نودانی نود اندیم اِنت
نبشتہ کار: سعود ناز
دی بلوچستان پوسٹ
“نوبت ءَ ھورکیں کاسگے گون اِنت
بیا کہ ھیرات بوھگ ءَ آں من”
ارواھیں نود نودانی ساھگ ءَ بات ئے انسان ءُ انسانی رِشتہ ءُ نزیکیں مردم ءَ را گوں مردم ءَ اَنچو ھور ءُ تور کُتگ کہ گپ نہ بیت پد ءَ مئے ءُ شمئے سنگتانی اَنچیں مِھر ءُ مُھبتے چوناھا بلوچ ءَ بلوچ ءِ دوستی ءُ مُھبت ھر ھساب ءَ بہ بیت ءُ آئی ءِ اولی پَرز ءُ کرز اِنت تو وَ پد ءَ دوستانی جان ئے اَسل ءَ پہ تو سک ءَ زھیر اُوں کنت دل ءَ گْوشت پہ تو کاگدے راھی کن پد ءَ تو مروچاں زندانی ئے زندان ءَ لَٹ ءُ کُٹ ءُ بلوچ بوھگ ءِ سِزا ما یک رندے وارتگ اَنت ھمے واستا تکریبن انسان کمو اَندازہ جَت کنت گران اِنت اَسل ءَ مردم ءَ بزگ کن اَنت تو ھمود ءَ تھاریں کوٹیاں آزارانی چیر ءَ ساہ زیرگ ءَ ئے ءُ ما اِد ءَ پہ تئی ودار ءَ رَنجیگ ایں چوناھا اِد ءَ اَئیدے بوتگ بچار ما وَ ھما بے نُماز تئی وَ گپ تَچک بوتگ من دگہ اَئید مَئید نہ زاناں من وتی دوئیں جوڑی کاٹن لوٹائینتگ اَنت چے ءَ کہ ھردیں کہ تو چہ میتگ ءَ واتر شالا اَتکگ ئے گُڑا نوکیں سُٹّے چاڑینتگ ما وَ پد ءَ نشتگیں پہ کَلاگ گِرگ ءَ کھروار درستانی لاڈُک بوتگ ، من ءَ سک ءَ مرچی ھمے گپ تورینگ ءَ اِنت کہ نود ترا اگاں ھزار کلدار گون بوتگ پنچسدی یے پہ ما راہ داتگ مئے ءُ شُمئے وَ ھمے نودربرانی لاتی بھ در نیتک برے برے ما بَٹاک جَتگ ءُ نود تو زانتگ کہ من سجھیں بلوچستان ءِ جان ءُ ڈنّ ءُ اِد ءِ سجھیں بلوچانی دوستاں گُڑا باکاھیدہ تئی اَندازہ راست بیتگ اُستاد مرچی تئی زندانی بوھگ ءَ سجھیں بلوچستان ءِ بلوچ مئے وَ سجھیں سنگت بزگ زھیری کُتگ اَنت اَڑے بیا ناں تو مُنیر ءِ شِیرانی شیداہ ئے اُستاد ءِ شَیرانی تاریپ ءَ بکن ءُ ما ترا کُنّت کنیں بیا اَڑے زالمانی زندان ءَ پُروش بدے درُست تئی رَھچار اَنت ما کُجا اِے ٹوھیں رَنجاں سَگ اِت کن ایں ما مُھکم بئیں بیا کہ اے رَندی من نماز ءَ شُتگ آں ءُ پہ تو دوا لوٹ اِتگ من وَ بھ نماز نکناں بلے اَمّا بَزگ پہ تو سک دوا کنت-
اَسل ءَ ھما جیڑہ ءِ جند کہ ھست اِنت آئی ءِ ھاتر ءَ مارا شُمارا زندانی بوھگ درد ءُ تورشت ھر روچی ئیں دلپروشی وانگ ءُ زانگ ءَ چہ دیر تَچگ ، بے وابی ءُ رَنجانی توک ءَ بوھگ لوگ ءُ میتگانی پُرسیگ بوھگ مردمانی شگان پہ سرے بلے اَنگت ءَ گرانیں ساھتاں اِینچو بزگیانی توک ءَ بلوچ بوھگ ءُ دیم ءَ جُنزگ مئے شُمئے درستانی زمہ واری ءُ ھمّت اِنت پُرشگی نہ اِنت ءُ ما اُمیت ءِ توک ءَ اِیں بلکیں مارا یکین اِنت کہ تو وت ءَ ڈڈ کن ئے ءُ پہ کندان ءَ واتر کا ئے زریں بُگ ءِ لاڈُک بیا کہ پہ تو سَجھیں مردم زھیری اَنت شَنکو شالا زیت آجو بات ئے۔
تئی دوزواہ ءُ سنگت سؔعود ناز
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-