کیتھارینابلوم ءِ گاریں اِزت
گدار(ناول)
نبشتہ کار: ھائنرش بول
رجانکار: شاھد اھمد
دی بلوچستان پوسٹ
سیمی بھر
اے کسہ ءِ اولی راستی دل ءَ تراکین اِیت۔ 2 پروری 1974ء ءَ کارنول ءِ بنداتی موہ ءِ یک 27 سالی جنینے، ساھت شش ءُ 45 منٹ ءَ شھر ءَ چہ وتی اوتاک ءَ یک سنگتے ءِ لوگ ءَ ناچ ءُ گانا پارٹی ءَ لوٹگ بوتگ اَت ھمود ءَ شُت، چار روچ ءَ پد ڈرامائی جاور بوت کہ منی گور ءَ بیان کنگ ءَ گال اوں نیست، ھما روچ، بزاں یکشمبے ءِ بیگاہ ءَ(ھپت ءُ چار منٹ) آئی ءَ جرائم کمشنر والٹر موئڈنگ ءِ لوگ ءِ گنٹھی جَت۔ وھدے کہ ھما دمان ءَ وھدے جرم کنوک ءَ وتی اسلی دیم ءُ چھرگ چیر داتگ اَت شیک ءِ شِکل ءَ وتی پارٹی ءِ تہ ءَ ھمگرنچ کتگ اَت، آئی ءَ ھیران ءُ ابّکہ موئڈنگ ءَ گُشت ئِے کہ آئی ءَ دوازدہ ءُ پانزدہ ءِ ساھت ءَ ھالتاکی رپورٹر ءَ را ورنر نونگیس ءَ وتی اپارٹمنٹ ءَ تیر جتگ ءُ کُشتگ، نوں کمشنر مھربانی بکن کہ ھکم بدے کہ آئی ءَ اوتاک ءِ دروازگ ءَ بہ پروش رپورٹر ءِ جون ءَ چموداں در بکن۔ آئی ءَ اے ھم گْوشتگ اَت کہ دوازدہ ءُ پانزدہ ءَ بگر داں ھپت ءِ وھد ءَ آ شھر ءَ چکر اِتگ ءُ ھمے پریشانی ءِ کم کنگ ءَ بوتگ کہ آ مارگ ءَ اَت، گیش ھمے دزبندی کتگ کہ
آ دزگیر کنگ بہ بیت پرچاکہ آئی ءَ ھم اود ءِ روگ ءِ جُھد کتگ اَت کہ اود ءَ آئی ءِ مھروانیں لڈدگ اِنت۔
موئڈنگ ءَ را پٹ ءُ پول ءِ وھد ءَ ھما ورنائیں جنین ءَ پَھمگ ءِ موہ رَستگ اَت ءُ ھمے سبب ءَ آ ھم آئی ءِ ھمدردی کنگ ءَ اَت۔ ھمے واست ءَ وھدے آئی ءَ اے بیان دات گڑا آئی ءَ آئی ءِ راستی ءِ کمو ھم شک ئِے نہ کُت۔ آ آئی ءَ را پولیس ءِ موٹل ءَ پولیس ھیڈکوارٹر ءَ بُرت ئِے ءُ وتی مستریں اپسر، چیپ کمشنر، بائز مینے ءَ آئی ءِ بابت ءَ ھال دات۔ جنین ءَ را زندان ءَ دیم دیگ بوت۔ آ ءُ بائز مینے پانزدہ منٹ ءِ تہ ءَ آئی ءِ اپارٹمنٹ ءَ سر بوت۔ وھدے پولیس کمانڈوز ءَ دروازگ پروشت ءُ اپارٹمنٹ ءِ تہ ءَ پُترت گڑا آئی ءَ آ جنین ءِ بیان ءِ راستی دیست۔ ما نہ لوٹیں کہ ھمے موہ ءَ ھون ءِ بابت ءَ چیزے بگوش اِیں۔ ایشی ءِ واست ءَ ما مھلوکاں ھمے گْوش اِیں کہ آ وتگند(ٹی۔ وی) ءُ تامرانی تہ ءَ ھما ھونی جاور ءَ شری ءِ سر ءَ دیست کنیں۔ ھو بلے ما آئی ءِ دلگوشی ءَ چہ سُھریں رنگ ءَ بوتگیں سان ءِ نیمگ ءَ زلور پیش کنیں۔ مرد نونگیس یک نیزگاریں شیکے ءِ گُد ءِ پوشاک ءَ ھمگرنچ اَت کہ چہ کوھنیں گُدے ءِ تیار کنگ ءَ اَت۔ اِسپیتیں پوشاکے ءَ ھون ءِ نشان کہ ٹپ پِر اَت اِش ایشی ءِ بارو ءَ سجھیں سرپد اِت اَنت۔ اس ءَ پستول ءَ ھما کار کُتگ اَت کہ آئی ءَ اسپری توپک ءَ بیتگ۔ آئی ءِ پوشاک وھدے چہ بلاھیں، اسپیتیں چادرے جوڑ بوتگ اَت، ھونانی ترنز اتگیں داگانی سبب ءَ زاھر اَت کہ آئی ءَ را نوکیں اکسکاری یا آرٹ ءِ نمونہ گوشگ بیت یا چہ ھمے وسّاچ(اسکیچ) ءَ گْوشت کنیں ءُ وھدے اسٹیج ءِ سر ءَ ازمگری ءِ وڑ ءَ کارمرز بیت۔
کمو وھد ءِ واست ءَ ھمے پرز کُتگ اَت کہ پریس اکس گراپر شونر، چارشمبے ءِ روچ ءَ شاتکامی بوھوکیں شھر ءَ مگربی جنگل ءَ یک جونے دست کپتگ اَت، بوت کنت آ ھم بلوم ءِ شکار بہ بیت، بلے رند ءَ جاور ءِ وھد ءُ پاس گندگ بوت گڑا ھمے شک رَد کنگ بوت، پٹ ءُ پول ءِ وھد ءَ یک ٹیکسی ڈرائیورے ءَ گْوشت کہ شونر، وھدے یک شیکے ءِ پُچ ءُ پوشاک ءَ گندگ بوتگ اَت، ءُ یک جنینے، کہ ھسپانوی پوشاک ءَ اَت، آئی ءَ اے دوئیں جنگل ءِ نیمگ ءَ بُرتگ اَت۔ نونگیس ءَ دو بج ءِ یکشمبے ءِ روچ ءَ تیر جَتگ اَت ئِے، وھدے شونر چارشمبے ءَ کُشگ بوتگ اَت۔ وھدے اوزار مُرتگیں نونگیس ءِ گور ءَ دست کپتگ اَت، اے ممکن نہ اَت کہ چہ ھمیشی ءَ ھم شونر کشگ بہ بیت۔ ھمے جیڑہ ءَ چنکیاس ساھت ءَ بلوم ءِ سر ءَ کوش ءِ شک اَت، ھمے واست ءَ گپ ھاس اَت کہ کوش ءِ پُشت ءَ الّم مکسد گندگ بوگ ءَ اَت۔ وھدے آ ٹونگیس ءَ لھتے سَوَب ءِ بنیاد ءَ بیر ءِ نشانگ کُتگ اَت ئِے، گڑا ھمے بنیاد ءَ آ چہ شونر ءِ ھم بیر گپتگ اَت ئِے۔ بلے رَند ءَ پولیس ءَ وتی رَدی مَنّ اِت بلوم ءِ کر ءَ دو آلات کوش نہ بوتگ اَت۔ بلوم کوش ءَ پد آسودگ ءُ ھاموش اَت۔ وھدے آئی ءَ جُست ئِے کُت کہ زاناں آئی ءَ ھم بلوم کُشتگ؟ گڑا آئی ءِ جواب یک لُکّیں جُستے ءِ شکل ءَ اَت”ھو“ من جیڑ آں کہ گڈی ءَ آئی ءَ پرچا اِنّا؟“ ایشی ءَ چہ پَد پولیس ءَ آئی ءَ شونر ءِ کوش ءِ بابت ءَ ھچ شَک نہ بوت۔ ایشی ءَ چہ ابید پٹ ءُ پول ءَ رَند آئی ءِ اد ءِ نہ بوگ ءَ ھم سابت بوتگ اَت کہ چمیشی ءَ نہ منّ ممکن نہ بوتگ اَت۔ پد ءَ اے ھم کہ چہ کیتھارینا بلوم ءَ پجّاروک اَت یا آئی ءِ پٹ ءُ پول ءِ ساھت ءَ چہ آئی ءِ کردار ءَ آگاھی بوتگ اَت، آئی ءَ یکین اَت کہ اگاں آ اے بہ کُشتیں گڑا ھمے جرم ءَ را ھم منّ اِتگ اَت ئِے۔
چوناھا آ ٹیکسی ڈرائیور کہ آئی ءَ ھمے جوڑ ءَ جنگل ءَ رَسینتگ اَت، آئی ءَ ھم بلوم ءَ اکس ءِ وسیلہ پجّار نہ بوتگ اَت” اللہ ءِ جَنگ اِنت“ آئی ءَ درّائینت ءُ گُشت ” اے ناسی ئیں مُید والا پَنچ پُٹ پَنچ اِنچ ءُ پَنچ پُٹ ھشت اِنچ ءِ شررنگیں جنکانی, آیانی کساس اُمر چہ بیست ءُ چار ءَ ءُ بیست ءُ ھپت سال بہ بنت، کارنول ءِ موہ ءَ چوشیں جِنک ھزارانی ھساب ءَ بہ اَنت۔“ شونر ءِ اوتاک ءَ ھم بلوم ءِ بابت ھچ چیز دست نہ کپت ءُ ناں کہ چوشیں چیز چہ آ ھسپانوی جنین ءَ چُشیں نشان بہ رس اِیت۔ شونر ءِ سنگتاں بس ھمنچو ھال اَت کہ چارشمبے ءِ دو بج ءَ، ھما شرابجاہ ءَ چہ اے گُشت ءُ شُت داں کہ آئی ءَ را کارے ھست۔
کارنول ءِ چہ سنگتاں یکے شمپن اَت ءُ شراب ءِ تاجرے اَت، آئی ءَ آئی ءِ سر ءَ پَھر اَت کہ آئی ءَ دوبر کارنول ءِ شاتکامی بندات کُت۔ آئی ءَ اے اِش کُت بروسہ بوت کہ ھمے دوئیں جرمانی بابت ءَ مردماں دوشمبے ءُ چارشمبے ءِ روچاں ھال رَس اِت۔ اگاں چُشیں کِسمیں ھال موسم ءِ بندات بوگ ءَ پیسر شاھگان بہ بیت گڑا اے کارنول ءِ وشبو ءُ کاراں سان دے اَنت۔ اگاں اے مالوم بہ بیت کہ پینسی گُد پہ جُرم ءَ کارمرز بوتگ گڑا چہ ایشی ءَ مردمانی تَب ھراب بنت۔ چوشیں رنگیں گپ، درگواچن سجّھیں وشیاں ھلاس کن اَنت، جْوانیں وھد ءِ گْوزگ ءُ چہ وشی ءُ شاتکامی ءِ گوازینگ ءِ واست ءَ باور ءُ وت مَنّی ءِ زلورت اِنت، ءُ ھمے ھما چیز اِنت کہ آئی ءِ وشیانی سر ءَ اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت-