زورگِر ءِ زوراکی ءُ بلوچ ءِ سوبمندی
نبشتہ کار: زھیر بلوچ
دی بلوچستان پوسٹ
چوناھا ما زورگِریں استان ءِ زوراکیانی دِرچ ءَ بچار ایں گُڑا اے پہ بلوچ راج ءَ انوگینے نہ اِنت۔ بلکیں اے زورگری ءِ اولی روچ ءَ چہ بندات اِنت۔ بلے وھد، وھد ءِ سر ءَ اے زوراکیانی دروشم مٹ بُوھان ءُ تُرند تِر بوھان بوتگ اَنت۔
مرچی کہ ما زورگِر ءِ زوراکیانی دِرچ ءَ گند ایں گُڑا مارا وڑے ناں وڑے ءَ دو ھزار نُھ ءُ دہ ءِ نوبت گندگ ءَ کیت۔ چے ءَ کہ ھمے وھد ءَ زورگریں استان ءَ بلوچ راج ءِ توار ءَ ایر موش کنگ ءِ واستا وتی سرجمیں زور جت اَنت۔ بزاں زورآنسری بیگواہ کنگ ءُ پد ءَ ھمے بیگواھیں مردمانی ژانگولیں جوناں ماں گیاباناں دور دیگ۔ پد ءَ دومی نیمگ ءَ بلوچ ءِ سیاسی توار ءَ نھِگُٹ کنگ ءِ واستا بی ایس او آزاد ءُ بی این ایم ءِ وڑیں راجداریں گلانی سر ءَ زوراکی کنان اَت سیاسی باسکانی بیگواہ کنگ ءُ شھید کنگ ءِ دِرچ بندات کنگ بوت کہ روچ ءِ مروچی برجاہ اِنت۔ سیاسی گلانی سر ءَ پابندی جنگ بوت۔
مرچی ھم زورگِر ءِ زوراکی برجاہ اِنت بلے مرچی زورگِر ءِ زوراکیانی دروشُم مٹ بوتگ بزاں زورگِر ءَ بلوچ چُکچینی ءِ تہ ءَ وتی کارگِر ءِ دروشُم مٹ کتگ۔مرچی بلوچ ءِ باسمائیں ورناھاں آوار جنگ ءُ دروگیں میڑ ءَ شھید کنگ ءُ آیاں سلاہ بندیں گلانی مردم پیش دارگ ءِ بے سوبیں جھدے کنگ ءَ اِنت۔ بزان ھردیں کہ زورگِر بلوچ سرمچارانی دست ءَ لٹ وارت ءُ بے سوب بیت گُڑا ھمے بیگواھیں مردماں شھید کنت ءُ دور دنت دانکہ دنیا ءَ وتی اولس ءَ رَد دات بہ کنت۔ دومی نیمگ ءَ زورآنسری بیگواھیں مردمانی کیس ءَ دنیا ءِ دیم ءَ دگے دروشمے دنت کہ اے مردم ما بیگواہ نہ کتگ اَنت بلکیں اے مردم کوہ ءَ اَنت ءُ مئے (بزاں پاکستانی لشکر) ءِ گوں ما دیم پہ دیمی جَنگ ءَ جنَگ بوگ ءَ اَنت۔ اے وڑ ءَ زورگِر بلوچ راج ءِ تہ ءَ وتی تُرس ءَ پد ءَ برجاہ دارگ لوٹ اِیت انچو کہ ما پیسر ءَ دیستگ اَت۔ بلوچ چُکچینی ءِ تہ ءَ اے روشت زورگِر ءِ پندلانی مزنیں بھرے پمیشکا زور بیگواھیں مردمانی کولاں ھر وڑ ءَ وتی مھروانانی واستا توار چست کنگی اِنت ءُ آیانی کیس دیم ءَ آرگی اِنت۔
بلوچستان ءِ ھستیں جاورانی تہ ءَ زورگِر ءَ چار اِت کہ بلوچ راج نوں آئی ءِ دُرستیں زوراکیاں سرپد ءُ آشنا اِنت ءُ بلوچ تپاکی پّتر (بی وائی سی) ءِ زُرمبشت ءَ بلوچ راج تپاک ءُ یکجاہ کتگ ءُ بلوچ ءِ تُرس ھلاس بوتگ ڈاکٹر مھرنگ ءُ آئی ءِ سنگتانی جھد ءَ بلوچستان ءِ تہ ءَ یک نوکیں آشوبے آؤرت۔ تونسہ ءُ ڈی جی ھان ءَ بہ گِر دانکہ سیستان ءُ زاھدان ءَ در ءَ بلوچ تپاکی پتّر ءَ بلوچ راج یکجاہ کتگ ءُ گھگیری ءِ سکین داتگ ءُ میان استمانی رِد ءَ ھم زورگِر ءِ زوراکیانی آدینک پدر کتگ۔ پمیشکا زورگِر ءَ وتی زوراکیانی دیم ءَ نوں گوں بلوچ تپاکی پتّر ءِ نیمگ ءَ کتگ۔
زورگِر وتی رسانکدر ءُ اولس ءِ تہ ءَ بی وائی سی ءَ سلاہ بندیں گلانی کُمک کار پیشدارگ ءِ جھد ءَ کنگ ءَ اِنت۔ دانکہ بلوچانی راجمانی توار ءَ ایر موش بہ کنت ءُ وتی زوراکیانی سر ءَ چادرے پِر بہ دنت۔
وھدے گوادر ءَ بی وائی سی ءَ راجی مُچی ءِ جار جت گُڑا زورگِر ءَ بی وائی سی ءِ اے مُچی ءَ بے سوب کنگ ءِ واستا سرجمیں بلوچستان ءِ کشک ءُ دگ بند کُت اَنت لس بلوچ پاد تراپ ءُ بیھار دات دانکہ اے مُچی ءَ بھر مہ زور اَنت۔ تلار ءَ مُچی ءِ کاروان ءِ سر ءَ اُرش کُت چار بلوچ پُسگ شھید کُت۔ بلے بلوچ راج بے توار نہ بوت پہ وتی رھشون ڈاکٹر مھرنگ ءِ توار ءَ پاد اتک اَنت ءُ زورگر ءِ زوراکیانی دیم ءَ اوشتات اَنت۔ ھمے وڑ ءَ ڈالبندین ءَ راجی مُچی ءَ ھم زورگِر ءَ وتی ھمے ھُنر ساز اِت۔
بلوچ تپاکی پتّر ءِ سر ءَ زورگِر ءِ نوکیں زوراکیانی نوکیں دروشُم مارا بولان جاپر ریل ءِ سر ءَ بی ایل اے اُرش ءَ پد گندگ آتک۔ کہ مدامی وڑ ءَ زورگر ءَ وتی بے سوبی ءَ زورآنسری بیگواھیں مردم شھید کُت اَنت ءُ آیانی لاش شال ءَ نادُراھجاہ ءَ آؤرت اَنت وھدے ھمے لاشانی پجار کنگ ءَ بیگواھیں مردمانی کول آتک اَنت گُڑا آیانی سر ءَ زوراکی کنان ءَ زورگِر ءَ آ لٹ شاپ کُت ءُ کم شرپ کُت اَنت۔ وھدے بی وائی سی ءَ اے زوراکیانی بگیر ءَ زھرشانی کُت گُڑا زورگِر ءَ زھرشانی ءِ سر ءَ تیرگواری کنان ءَ کسان سالیں نھمت اللہ ءُ حبیب نامیں ورنا یے شھید کُت بازینے ٹپیگ کُت۔
ھمے وڑ ءَ زورگِر ءَ بی وائی سی ءِ بُنجاھی باسک بیبگر بلوچ ءُ آئی ءِ برات زورآنسری بیگواہ کُت اَنت پد ءَ ڈاکٹر مھرنگ بلوچ، بیبو بلوچ، سمی بلوچ، شاہ جی بلوچ ءُ گُلزادی ھم دزگیر کُت ءُ زندانیگ کُت اَنت۔ دومی نمیگ ءَ زورگریں لشکر بیگواھیں مردماں دروگیں میڑ ءَ شھید کنگ ءِ تہ ءَ ھم تُرندی آرگ ءَ اِنت ءُ وتی داشتگیں کاسگ چٹ کہ (ڈیتھ اسکواڑ) ءِ نام ءَ زانگ بنت ایشانی دست ءَ کسان سالیں ورنایاں ھم شھید کنائینگ ءَ اِنت۔ اے دُرستیں زوراکیانی پُشدر بلوچ چُکچینی ءُ بلوچ راج ءِ توار ءَ ایرماد کنگ ءَ اِنت ءُ بلوچستان ءِ تہ ءَ پد ءَ وتی تُرس ءَ برجاہ دارگ اِنت۔
بلے ڈاکٹر مھرنگ ءُ آئی ءِ سنگتانی دزگیری ءَ پد بلوچستان ءَ انچیں آسے روک بوت کہ زورگِر اے آس ءَ داشت نہ کنگ ءَ اِنت۔ کشمور ءُ تونسہ ءَ بہ گِر دانکہ سیستان ءُ زاھدان ءَ ڈاکٹر مھرنگ ءُ آئی ءِ سنگتانی دزگیری ءِ بگیر ءَ زھرشانیانی دِرچ برجاہ اِنت۔ سرجمیں بلوچستان بند اِنت ءُ بلوچ راج دگانی سر ءَ زھرشانی کنگ ءَ اِنت۔ مرچی زورگِر ءِ سجھیں زوراکیاں پد ھم بلوچ راج گھگیری ءِ کِشک ءَ جُنزگ ءَ اِنت۔
زورگِر بے سوب بوتگ وتی بے سوبی ءَ دست ءُ پاد جنگ ءَ اِنت۔ بلوچ راج ءَ وتی جھد ھمے وڑ ءَ برجاہ دارگی اِنت وتی رھشون ڈاکٹر مھرنگ ءِ ھمتوار بوگی اِنت ءُ گوں تپاکی ءَ گھگیری ءِ کِشک ءَ جُنزگی اِنت۔ مارا زورگِر ءِ ھمُک پندل پوہ بوگی اِنت۔ تپاکی ءُ یکشلیں جھد مارا منزل ءَ سر کنت۔
مئے ایمان اِنت بلوچ الم آجوئی ءِ منزل ءَ سر بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-