ھدہ جیل ءَ شُد ھڑتال
ٹی بی پی شونگال
مشکاف بولان ءَ بلوچ لبریشن آرمی ءِ نیمگ ءَ پاکستانی ریل ءِ جعفر ایکسپریس ءِ گِرگ ءُ پوجیانی سر ءَ ھترناکیں اُرشانی دارگ ءِ بے سوبی ءَ پد بلوچستان ءَ مان گش اتگیں سرکار ءِ وزیراں بلوچ یکجھتی کمیٹی ءِ رھشونانی سر ءَ بھتام جنان ءَ گوشتگ کہ آ بلوچ آجوئی لوٹوکانی سیاسی سرشون انت ءُ آ دزگیر کتگ ءُ بلوچستان ءَ امن برجم کن ایں- بلے بلوچستان ءِ راستیں راستیاں نابلدیں ریاستی واکدارانی ھما ردیں پالیسیانی سبب ءَ بلوچستان ءِ جاورانی شرتر بوگ ءَ ابید روچ پہ روچ گیش ھراب بوگ ءَ انت-
بلوچ یکجھتی کمیٹی ءِ رھشوناں 3MPO ءِ تَک ءَ دزگیر کنگ ءَ یک ماھے ءَ گیش گوستگ ءُ جیل ءَ مھکمہ انسداد ناشرکاری ءِ ءُ ریاستی ادارھانی ناروائیں رویش، ابید ءِ آمیدگس ءَ گامگیج ءُ بیبو بلوچ ءِ سر ءَ لٹ شاپی کنگ ءُ ابید ءِ کانونداری ءَ پشین جیل ءَ برگ ءِ ھلاپ ءُ بلوچ یکجھتی کمیٹی ءِ رھشون ھدہ جیل ءَ شدھڑتال کنگ ءَ انت-
پاکستان ءِ واکداریں ھَلکانی نزیک ءَ سرپد بیوکیں بلوچستان ءِ انیگیں اڑوکی سروزیر ءِ گامگیج ءَ بلوچستان ءِ جاور ھرابی ءِ سبب بوگ ءَ انت ءُ اڑوکی سرکار ءِ نمائندگ گھگیری سیاست ءَ بندوکیں رھشونانی ھلاپ ءَ راستی ءِ درشان ءِ لپاشگ ءَ دزبند اِنت- بلے ریاستی بندشاِ ابید ھزارانی کچ ءَ بلوچ راج وتی سیاسی رھشونانی یل دیگ ءِ ھاتر ءَ زھرشانی کنگ رژنائیں روچ ءِ ڈول ءَ پدر کنگ اِنت کہ بلوچ مھلوک ریاستی درشاندابی ءِ ھچ رنگ ءَ منوک نہ انت-
بلوچ یکجھتی کمیٹی ءِ مھلوک ءِ سیاستی زرمبشت ءِ دزگیر کنگ، زھرشانی کنوکانی کوش، لٹ شاپ ءُ جیلاں ناروائیں رویش ءِ ھلاس کنگ ءَ بے سوب بوتگ ءُ ریاستی جبر ءِ ھلاپ ءَ شد ھڑتال ءِ زور ءَ جیل ءَ ھم آیاں وتی گھگیری برجاہ داشتگ – بلوچستان ءَ سیاسی زرمبشتانی راجدپتری گوستانک ھست انت کہ آ ریاستی جبر ءَ گوں ھلاس نہ بیتگ انت- سیاسی گھگیری زُلم ءُ جبر ءَ وھدی دروشم ءَ نیزور بیت کن انت، بلے مھلوک ءِ سیاسی گھگیری تاکت ءِ زور ءَ نا پیش ءَ ھلاس کنگ بیتگ ءُ ناکہ انی ھلاس کنگ ءَ ممکن انت-