مشھد ءَ بندیگیں دو بلوچ زی سے شمبے سُھب ءَ پاھو دیگ بیتگ انت ءُ ھمے ڈول ءَ روکپتی بلوچستان ءِ بنجاھی شھر زاھدان ءَ بندیگیں بلوچے پاھو دیگ بیتگ۔
گوستگیں لھتے روچانی میان ءَ پاھو دیگ ءِ وئیل گیش بیتگ اَنت کہ آیاناں جتا جتائیں بھتاماں ایرانی آمیدگس ءَ پاھو ءِ سزا داتگ انت-
پاھو دیگ بیتگیں مردمانی پجار مھمود ء رسول ءُ مھمد رزا سپری ھر دو ھسین اباد(زابُل) ءِ جھمنند اَنت۔
ھالانی رد ءَ اے مردم چار سال پیسر ءَ پَجّی ءَ مشھد ءَ نشئہ ءِ باپاری بُھتام ءَ دزگیر بوتگ اِتاں ءُ ھمے شھر ءِ آمیدگس ءَ پیش کنگ ءَ پَد اِشانی سر ءَ پاھو ءِ سَزا جَنَگ بوتگ اَت۔
ھمے ڈول ءَ سَے پیش زاھدان ءَ گرگ بیتگیں یک بندیگیں بلوچے پاھو دیگ بیتگ-
پاھو دیگ بیتگیں مردم ءِ پجار یعقوب ء خدا بخش ءِ نام ءَ زانگ بیتگ-
چِد ءُ پیش دو ھپتگانی توک ءَ یزد ءُ کھنوچ ءَ روکپتی بلوچستان ءَ بندوکیں مردم پاھو دیگ بیتگ اَنت ، ھمے دو ھپتگاں پاھو دیگانی کساس شش ءَ سر بیتگ اَنت-