بیا گلامی ءِ سانکلاں پروش دئیں
(سرمچارے ءِ دپتر ءِ دومی تاکدیم )
نبشتہ کار: سنگت نورک
دی بلوچستان پوسٹ
آئی بازیں کوکاراں چہ واب ءَ بُست کرت ءُ چم ئِے کِچینت اَنت ءُ ھیران اَت مرچی مھلوک پرچا کوکار ءَ اِنت ۔ آئی دروازگ ءِ پچ کنگ ءَ پیسر کَش ءِ ایریں گوانکو ءِ کُبل پَچ کرت وھد چار اِت شپ ءِ یک بج ءُ نیم اَت ۔ تیرماھیں شپ اِت اَنت ءُ مرچی ئیں شپ انچو تھار اَت پورا انسان ءِ وَرگ ءَ ساڈی اَت ۔ آئی ءَ ھِچ کار نیست اَت تھنا نِشت ءُ نبشتہ ئِے کرت بلکیں آ یک نبشتہ کارے اَت ، آئی ءَ وڑ وڑیں راستی وتی نبشتانکانی تہ ءَ نَکش کُرت اَنت ۔
آئی ءِ لوگ چہ مات ءِ لوگ ءَ کمو گِستا اَت ءُ مدام وتی لوگ ءَ تھنا وَپت ۔ آئی وھد چارگ ءَ پَد گوانکو کَش ءِ کیسگ ءَ کُرت ءُ دیم پہ دروازگ ءِ پچ کنگ ءَ رَھادگ بوت ۔ دروازگ ءِ پچ کنگ ءَ پیسر یکبرے دل ءَ ئِے گُشت کہ بیرہ بہ کنت ءُ پد ءَ بہ وپس اِیت بلے دروازگ ءِ چَپّیں چانٹ ئِے پچ کُرت تہ آئی ءَ چے نہ دیست ؟ مات سردرا اَت براس ءِ دستے گپتگ ات ئِے ءُ زار جنگ ءَ اَت ءُ براس ءِ دومی دست یک زور ءَ پُرّیں پوجی یے ءَ گِپتگ اَت ءُ براس ءَ دیم پہ گاڈی ءَ برگ ءَ اَت ، گھار لوگ ءِ دیم ءَ چہ بازیں زار جنگ ءَ تُستگ ءُ کپتگ اَت ، دل ءِ دِریکگانی توار ئِے زمین ءُ آزمان ءَ ٹُکّر ٹُکّر کنگ ءَ اِت اَنت ۔ مھلوک تیوگ ءَ مُچّ اَت لھتیں ھاموشی ھمے نِدارگ ءَ چارگ ءَ اَت ءُ لھتیں گوانکوانی تہ ءَ ھمے نِدارگ ءَ درپ کنگ ءَ اَت ۔
آئی ھم بے سُدّی باریں چے کوکار کُرت ءُ دیم پہ براس ءَ تچان بوت ۔ ھمے بیستیں گام کہ پیسر پرائی ھچّے نہ بوتگ اِت اَنت بَلے مرچی آئی ءِ ھرچ گام پورا دہ گام ءِ برابر ءَ اَت ، آئی اے گامانی گوازینگ ءُ پہ براس ءَ زوت سر بیگ ءِ ھاتر ءَ چُنت توان جَت ، آئی ءِ دل دِریکگ ءَ اَت ، آئی جُھد کرت کہ ھرچ گام ءَ چہ دومی گام تیزتر بہ بیت ۔ آ ھمینچو کہ پہ براس ءَ سر بہ بیت پیسر پوجیاں براس گاڈی ءَ مان کرتگ اَت ءُ گوں آئی ءِ رسگ ءَ گاڈی رھادگ بوت ۔
آ مرچی چَٹ نا وَس اَت ، گُھار لوگ ءِ دپ ءَ کپتگ اَت ءُ ماس ءِ سر آئی ءِ کُٹ ءَ ایر اَت ءُ ماس زور زور ءَ زار جَنَگ ءَ اَت ۔ آئی ءِ اَرساں زمین ءِ دلبند تَر کُرتگ اَت ۔ زمین کہ مِھرانی دَرگاہ اِنت مرچی ھاموش اَت ءُ ھمے اوشتاتگیں مھلوک ءَ یک پہ یک ءَ چارگ ءَ اَت ۔ مھلوک ھم نو یک یک ءَ جنزان بوت ۔ نو بس آ ، آئی ءِ تستگیں گھار ، مات ءُ آئی ءِ کماشیں ناکوے کہ انگت ھمود ءَ ساڈی اِت اَنت ۔
ناکو ءَ آئی ءِ گُھار چِست کرت ءُ لوگ ءَ بُرت ءُ آئی ءَ ھم تُستگیں دلے مات زرت ءُ دیم پہ لوگ ءَ رھادگ بوت ۔ مرچی لوگ پورا جھندم ءَ کم نہ اَت ، اے ھما لوگ اَت کہ زیک لالا ھمد ءَ اَت ، کندگ ءُ مسکرا کنگ ءَ اَت ، ھما لالا کہ مات ءَ پَرائی مزنیں واب دیستگ اَت بلے مرچی ھمے لوگ ءِ کُلیں مردم یک نگیگیں جاورے ءِ آماچ اِت اَنت ۔ انچیں جاورے ءِ آماچ کہ چٹ نا وس اِت اَنت ، آیانی دست ءَ ھچ نہ بوت ۔
شپ ءِ بے وابی ءَ پَد سُھب ءَ مات ءَ باریں چونیں دلے زرتگ اَت ءُ چُک ئِے زرت اَنت دیم پہ شھر ءِ مزن دگ ءِ بند کنگ ءَ شُت ۔ آ ھم ماس ءِ ھمراھی ءَ گون اَت گوں ، نہ تُرسگ ءَ اَت ، دگ ءِ میان ءَ اوشتاتگ اَت ، مھلوک ءَ سکین دیگ ءَ اَت ءُ انگت مھلوک ءَ گیشتر توانتر کنگ ءَ اَت ۔ آ مھروانے اَت بلے چٹیں ھاموشیں مردمے اَت ، مرچی اولی رند اَت کہ مھلوک آئی ءَ را چوش گپ کنگ ءَ گندگ ءَ اَت ۔ آ گپ کنان اَت ءُ دل ءَ مُجّتی جیڑگ ءَ اَت کہ پیسر آ ھم ھاموش بوتگ ، ھرچ کسّے کہ پوج ءَ بُرتہ گڑا آ ھم ھما مھلوک ءَ ھوار ھاموشی نِدارگ چارگ ءَ بوتگ ، آ ھم آ دگرانی وڑ ءَ ھچبر دگ ءِ بند کنگ ءَ بیگواھیں مردمانی کھولاں گوں نیاتکگ بلے مرچی آ وت ھم ھمے مرز ءِ آماچ اَت ۔
بزّگی ، اَزابی ، بے وَرگی ، لٹ شاپ ، دُژمان ءُ دگہ بازیں چیزے آئی ءَ مرچی اولی رند اَت کہ گندگ ءَ اَت بلے انگت چو کوہ ءَ براس ءِ آجوئی ءِ واستا اوشتاتگ اَت ۔ بہ گِند ئے آ نبشتہ کار یک جتائیں کِسّھے نبشتہ کنگ ءَ اَت یک انچیں کِسّھے کہ آئی ءِ تہ ءَ کوکار ، گریوگ ، لٹ شاپ ءُ بزّگی ءَ ابید دگہ ھچ نیست اَت ، آ کِسّہ یک راستی یے اَت ، یک تھلیں راستی یے ۔
دو ھپتگ ءِ برجمیں بازیں دگ بند کنگ ءُ روانکاں پد پولیس ءَ آئی ءِ براس ءِ یلہ کنگ ءِ جار جَت ءُ مرچی آ سک گَل اَت انچوش گَل کہ وھدے یک گُژنگیں مردمے ءَ را سیر ءَ ورگ بہ دے ئے آ چہ بازیں گل ءَ پیسر ءِ گژنگی ءِ درداں بیھال بہ کنت ، آ ھم مرچی انچوش گَل اَت ۔
آئی ءَ ماس زرت دیم پہ تھانہ ءَ شُت ، بازیں کاگدانی سر ءَ دزنشان گرگ بوت ، آئی ءِ برات آرگ بوت ، ماس ءَ وتی زھگ ءِ سر چُک اِت ءُ کُلیں مردم سک گَل اِت اَنت ، آ دیم پہ لوگ ءَ جنزگ ءَ اِت اَنت انچوش کہ چہ تھانہ ءَ در آتک اَنت گھار ھم رستگ اَت ، بیگواہ بوتگیں براس تچان بوت دیم پہ گھار ءَ ھمینکس ءَ کہ گھار ءَ گلائیش بہ کنت ءُ گھار ءَ ھم دست ٹال کُرت اَنت کہ براس ءَ گلائیش بہ کنت بلے پیسر تیرانی توار بوت گھار ءِ پادانی بُن ءَ براس ءِ لاش ترپل بوت ۔
مھروان، ھما ھاموشیں نبشتہ کار مرچی یک سرمچارے ، انو من ءُ ھما نبشتہ کار کوھے ءِ ٹُل ءَ نشتگ ایں ، آئی بالاد مدام پہ جنگ ءَ ساڈی اِنت ، آ اے دژمن ءَ چہ رگ ءُ روتگاں سندگ لوٹ ایت ۔
آ مدام کسہ کار اِیت ءُ من ءَ پنت دنت ، انو اے ساھت ءَ کوہ ءِ ٹُلّ ءَ نشتگ ءُ گوں بلوچستان ءَ گپ ءَ اِنت کہ اَے زیبائیں بلوچستان اگاں زمین جمب بہ بیت ، اے برز ءِ نیلیں آزمان سیاہ سیاہ بہ بیت ، جبین بُر ءُ ترندیں گواتے کشگ ءَ بہ بیت ، من ٹپّی بہ باں ، تنیگ بہ باں ، گژنیگ بہ باں ، بلے اَے ماتیں گلزمین من تاں گڈّی تیر ءَ پہ ترا گوں دژمن ءَ جنگ دیاں ، دژمن ءِ واب ءَ ھرام کناں ۔
مھروان آ یک نہ ترسیں جنگولے ، وھدے آ جنگ ءَ ایرکپ ایت گڑا ھیروپ بیت ، سیاہ ءُ ترندیں گواتے چیزاں چست ءُ ایر کنت ، آزمان سیاہ سیاہ بیت ، چہ آئی ءِ بیم ءَ دژمن ءِ ارواہ پیسر چہ جان ءَ سِندیت ۔
مھروان ، مھروان! بَلے انّو اے ساھت ءَ آ منی دیم ءَ اِنت پاد ءَ تیرے وارتگ ئِے ءُ چہ بازیں ھون ءِ رچگ ءَ سک ناگیگ اِنت ، دژمن ھم دُمب ءَ گون اِنت گوں ، آ درایگ ءِ وڑ ءَ نہ اِنت بلے انگت ھم آ بچکندگ ءُ مارا سکین دیگ ءَ اِنت ۔
مھروان ، مھروان! آئی ءَ وتی توپک ءِ نل وتی گُٹ ءِ چیر ءَ ایر کرتگ بلکیں آ اے ساھت یا آ ساھت شھیدے زانگ بہ بیت ، بلوچستان ءِ ھر کنڈ ءَ آئی ءِ جنگانی بوہ تالان بیت ءُ ھرچ ورنا آئی ءِ سپر ءَ دیما بران کنت ۔
مھروان! انو کہ آ منی دیم ءَ ایر اِنت آئی ءَ گڈی تیر ءِ پلسپہ ایربُک اتہ ءُ نو دل نہ گش اِیت کہ یلہ ئِے بہ کناں بلے نو من دیم پہ دگہ منزلے ءَ جنزگ ءَ آں بلے مھروان زان ئے آئی ءِ بچکند انگت آئی ءِ لنٹانی سر ءَ تَرپّل اَنت
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستانپوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت-