شہید فقیر ( میر جان ) ءِ نام ءَ
برانز بلوچ
دی بلوچستان پوسٹ
منی اُردُل ، منی اُردُلُک
ندارگاں گُبار بست ءَ
آسمان چو مَرگ ءَ مودگ اِنت
زمین رَنج اِت ءَ
گِنرک ءَ واھگ ءُ گُمان
گیمُرتگاں دَرچک ءُ دار
پُرشتگ کوہئیں دل
گوات زیمر نہ ساز ایت
زندمان کسّہے
پوسٹرانی تہا پَش کَپ ایت
رَنج کُجا میم بَنت ؟
بچکند کُجا پُولگ بَنت ؟
وھد کُجا جَک ایت ؟
ساھتاں کئے مار ایت ؟
اُردُل ۔۔۔ !
ھمے یکیں گُمان
مَردُم ءَ کَجیّنت
کہ
تئی بچکندگ ءُ ھبراں ،
دوبر اِش کُت نہ کنت ۔۔۔
منی اُردُل ، منی اُردُلُک
اے جناورانی جنگل ءِ
برات ، براتی نہ اِنت
سیاد بیپار کنت ۔۔۔
دوست ءُ دوزواہ نہ گواہت
کور رھبر اَنت
ھَڈّکہ ءَ گَپتیں نئیت ءَ
ھبر کُجا کَنے ؟
راہ شُناس نیست
ہر چیز ءَ نیاد اَست اِدا
گِلگ کَیا پِر کَنے
منی اُردُل ، منی اُردُلک
زمین زانت ،
کہ
کجام گام کُجا کپت ءَ
زمین اَرواہ ءِ آسودگی ءِ
زمین مانیت
داں مھر مانیت
تو اَستے
ھَمُک دل ءَ