شالکوٹ ءَ بکشو ءِ زوراکیانی پُشدر ءَ
میجر مجید
رملَچّہ
دی بلوچستان پوسٹ
شال روک اِنت ءُ بُن اِنت بولان،
سُتکگ دلبند چاگی ءِ
ھون شنز اَنت مئے دیارءَ مکھیں
مھرمیں مات ءُ گُھارانی گُشان
چاک چاک کتگ
تو پُل اِت ننگانی چادر چہ حیاداریں سراں،
نوک بروتیں ورنا راج ءِ
آماچ تیرانی کتگ
نوریءِ شالءَ پدا
پُرسی زیمر مَچّ اِتگ،
تو یزید ءِ سیاھیں دپتر نوک کتگ
تو چہ چنگیز ءُ ھلاکو ءَ
دستے دیم ءَ دؤر کتگ،
ھون آشوب ءِ کِشار ءَ آپ دنت،
سَمبراِیت بولان گوں پُل ءُ گْواڑگاں
ھون منی جُھد ءِ سِپاہ اِنت نابکار
ھون تئی گاریءِ نشان
ھون منی آجوی ءِ مانزمان
مئے زمین ءُ دْرچک ءُ دار ءُ مَیزریں کوہ ءُ دمگ
بَگّ ءُ گو٘رُم،
میھڑ ءُ ھاریں رَمگ
شوانگ ءُ بگّ جتّ ءُ گو٘وال
پرسیگ اَنت پدا،
کُل ملور اَنت پہ وتی تنگویں بْراھندگاں
تئی کتاب نی مرگ کاراِیت دیمتر ءَ
من زَراں پہ شال ءُ گنجیں گْوادر ءَ
پَٹّ ءُ گْیابان ءُ گَیاب ءُ
ھمّل ءِ نِیلّیں زِر ءَ
در بہ کپ ڈیھ ءَ منی
گوں وتی بکّالی تَنکیں چِرّکءَ
(نی) جھ جتگ مات ءُ گُھاراں
پیر ءُ ورنائیں سراں
راج پھازیں سرمچاراں
گوں فِدائی لشکراں
“گُڈّی تیرءَ سرمچار
سالونک بیت”
گلزمین ماتیں منی
سمبھ اِیت بانور بیت