گوستگیں سَے روچ پیش ماں زاھدان ءَ ایرانی لشکر ءِ دست ءَ دزگیر کنگ بیتگیں گمشاد زئی ٹک ءِ سروک سردار حاجی حمید مروچی یل کنگ بیتگ-
گمشاد زئی ٹک ءِ سروک سے روچ پیش ماں روکپتی بلوچستان ءِ بنجاھی شھر زاھدان ءَ آمیدگس ءَ جتگیں بھتامانی سپاھی ءَ پیش بوگ ءَ بیتگ کہ آ اود ءَ دزگیر کنگ بیتگ-
سردار حمید ءِ دزگیری ءِ ھلاپ ءَ روکپتی بلوچستان ءِ سیاسی ءُ مزھبی مھلوک ءَ ایران ءِ سرکار ءِ سر ءَ ترندیں ایراد ءُ آئی ءِ یل کنگ ءِ لوٹ کتگ –
سردار حاجی حمید گمشاد زئی ءِ دزگیری ءِ ھلاپ ءَ زاھدان ءِ لھتے جاھاں مھلوک ءَ گوستگیں روچ ءَ زھرشانی ھم کتگ-
زانگ بہ بیت لھتے روچ پیش سردار حاجی حمید ءِ براتزتک ایرانی لشکر ءِ تیرگواری ءَ بیران بیتگ ات ءُ آئی ءِ نماز جنازہ ءِ سر ءَ سردار حمید گمشاد زئی ءَ ایرانی سرکار ءِ سر ءَ ترندیں ایراد گپتگ بیتگ ءُ چریشی ءِ بنیاد ءَ آ آمیدگس ءَ تلب کتگ ءُ پد ءَ دزگیر کتگ-