ھال سر کنوکیں ادارہ بی بی سی اُرد ءَ ھندوستان ءُ پاکستان ءِ دوئیں ڈیھانی درشاندابانی بارو ءَ دروت دیان ءَ گوشتگ ھردوکیں ڈیھ ءِ چاگردی ترامجاہ کار یکے دومی ءِ سر ءَ ابید ءِ راستگیں چیزاں دومی ءِ مالی ءُ جانی تاوانانی درگت ءَ بے سریں گپ جنگ ءَ انت-
سئے شمبے ءِ شپ ءَ پاکستان ءُ آئی ءِ زیر دستیں کشمیر ءِ سر ءَ بھارت ءِ اُرشانی پد ءَ وھدے کہ دوئیں ملکانی واکدار اے درگت سرجمیں درشاناں دیم ءَ آرگ ءَ اَنت ھمے جیڑہ پاکستان ءُ بھارت ءِ سوشل میڈیا ءِ سر ءَ ھم ٹاپ ٹرینڈز ءِ تہ ءَ ھوار اِنت۔
دوئیں ملکانی سوشل میڈیا ءُ روایتی میڈیا ءَ یکے دومی ءِ بیرانی ءُ مالی تاوان ءِ بابت ءَ ناراست ءُ بے بُنیں گپ کنگ بوگ ءَ انت ءُ آرٹیفیشل انٹیلیجنس ءِ کمک ءَ جوڑ بوتگیں بے کساسیں وسریں اکس ءُ ویڈیو ھم شنگ ءُ تالان بوگ ءَ انت۔
بلے یک ھیش ٹیگے کہ ایشی ءِ چیر ءَ دوئیں ملکانی لیکہ چارگ بوگ ءَ انت آ ’’ سندور‘‘ ءَ گوں سیادی دار ایت ءُ اے ایشی ءِ دیمدراھی ھما وھد ءَ بندات بوتگ کہ ھندوستان ءِ لشکر ءَ جار جتگ کہ آیاں پاکستان ءِ ھلاپ ءَ اُرشانی نام ’’آپریشن سندور‘‘ ایر کتگ ءُ اے نام ھندی رسانکدر ءَ سک باز مانا دار زانگ بوگ ءَ انت۔
شنگ بیتگیں رپورٹ ءِ رد ءَ اے درگت ءَ ھندی لشکر ءُ ھندی درئی کارانی وزیر جے شنکر ءِ سرکاری اکاؤنٹاں چہ یک اکسے ھم شنگ کنگ بوتگ کہ آئی ءِ تہ ءَ انگریزی آباں ‘آپریشن سندور’ نبشتہ اِنت۔ ایشی ءِ تہ ءَ انگریزی ءِ آباں چہ یکے ’’او‘‘ ءِ بدل ءَ یک گولیں کاسگے کہ گوں رژنائی ءَ پُر اِنت ءُ دومی ’’او‘‘ ءِ تہ ءَ رژنائی چہ کاسگ ءَ درکپگ ءَ اِنت۔
زانگ بہ بیت کہ ھندوستان ءِ ھندو مزھب ءِ رد ءَ جنین آدم ءِ آروس ءِ منانک ءِ رد ءَ سھرین ءِ ھمے ٹک ءِ رژنائی اِنت ءُ آئی ءِ مرد ءِ بیرانی ءَ پد چہ پیشانی ءَ ٹک کشگ بیت ءُ ایشی ءَ جنوزان یا سونانی دیگ گش اَنت۔
‘آپریشن سندور’ چے یے؟
چار شمبے ءِ روچ ءَ سھب ءَ بھارت ءِ لشکر ءِ کرنل صوفیہ قریشی ءَ آپریشن سندور ءِ بابت ءَ گپ جنان ءَ گوشت کہ اے ”22 اپریل ءَ پھلگام ءَ اُرش ءِ راستیں پوجی پسو اِنت کہ اے اُرش گچینی انٹیلی جنس ءِ بنیاد ءَ کنگ بوتگ۔“
آئی ءَ ٹاہ داتگ کہ آپریشن سندور ءِ چیر دستی ءَ دگہ بندش جتگیں جنگولی گلانی بنجل ءُ ھلکاری ءِ بنجل نشانگ جوڑ کنگ بوتگ اَنت ایشانی تہ ءَ بندش جتگیں لشکر طیبہ ھم ھوار اِنت۔ بلے پاکستان ءِ فوجی ءُ سیاسی واکداراں اے گپ رد کتگ ءُ گْوشتگ کہ مسیت ءُ شھر ءِ دمگاں اے اُرشانی آسر ءَ زھگ ءُ جنین ءَ ھوار 26 لس مردم بیران ءُ 46 ٹپیگ بوتگ اَنت۔
کرنل صوفیہ قریشی ءَ گشتگ کہ اے کیمپ ھال سرکنوکیں انٹیلی جنس ءِ سرا جوانیں چار ءُ ڑپاسی ءَ پد گچین کنگ بوتگ انت ءُ ایوک ءَ ناشرکاری ءِ چن ءُ لانچی جاہ نشانگ جوڑ کنگ ءِ ھیالداری کنگ بوتگ۔ اے کیمپ ھما جاہ ءَ چہ نشانگ جوڑ کنگ بوتگ اَنت کہ پیسر ءَ بھارت ءِ ھلاپ ءَ ناشرکاری اُرش ءِ منسوبگ جوڑ کنگ ءَ بیتگ انت۔ یات دارگ بہ بیت کہ پاکستان ءَ گوستگیں وھداں ھم باز رند ءَ اے وڑیں گپ رد کتگ اَنت ءُ گْوشتگ کہ ھندوستان ءِ اُرشانی تہ ءَ لس مھلوک نشانگ جوڑ کنگ بیتگ اَنت۔
بھارت ءِ وزارت دفاع ءَ گشتگ کہ آئی ءِ سلاہ بندیں اُرد ءُ برزی لشکر ءَ پاکستان ءُ پاکستان ءِ چیر دستی ءَ کشمیر ءَ ’’آپریشن سندور‘‘ ءِ چیر دستی ءَ 9 ٹارگٹ ءِ سر ءَ ٹارگٹڈ اُرش کتگ کہ آئی ءَ را ’’ناشرکاری ءِ بنکی بنجل‘‘ گشگ بوتگ۔ پاکستانی لشکری ءَ اے گپ رد کتگ ءُ گْوشتگ کہ اے اُرشانی تہ ءَ بے میاریں لس مردم ءُ مسیت نشانگ جوڑ کنگ بیتگ اَنت۔