پاکستان ڈاکٹر صبیحہ بلوچ ءُ آئی ءِ کھول ءَ ترسینگ ءَ بند بہ کنت- میان اُستمانی گچینی نمائندگ

میان اُستمانی انسانی ھکانی گل ءِ گچینی نمائندگ میری لاولر ءَ ڈاکٹر صبیحہ بلوچ ءِ گون ءَ ھمدردی درشان کتگ-

جنیوا ءَ میان اُستمانی انسانی ھکانی پھریزوکانی گچینی نمائندگ میری لاولر ءَ نامداریں بلوچ سیاسی زالبول رھشون ءُ انسانی ھکانی باسک ڈاکٹر صبیحہ بلوچ ءِ ھلاپ ءَ پاکستان ریاستی زوراکیانی سر ءَ پدردی درشان کتگ-

آئی ءَ وتی درشان ءَ گوشتگ من ءَ اھوال سر بیتگ انت کہ ڈاکٹر صبیحہ بلوچ ءَ پاکستان کجام ھم وھد ءَ دزگیر کت کنت- ھمے وڑ واکداراں آئی ءِ انسانی ھکانی کارانی پژدر ءَ آئی ءِ پت دزگیر کتگ ءُ داشتگ-

میری لاولر ءَ لوٹ کتگ کہ بلوچستان ءِ واکدار ڈاکٹر صبیحہ ءِ ھلاپ ءَ ریاستی بیرگیری کاروائیاں بند بہ کنت ءُ آئی ءَ انسانی ھکانی پھریزگ ءَ آجوئی ءَ کار کنگ ءَ بِل ایت-

زانگ بہ بیت گوستگیں روچاں اھوال انت کہ پاکستانی واکدار ءُ پورسز ءَ بلوچ یکجھتی کمیٹی ءِ رھشون ڈاکٹر صبیحہ بلوچ ءَ دزگیر کنگ ءَ شال ءِ جتا جتائیں جاھاں بیڑ برتگ ءُ گوستگیں روچاں ھب ءَ آئی ءِ پد ھم دزگیر کتگ ءُ برتگ-

میری لاولر ءَ وتی درشان ءَ گوشتگ پاکستانی مشن جنیو ءَ گپ کنت کہ انسانی ھکانی پھریزوکانی ریاستی ترسینگ ھچ رنگ ءَ سگگ نہ بیت اِنت-