ چہ ھاران ءَ سر بیتگیں ھالانی رِد ءَ تازینہ ءُ اُلمرک ءِ ھندانی سر ءَ عیدالاضحیٰ ءِ مُچیاں بلوچ آجوئی لوٹوکاں عیدگاھاں راج ءَ چہ تران کنان ءَ آ راجی جُھد آجوئی ءَ کرد پیلو کنگ ءُ آؤکیں پدریچانی باندات ءَ مُھر کنگ ءِ سر ءُ سوج کتگ اَنت-
سرمچاراں راج ءَ چہ یکمشت ءُ یکجاھی ءِ دزبندی کنان ءَ گوشتگ کہ ایردستی یک لانتے، ءُ آئی ءِ ھلاپ ءَ مارا یکجاھی جُھد دیم ءَ برگ- آیاں گوشتگ کہ بلوچ راج ءِ رکینگ، ازت ءُ شرپ راجی آجوئی ءِ تہ ءَ اِنت- مُچیاں ساڑی ئیں مردماں سرمچاراں چہ مھر ءِ درشان کنان ءَ آیانی گپ گوں دلگوشی ءَ گوشداشتگ اَنت ءُ اشی ءَ پد گوں مردماں امباز کتگ اَنت-
اشی ءَ ساری عبدالفطر ءِ وھد ءَ ھم جتاجتائیں دمگاں بلوچ آجوئی لوٹوکیں سرمچاراں عید مچی ءَ چہ تران کتگ-