ریاستی زوراکی ءُ سیاسی گھگیری
ٹی بی پی شونگال
بلوچستان ءَ را پاکستان ءَ یک وفاقی ریاستے ءَ ابید تاکت ءِ زور ءَ وتی ھاکمیتے ءِ مُشگ ءِ رویش برجاہ داشتگ- گھگیری مھلوک ءِ سیاست ءِ منوک پیش ءَ ریاستی ادارھانی زُلمانی چیر ءَ بیتگ انت ءُ نی پاکستان وفاق ءِ سیاست ءَ بندوکیں ٹولیانی گاماں جنگ ءَ انت- ریاست ءِ پالیسی ساز بلوچ ءِ راستیاں چہ ناسرپد انت، آ ھمے واستا اے ستک ءَ دار انت کہ بلوچ زالبولانی بندیگ کنگ ءَ بلوچ مھلوک ءَ پاکستان ءِ سیاست ءَ ھوار کت کن انت-
بلوچستان نیشنل پاٹی (مینگل) ءِ سروک سردار اختر جان مینگل ءِ سروکی ءَ ماہ رنگ بلوچ، سمی دین بلوچ، بیبو بلوچ، بیبگر بلوچ ءَ ھوار سدانی سیاسی باسکانی یل کنائینگ ءِ ھاتر ءَ چہ وڈھ ءَ شال ءَ سر بیوکیں لانگ مارچ نیم راہ ءَ دارگ بیتگ ءُ ریاست وتی ترندگیریں پالیسیانی درشانی ءَ کنگ ءَ انت- بلے پہ بلوچستان ءَ پاکستان ءِ رویش بنداتی روچ ءَ ترندگیریں ریاستے ءِ دروشم ءَ بیتگ انت-
پنجاہ ءِ دھک ءِ گڈسر ءَ نواب نوروز خان ءَ را قرآن دیم ءَ دیگ بیتگ ءُ گپ ءُ تران ءَ جاڑیگ کنگ بیت بلے پد ءَ آ بندیگ کنگ ءُ آئی ءِ زھگ زندان ءَ پاھو دایگ بنت انت- 1973 ءَ نیشنل عوامی ءِ برجمیں سرکار یک گور کنگ بیت ءُ مری ءُ مینگل ٹک ءِ سر ءَ شب ھون بندات ءُ جنگ بنت انت- بیست ءُ یکمی کرن ءَ گوستگیں بیست سالاں زورانسری بیگواھی ءُ دزگیری جاہ ءَ کوشانی وئیل یکشل ءَ دیم ءَ آیگ ءَ انت- پاکستان ءِ دگہ بھراں بیت کنت ترند گیریں ریاست ءِ دروشم ءِ دیمپانی مہ بیت بلے بلوچ راج چہ ھپتاد سالاں ریاست ءِ ھمے رویش ءِ دیمپانی ءَ کنگ ءَ انت-
بلوچ زالبولاناں زھرشانی ءِ ھک ءَ زبھر کنگ ءُ آیاں بندیگ کنگ ءُ سردار اختر مینگل ءِ نندانک ءِ سر ءَ وتکش اُرش کنگ ءِ وڑیں کاروائیاں اگاں ریاست ءِ واکداریں پھنات اے سرپد بنت کہ بلوچ وتی ھاکمیت ءِ جد ءُ جھد ءَ دزکش بنت گڑا اے آیانی بلوچ گوستانکی سیاسی پھنات ءَ بزاں ھچ ءَ سرپد نہ اَنت-
بلوچ راجی سیاست ریاستی ترندی ءَ ابید برجاہ بیت اِنت بلے پاکستان ءِ وفاق ءَ بندوکیں ٹولیانی گاماں پروشگ ءَ ریاست ءِ اُنڈال چہ بلوچستان ءَ گیش کمزور بنت ءُ اے زانشتکاری گیش پھتو بیت کہ پاکستان ءَ سیاست کنگ ءَ راجی ھکانی گرگ ممکن نہ اِنت-