ریاست پاکستان بلوچ پسگاں نوکیں دابے ءَ کُشگ ءُ جنگ ءَ انت – تربت ءَ یکجھتی کمیٹی ءِ رھشونانی پریس کانفرنس

تربت پریس کلب ءَ بلوچ یکجھتی کمیٹی ءِ رھشون سبگت اللہ شاجی ءَ وتی ھمراھانی ھواری ءَ پریس کانفرنس کنان ءَ گوشتگ ​​​چوشکہ شما سرپد اِت کہ چہ گوستگیں چیزیں ماھاں کیچ ءُ مکران ءَ ھوار سرجمیں بلوچستان ءَ زورگیریں ریاست پاکستان ءِ زالمیں پوج بلوچ ءِ پُسگاں گچین کنگ ءُ شہید کنگ ءَ اِنت ۔ ما سرپد بئیں کہ اے زورگیریں پاکستان ءِ بلوچ چُکچینیءِ نوکیں شوربندی یے۔ چہ ھمے نوکیں شوربندیءَ بلوچ پُسگ یکرندے پدازورانسری گار ءُ بیگواہ کنگ بنت ، دژمن ءِ ٹارچر سیلاں لٹ ءُ کٹ کنگ بنت ۔بلے اے رندی ھمیش پالیسیءَ را جتائیں شکلاں کارمرز کنگءَ انت۔ چوشکہ وھدے کہ یک بلوچ پسگءِ “زورانسری بیگواہی”ءِ جیڑہءِ آماچ بیت ، ءُ آئیءِ کھول آئیءِ بیگواہیءِ ھلاپءَ دگ ءُ راھانی سرءَ در کپ ایت ، ریاستءُ آھانی ادارہانی سرءَ مھلوکی زورے سرءَ دنت گڑا باز وھداں ریاست چہ ھمیش مھلوکی ردعمل ءِ ترس ءَ ھما کھولءِ زورانسری بیگواہ کتگیں مردماں یلا دنت۔ بلے پدا ھمیش گندگ بوگءَ انت کہ چوشیں جاوراں یلا داتگیں مردماں پدا جتائیں شکلاں ٹارگٹ کنگ ءُ شہید کنگ ءَ اِنت ، چہ ایشی ءَ ابید پاکستان ءِ دگہ کوھنیں پالیسی یے ھم ھست انت کہ بلوچ ءِوانندگیں ءُ زانتکاریں مردماں گچین بہ کن ءُ شہید بہ کن۔ ھمے نوکیں پالیسی ءِ ردءَ تہنا ھمے گوستگیں دو ماہ ءِ تہءَ چہ ھشت ءَ گیش بلوچ پسگ شہید کنگ بوتگ۔

​​​گوستگیں روچ ءَ ھمے تربت شہر ءَ زورگیریں پاکستان ءِ چیریں ادارہانی سپاہیگاں بلوچ ءِ وانندہ ءُ زانتکاریں پسگ اللہ داد ء واحد گمشاد ہوٹل ءَ تیر جتگ ءُ شہید کتگ ۔ اللہ داد ءَ کراچی یونیورسٹی ءَ چہ بُندپتر(تاریخ ) ءِ تہ ءَ گریجویشن کتگ ءُ اے وھداں اسلام آباد ءَ ایم فل کنگ ءَ بوتگ ،ءُ چریشی ءَ ابید اللہ داد وانگ ، نبشتکاری ، رجانک کنگ ءُ کتاب چاپ ءُ شنگ کنگ ءِ پڈءَ باسمائیں مردمے بوتگ۔ داد بلوچ چاگرد ءِ وانندہ ءُ سرپدیں مردماں چہ یکیں بوتگ پمیشکہ ما سرپد بئیں کہ بلوچ ءِ دژمن بلوچ چاگرد ءِ وانندہ ءُ سرپدیں مردماں اوپار نہ کنت ءُ آھاں وڑے نہ وڑے ءَ تاوان دنت ءُ ھمے وڑءَ شہید کنت ۔ اللہ داد ءِ وڑیں وانندہ ءُ سرپدیں بلوچ پسگانی شہید کنگ ءِ دژمن ءِ مول ءُ مراد ھمیش اِنت کہ بلوچ چاگرد وانندگیں ءُ زانتکاریں مردماں چہ زبہر کنگ ءُ سَنٹ کنگ بہ بیت ۔

آیاں گوشتگ ​​انوں گوستگیں دو ماہ ءَ اللہ داد ءِ ویل ءَھوار مکران ءِ جتاجتائیں دمگاں ھوار سرجمیں بلوچستان ءَ ھشت بلوچ پسگ ھمے وڑ شہید کنگ بوتگ ،کہ آھانی نام چوش اے وڑءَ اَنت:30نومبر 2024ءَ ماں آواران ءَ فقیر جان ء سید محمد ، عصا بلوچ ء نوردین شہید کنگ بوتگ انت، اے دوئیں بلوچ پسگ پاکستان ءِ زندان ءَ بندیگ بوتگ اَنت ، فقیر جان 26ستمبر 2024ءُ عصا بلوچ 17فروری 2023ءَ پاکستان ءِ زالمیں پوج ءَ گار ءُ بیگواہ کتگ اَنت ءُ پدا شہید کتگ اَنت ۔ 27دسمبرءَ ماں تمپ ءَ ظریف ءِ اومر گار ءُ بیگواہ کنگ ءَ رند سک بے دردی ءَ گوں لٹ ءُ کٹ کنگ بوتگ ءُ شہید کنگ بوتگ۔ ھمے ڈولءَ 11جنوری ءَ ماں گوادر ءَ زکریابلوچ شہید کنگ بوتگ ، زکریا 27ستمبر 2024ءَ گار ءُ بیگواہ کنگ بوتگ ءُ چیزے وھداں پد یلہ کنگ بوتگ ءُ 11جنوری ٹارگٹ کنگ ءُ شہید کنگ بوتگ۔11جنوری ءَ زہری خضدار ءَ پاکستان ءِ پوج ءَ پوجی زوراکی ءِ نیام ءَ یک 16سالی ورنا یے شہید کتگ ۔ ھمے وڑیں یک دردناکیں ویلے 12جنوری ءَ بوتگ ، افضل منظور 10دسمبر 2024ءَ پاکستان ءِ پوج ءَ چہ آپسر تربت ءَ زورانسری گار ءُ بیگواہ کتگ ، ھما اولی روچ ءَ افضل ءِ کہول ءِ مردم زہرشانی کنگ ءَ بوتگ اَنت بلے 12جنوری ءَ افضل منظور گوں بمب ءَ تراکینگ ءُ شہید کنگ بوتگ ءُ اے ویل ءَ رند دژمن ءِ پولیس ءُ پوج ءَ بیان داتگ کہ افضل منظور بمب تراک ءَ کشگ بوتگ ، بلے اے گپ ءَسرجمیں کیچ شاہد اِنت کہ افضل 10دسمبر ءَ گار ءُ بیگواہ کنگ بوتگ ءُ پاکستان ءِ ٹارچر سیل ءَ بند بوتگ ءُ آئی ءِ کہول ءِ مردم یکشل ءَ زہرشانی کنگ ءَ بوتگ اَنت۔ ھوشاپ زیروپوائنٹ ءَ گار ءُ بیگواھیں مردمانی کہول ءِ نیمگ ءَ برجاھیں نندانک ءَ ریاستی دلاراں وتی گاڑی ھمے مہلوک ءِ سرءَ گوازینتگ آئی ءَ چہ جہانزیب نامیں ورنا یے ٹپی بوتگ ءُ 14جنوری جہانزیب شہید بوتگ۔ 25جنوری ءَ ماں مشکے ءَ پنڈوکےسومار پاکستان ءِ فوج ءَ دگہ دو مردم ءِ ھواری ءَ گپتگ لٹ کٹ کتگ ءُ پدا شہید کتگ ءُ آئی ءَ چہ آ دگہ دوئیں ھمبراہ یلہ کنگ بوتگ اَنت ۔ ھمے وڑ 4فروری ءَ اللہ داد ءِواحد ماں گمشاد ہوٹل تربت ءَ تیرگواری کتگ ءُ شہید کتگ ۔

آیاں گوشتگ ​​​بلوچ یکجہتی کمیٹی ھمے سرپد بیت زورگیریں ریاست پاکستان ءَ بلوچ چکچینی شوربندی ءِ تہ ءَ مٹ ءُ بدلی آؤرتگ ءُ نوکیں داب ءَ بلوچ پسگاں جنگ ءُ کشگ ءَ اِنت ءُ اے عمل ءَ چہ زانگ بیت پاکستان بلوچ چکچینی ءِ تہ ءَ تیزی آرگ ءَ اِنت ۔ ما بلوچ چکچینی ءِ اے نوکیں شوربندی ءِ ھلاپ ءَ ھچ وڑھاموش نہ بئیں ءُ ما بلوچ مہلوک ءَ گوں ھمے دزبندی کنیں کہ وتی مردمانی کوش ءِ ھلاپ ءَ ھچ وڑ ءَ ھاموش مہ بئے ، ما ھمنچو ھاموش بئیں اے ریاست ھمنچو گیش مئے مردماں جنت ءُ شہید کنت ۔

آیاں گوشتگ ​بلوچ یکجہتی کمیٹی بلوچ پسگانی جنگ ءُ کشگ ءِ ھلاپ ءَ ما تربتءَ9فروری داں 11فروری ءَ شہید فدا چوک ءَ سئے روچ ءِ یک زہرشانی کیمپے جنت ءُ آئن لائن مراگش کنت ۔ ما شہید بوتگیں بلوچ پسگانی کہول ءُ سرجمیں کیچ ءِ مردماں گوں دز بندی کنیں کہ اے سئے روچ ءَ بیااَنت کیمپءَ بہر بزور اَنت ءُ اے بلوچ پسگانی کوش ءِ ھلاپ ءَ توار چست بہ کن اَنت ۔