آدمی – شکّل بلوچ

آدمی

نبشتہ کار: شکّل بلوچ

دی بلوچستان پوسٹ

بچار وتی زندگی ءِ فنا کنگ ءِ واستا انچیں مکامے بدے کہ اللہ وش بہ بیت، اد ءَ وَ ھرام واری باز انت، اسلام کُج اِنت؟ بس پہ نام ءِ اسلام ءَ چون کن ئے کہ تئی زند ءَ آسان کُت مہ کنت متلب ھر ھما ھرابی، شِرّی ھست انت کہ گپ نہ بیت، نا انساپی وَ ھد ءَ چہ گوستگ، زالبولانی اِزت انچو بے شرپ کُتگ کہ اسلام ءِ تہ ءَ آئی ءِ بلاھیں مکامے ھست اِنت، اسلام شمارا اے چیزانی موکل ءَ وَ دنت، بلے شما وترا اسلام ءِ ٹھیکدار کُتگ پرچا؟ اسلام ءِ راہ ءُ رھبند چے گُشتگ؟

چیریں آدت

چیری یک انچیں نادراھی یے کہ بے بیسھی ءِ آسر ءَ سر کنت۔ راست ءِ گُشان بے بْراہ کُتگ ءُ پردہ ءِ تہ ءَ دروگ(لُچی، لبّی، بے شرپی، ھرام، دُزی، پلینڈی، نارزاھی، تکبر، گرور، وت مزنی) سھرا کُتگ۔ اد ءَ مستریں مجرم(بے زانتی) ھما مات ءُ پت انت کہ وتی چُک ءَ شریں زندے دات کنگ ءَ نہ اَنت، پرچا کہ” دروگ ءِ بازار ءَ وھدے نند ئے دروگ بندے بَہ ئے“ اے چاگرد ءِ انچیں نادْراھی اَنت کہ مردم سما گور کنگ ءِ کوشست ءَ ھم یل دی انت۔

اسلام ءِ نام ءِ سر ءَ جہاد کنت بلے منی ھیال مستریں جہاد پیسر ءَ وتی تہ ءَ اے درستیں دروگ، شِرّی ھلاس کنگی انت، اے دروگے کہ اسلام ءِ نام ءِ سر ءَ پھک ءُ پلگاریں جہاد بوگ ءَ اِنت، اگاں بوگ ءَ اِنت گڑا پہ ھاس مکسدے ءِ داب ءَ بوگ ءَ اِنت، ھر چیز چیروکائی بوگ ءَ انت، ھرچی کہ سھرا کنائینگ بنت بس مھلوک ءِ جبزگانی سر ءَ لیب کنگ اِنت۔ بلے مستریں مجرم تئی جند انت کہ وت ءَ اگاہ نہ کن ئے، وت ءَ پلگار کنگ ءِ ھاتر ءَ جُھد نہ کن ئے، سرپد ءُ پوہ بوگ ھر بنی آدم ءِ واستا انت، تو چہ وت ءَ اِلم ءُ زانت ءَ پرچا زِبھر کُتگ؟ ترا وتی ھک سرپد بوگی انت، ترا وتی جند سرپد بوگی انت، ترا وتی سر ءِ رِپک ءُ پندل، چہ دژمن ءِ نیمگ سرپد ءُ پوہ بوگی اَنت۔ اے تئی راست انت، اے تئی سوڑگ انت، ترا وتی پگر، سما، ھوش ءُ سار گور دارگ لوٹ انت، تو یک انسانے ئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-