گوادر، ھُزدار ءُ ھاران ءَ شش مردم پاکستانی پوج ءِ دست ءَ بیگواہ

بلوچستان ءِ دمگ چہ گوادر ، ھُزدار ءُ ھاران ءَ پاکستانی پوج ءَ شش مردم آوار جنگ ءَ پد ناشناسیں جاھے ءَ برتگ اَنت-

گیشیں ھالانی رِد ءَ ھُزدار ءِ دمگ زھری ءَ چہ مروچی پاکستانی پوج ءَ بیڑبرگ میان ءَ سے دکاندار آوار جتگ اَنت آئی ءِ دست ءَ اِنت-

وئیل ھلاپ ءَ انجمن تاجران ءِ نندانک تھانہ دیم ءَ برجاہ ءَ اِنت-

ھمے وڑ زی مگرب وھد ءَ پاکستانی پوج ءَ ھاران کلی سراوان ءَ دو ورنا عاصم قمبرانی ء محمد یعقوب قمبرانی ءُ بلاول قمبرانی ء محمد اقبال آوار جتگ ءُ ناشناسیں جاھے ءَ برتگ – آیانی درگت ءَ گْوشگ بیگ ءَ اِنت کہ دوئین ھاران دمگ سراوان ءِ جھمنند اَنت-

اشی ءَ اَبید ھم اے گوشگ بیگ ءَ اِنت کہ دوئیں ورنا سیزدہ ءُ چاردہ ءِ اُمر ئیگ اَنت- اے وھد ءَ دوئیں ورنا شال ءَ وانگ ءَ اَنت ءُ زانشتی ادارھانی موکلانی درگت ءَ وتی دمگ ءَ اتکگ بیتگ- گوشگ بیگ ءَ اِنت کہ زی بیگاہ ءِ وھد ءَ دوئیں بچک شھر ءَ چہ وتی کلی سراوان ءِ نیمگ ءَ روگ ءَ بیتگ اَنت کہ پاکستانی پوج ءُ چیریں ادارھانی کارندھاں آوار جتگ ءُ بیگواہ کتگ اَنت-

ھمے وڑ گوستگیں روچ ءَ تیاب دپی شھر چہ گوادر ءَ کُلانچی میتگ ءَ پاکستانی پوج ءُ چیریں ادارھانی کارمنداں یک مردمے آوار جتگ ءُ بیگواہ کتگ-

آوار جنگ ءُ بیگواہ کنگ بیتگیں مردم ءِ پجّار حفیظ ء حاجی روزیگ جھمنند دشت ھسادیگ نام ءَ چہ بیتگ-

زانگ بہ بیت کہ حفیظ ء مستریں برات ستار دو ماہ ءَ پیش پاکستانی پوج ءَ چہ گوادر ءَ آوار جتگ کہ انگت بیگواہ ءَ اِنت-