بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ مئی 2025 ءِ رپورٹ شنگ کتگ ، چریشی ءِ تہ ءَ بلوچستان ءَ انسانی ھکانی جاور درشان کنگ بیتگ انت۔
پانک ءِ کچ ءُ کساسیں رپورٹانی رد ءَ بلوچستان ءَ مئی 2025 ءَ پاکستانی لشکر ءَ 128 مردم زورانسری بیگواہ کتگ انت ، 27 درکانودی کشگ بیتگ انت۔چہ درستاں گیش 32 مردم چہ گوادر ءَ زور بیگواہ کنگ بیتگ۔ چہ ایشی ءَ پد چہ کیچ ءَ 27 ، چہ کراچی ءَ 10 ، چہ آواران ءَ 9 ، چہ شال ءَ 8 ، چہ پنجگور ءُ مستونگ ءَ 7 ، چہ چاگی ءَ 5 ، چہ ڈیرہ بگٹی ءَ 4 ، چہ نوشکی ءَ 6 ، موسی خیل، کلات ءُ ھزدار ءَ 3 ، بارکھان ، ھرنائی ءَ 2 ءُ چہ واشک ءَ یک مردمے زوراسنری بیگواہ کنگ بیتگ۔
در کانودی کوشانی رد ءَ ھم مئی ءِ ماہ چہ درستاں بدتر بوتگ۔27 مردم پاکستانی پوج ءُ گوں آئی ءَ ھمگرنچیں ادارہ ، پاکستان ءِ داشتگیں ڈیتھ اسکواڈ ءَ کشتگ۔1 مئی ءَ پنجگور ءِ ھند تسپ ءَ سمیر اھمد دزگیری ءَ پد زورانسر بیگواہ کنگ بیتگ ءُ 9 مئی ءَ آئی ءِ لاش دزکپتگ۔5 مئی ءَ 15 سالی ئیں علی ، پاکستانی ڈیتھ اسکواڈ ءَ ماں تمپ ، کیچ ءَ کشتگ۔ 10 مئی ءَ وحید چہ پنجگور ءَ آوار جنگ بیتگ ءُ دومی روچ ءَ آئی ءِ تیرسپتگیں لاش دزکپتگ۔
سوپی طارق چہ گوادر ءِ ھند جیمڑی ءَ آوار جنگ ءَ پد کشگ بیتگ ، فھد لھڑی ءِ لاش 13 مئی ءَ چہ شال ءَ دزکپتگ۔2014 ءَ زورانسری بیگواہ کنگ بیتگیں محمد رمزان ءِ لاش ھم مئی ءَ دزکپتگ۔ یونس ماں مالار ، آواران ءَ کشگ بیتگ ، بختیار احمد کلات ءَ ھما وھد ءَ نشانگ کنگ ءُ کشگ بیتگ کہ پاکستانی لشکر ءِ کارپدانی بگیری ءَ زھرشانی یے کتگ۔
ساجد ، یاسر ، حنیف عزیز ، عبدالطیف ءُ گوس بکش چہ آیانی لوگاں آوار جنگ ءَ پد کشگ بیتگ اَنت۔ اھوالکار عبدالطیف ماں آئی ءِ گس ءَ واب ءِ تہ ءَ کشگ بیتگ ، چہ ایشی ءَ زانگ بیت کہ ماں بلوچستان ءَ رسانک ھم جیڑھانی دیمپان اِنت۔مئی ءَ سَے مردم عبدالرھمان بزدار ، فرید بزدار ءُ سلطان مری ، پولیس ءِ ناشرکاری ءِ گر ءُ دار ءِ تک ( سی ٹی ڈی ) ءَ آوار جتگ اَنت ءُ رند ءَ ماں بارکھان ءَ دروگیں میڑے ءَ کشتگ اَنت۔
26 ءُ 27 مئی ءَ مچی ، مالار ، آواران ءَ لشکر کشی ءِ میان ءَ نئیم ءُ ھواری ءَ کشگ بیتگ اَنت ءُ دگہ جنینے سکا ٹپی بیتگ۔ 22 مئی ءَ شیرخان کیتران چہ بارکھان ءَ دزگیر اش کتگ ءُ آئی ءِ لاش 28 مئی ءَ دزکپتگ۔درمان دو بر ءَ دزگیر کنگ بیتگ ءُ گڈی رند ءَ آئی ءِ لاش 30 مئی ءَ چہ جاھو ءَ دزکپتگ۔ 29 مئی ءَ آپسر، تربت ءَ مساپر نامیں گاڑی ڈرائیورے کشگ بیتگ ، ھمے روچ ءَ نزر ، عبدالعزیز ءُ 30 مئی ءَ لیویز کارمند سگیر اھمد کشگ بیتگ اَنت۔
پانک ءِ رپورات ءَ گْوشگ بیتگ کہ چہ درستیں ویلاں ھمے زانگ بیت کہ بلوچستان ءَ ریاستی ادارہ ءُ آئی ءِ پلامرزی ءَ سلاہ بندیں ٹولی گوں بے مھاری ءَ شھری، کارکن ، نودربر ، اھوالکار ءُ سرکاری کارمنداں نشانگ کنگ ءَ اَنت۔اے ویل ناں ایوک ءَ راھبندانی سکا سک بگیری اَنت بلکیں مچگانیں ڈند ( اجتماعی سزا ) ، ترس ءِ چاگرد ءُ زورانسری بیگواھی ءِ برجاہ دارگ ءِ دْرچ اَنت۔چہ میان راج ءَ لوٹ کنگ بیت کہ آ اے تْرام اتگ ءُ ترسناکیں انسانی ھکانی بگیریانی سر ءَ زیت دلگوش بہ کنت ءُ بلوچستان ءِ بزگیں مردمانی مزدانک دیگ ءَ وتی کرد ءَ پیلو بہ کنت۔