امریکہ ءِ سِلاہ – ٹی بی پی شونگال

امریکہ ءِ سِلاہ

ٹی بی پی شونگال

امریکہ ءِ روتاک واشنگٹن پوسٹ ءَ وتی 14 اپریل ءِ شمارہ ءَ یک رپورٹے ءِ سرھال “ اوگان جنگ ءِ واستا امریکہ ءِ سِلاہ پاکستانی سلاہ بندیں جنگولاں بازیں نَپ دیگ ءَ انت ” شنگ بیتگ- رپورٹ ءِ رد ءَ پاکستانی واکداراں روتاک ءَ را سَے امریکہ ءِ رائفلزانی سیریل نمبر داتگ انت، چوشکہ گمانی رنگ ءَ بولان ءَ جعفر ایکسپریس ءِ اُرش کنوکانی دست ءَ بیتگ انت- رپورٹ ءَ گیش پدر کنگ بیتگ اُرشکارانی گور ءَ یک ایم فور اے ون رائفلے ھم بیتگ، چشکہ امریکہ سِلاہ کاریں کمپنی کولٹ ءِ جوڑ کنگ بیتگ-

پاکستانی بنجاھی وزیر ءُ بازیں کواسکار، بلوچ جنگِ آجوئی ءِ ھمے زوتاں ترندی ءُ گیشی ءَ اے امریکہ ءِ سلاہ ءِ کارمرد کنگ ءَ جوڑینگ ءَ انت، راستی ءَ اوگانستان ءَ گوستگیں چِل سالاں سِلاھانی میان اُستمانی منڈی جوڑ بیتگ- سوویت یونین ءِ دزمانجنی ءَ پد نا ایوک ءَ اوگانستان ءَ بلکیں سرجمیں دمگ ءَ سلاھانی دیمدراھی کنگ یک رواجے جوڑ بیتگ-

امریکہ ءُ دگہ میان اُستمانی تاکتاں اوگانستان ءَ جاڑیگ بوگ ءِ وھد ءَ امریکہ ءِ سلاہ بلیک مارکیٹ دزکپتگ – اے سِلاہ بس ایوک ءَ بلوچستان یا ھیبر پکتونواہ ءَ شنگ نہ انت بلکیں کشمیر ءُ میان ڈیھاں اڑوکی ءَ کارمرد بوگ ءَ انت – پاکستان ءِ بلیک مارکیٹ ءَ اے سلاہ آسانی ءَ دزکپتگ انت-

بلے ، بلوچ جنگ ءِ آجوئی ءِ آیوکیں ترند ءُ تیزی ءِ بنکی سبب امریکہ ءِ سِلاہ نہ انت، بلکیں میان اُستمانی ءُ دمگی جاوراں آیوکیں دیمروئیانی سبب ءَ بلوچ سلاہ بند ھم مٹ بیوکیں جاوراں وتی گامگیج، دیم ءَ آیوکیں جنگی سنچ ءُ زانتکاریں ورنایانی بازیں کچے ءَ ھوار بوگ انت-

گوستگیض لھتے سالانی توک ءَ بلوچ سلاہ بندیں گل گچینی بلوچ لبریشن آرمی ءُ بلوچستان لبریشن فرنٹ، وتی سلاھانی درکاری ءِ مزنیں بھر پاکستانی سیکورٹی پورسز، گیش پوج، فرنٹیئر کور،پولیس ءُ لیویز ءَ چہ سلاھاں پچ گر انت – جنگاں سلاھانی گچینی مسلمہ، بلے پیسلہ کنوکیں کردار جنگی ادارہ پالیسیاں، ھمکت املیاں ءُ آیانی املی سلاھِتیانی کرد ءَ پیلو کن اَنت-

بدبھتی ءَ چہ پاکستان ءِ پالیسی سازانی سروک بلوچ جیڑہ ءِ سرپد بوگ ءَ نابودکاری انت- ھمے سبب ءَ آ ھچ ھروھد ءَ اے جیڑہ ءَ سلاہ بندانی سِلاھاں ھوار کنگ ءَ انت ءُ ھچ بر آیاں درملکی تاکتانی پندل گوشگ ءُ مھلوک ءِ دیم ءَ وتی درشاندابی ءِ جھد ءَ کنگ ءَ انت-

بلوچ راج ءِ ھک ءِ ھاکمیت ءُ آجوئی ءِ واستا جد ءُ جھد کنگ ءَ انت – امریکہ ءِ سلاھاں اے جد ءُ جھد ءَ ھوار یکنگ یک گچینی درشاندابی ءِ جوڑ کنگ بیت کت کنت، بلے ایشی ءِ راستی ءِ ھک گار کنگ نہ بیت انت- بلوچستان ءِ جنگ ءِ آجوئی ءِ ترندی ءُ تیزی ءِ راستیں سبب بلوچ سلاہ بندانی جنگی گامگیجانی توک ءَ بازیں مٹ ءُ دِگری اتکگ انت-