بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں بیانے ءَ گْوشتگ کہ بی ایل اے ءِ سرمچاراں نوشکی ءَ قادر آباد ءَ کبزہ گیریں پاکستانی لشکر ءِ کاروان ءِ سر بستگ ءُ اُرش ءِ نشانگ جوڑ کتگ کہ ایشی ءِ آسر ءَ کبزہ گیریں لشکر ءِ کساس دہ کارندہ مرتگ انت۔ وھدیکہ بی ایل اے ءِ دو تجربہ کاریں کمانڈراں اُرش ءَ پد دژمن ءِ لشکر ءِ گون ءَ دراجیں جنگے ءِ وھد ءَ گوں دلیری ءَ جنگ کتگ ءُ شھید بوتگ اَنت۔
جارکش ءَ گْوشتگ گوستگیں روچ ءَ ساھت 12 ءِ نزیک ءَ بلوچ لبریشن آرمی ءِ سرمچاراں نوشکی ءَ چہ پنچ کلومیٹر دور قادرآباد ءَ کبزہ گیریں پاکستانی لشکر ءِ یک کاروانے ءِ سر بستگ ءُ اُرش کتگ کہ ایشی ءِ تہ ءَ دژمنیں لشکر ءِ 10 سپاھیگ مرتگ انت ءُ کم چہ کم چار ٹپی بوتگ اَنت۔
آئی ءَ گْوشت کہ بلوچ لبریشن آرمی ءِ دو ھمراھیں سرمچار عدنان بلوچ ءُ یاسر بلوچ ءَ کبزہ گیریں لشکر ءِ ھلاپ ءَ دراجیں جنگے ءَ گوں تمردی ءَ ماتیں گلزمین ءِ رکینگ ءِ وھد ءَ شھید بیتگ انت۔ شھید عدنان بلوچ دژمن ءِ تیر ءَ ٹپی بوتگ بلے آئی ءَ ٹپیگیں جاوراں ھم وتی جاہ یل نہ داتگ ءُ یک کلاکے ءَ گیش دژمن ءِ لشکر ءَ گوں جنگ داشتگ ءُ وتی یونٹ ءَ را واتر بوگ ءِ ایمنیں راہ داتگ۔
جارکش ءَ گُشتگ کہ کبزہ گیریں پورسز ءِ سر ءَ اے اُرش ءِ وھد ءَ بی ایل اے ءِ دگہ یک تجربہ کاریں سنگتے یاسر بلوچ ھم دژمن ءَ گوں جنگ ءَ بازیں وھدے ءَ ٹپی بوتگ بلے بازیں ھون ریچی ءِ سبب ءَ آئی ءَ ھم شھیدی ءِ مزنیں بستارے رس اتگ۔
وزیر اھمد ءِ چک شھید سنگت عدنان بلوچ پنام ءِ سفر خان ءِ سیادی نوشکی ءِ دمگ کلی مینگل ءَ اِنت۔ انٹرنیشنل ریلیشنز ءِ بی ایس ءِ نودربر عدنان بلوچ 2023 ءِ بندات ءَ بلوچ لبریشن آرمی ءَ ھوار بوتگ۔ تو پہ راجی آجوئی ءَ شھری گوریلا ءِ بستار ءَ کار کنگ ءَ اَت ئے۔ اے وھد ءَ تو نوشکی شھر ءُ کش ءُ گوراں جتا جتائیں کارروائیانی تہ ءَ وتی ھُنر ئِے درشان کُت ءُ دژمن ءَ را بازیں ٹپّ ءُ ٹور اِش کُت۔ ھمت، بھادری ءُ سِتک ءِ یک مزنیں درورے پیش کنان ءَ تو بے کساسیں جنگاں دژمن ءَ را ھلاس کت ءُ گڈی ءَ بھادریں شھادت ءِ ھاتر ءَ شھیدی وتی نام ءَ کُت۔
شھید سنگت یاسر بلوچ زھری عرف ماسٹر سفر خان ء لعل جان زھری ءِ سیادی خضدار ءِ دمگ مولہ ءَ اِنت۔ بیست ءُ ھپت سال ءِ مکینیکل انجینئر یاسر بلوچ 2018 ءَ بلوچ لبریشن آرمی ءَ ھوار بوتگ ءُ راجی گلامی ءِ ھلاپ ءَ شھری ءُ کوھیں مھازاں وتی بھرے پیلو کتگ۔ سنگت یاسر بلوچ ءَ بولان، ناگاھو ءُ شورپرود (قلات) ءِ سیاھگاں بازیں ھاسیں جنگانی تہ ءَ بھر زرتگ ءُ دژمن ءِ لشکر اِش پروش دیگ ءَ مزنیں کردے پیلو کتگ۔ آئی ءَ وتی شپ ءُ روچ پہ بلوچ راجی آجوئی ءَ گوں دلجمی، دلیری ءُ تمامی ءَ ندر کُت اَنت۔ تو بی ایل اے ءِ سکیں دلیر ءُ زانتکاریں سرمچارے بوتگ ئے۔
آئی ءَ گْوشت کہ بلوچ لبریشن آرمی شھید سنگت یاسر بلوچ ءُ شھید سنگت عدنان بلوچ ءِ بھادری ءُ بلوچ ڈیھ ءِ وپاداری ءَ راستی کنت اِنت ، آھانی شھادت ءِ سر ءَ آھاں شرپ ءُ شان ءَ پیش کنت ءُ وتی جزم ءِ پد ءَ پدر کنت کہ بی ایل اے ءِ نیمگ ءَ شھید ھچبر شموشگ نہ بنت ءُ آھانی کُربانی ءِ بدل ءَ بے شک راجی آجوئی ءِ شکل ءَ زور اِیت۔