کارِست ھمیدہ
نبشتہ کار: ارشد دوستؔ
دی بلوچستان پوسٹ
ھمیدہ وتی چماں آواران ءِ وڑیں پُر آشوبی دمَکے کہ اود ءَ تیرتیج نامیں میتگے ھست ھمود ءَ چماں پَچ کنت یک گلامیں چاگردے ءِ تہ ءَ زند ءِ بندات ءَ کنت ھما میتگ کہ اود ءَ کارستانی کَمی نہ اِنت اود ءَ بلوچ جُھد ءِ واستا ماتاں لائکین ءُ بھادریں بچ ءُ جنک ودی کُتگ ھما میتگ ءِ تہ ءَ ھمیدہ ءِ وڑیں مھروانیں ءُ ایمانداریں شیرزالے ودی بیت ھما شیرزال ھمے چاگرد ءِ تہ ءِ سلکاریانی تہ ءَ سپر کناں کنت ءُ وتی وانگ ءَ برجم دار ایت دیم پہ اوتَل شھدربرجاہ ءَ سر بیت اِد ءَ آئی ءِ گند ءُ نند گوں سیاسی سنگتاں بیت اے گَپ ءِ تہ ءَ اِچ شَک نیست اِنت کہ ھمیدہ ھما میتگ ءَ چہ سیادی دار ایت یک زمانگے ءَ آ میتگ سیاست ءِ بنجاہ بوتگ بلے ھمے سیاست ءِ سوب اِنت کہ آ سیاست ءِ تہ ءَ آیگ ءُ وتی راج ءِ درد ءِ مارگ ءَ مجبور بیت کہ آ اوتَل ءَ سیاسی سرکلانی بھر بیت
اے ھما زمانگ اِنت کہ بِساک ءِ وڑیں ازیمیں گَل ءِ بلوچ نودربرانی تربیّت ءَ کنگ ءَ بیت ھمد ءَ چہ ھمیدہ وتی سیاسی سپر ءَ بندات کنت ءُ بساک ءَ ھوار بیت گُڑا راجی کاراں گوں گیش دلگوش بیت ھمک روچ گوں سنگتانی نندگ ءُ گوں آیاں ڈسکیشن ءُ ڈیبیٹ ءِ وڑیں چاگردے ودی کنت تانکہ نودربر وتی جند ءِ ءُ سیاست ءِ ارزشت ءَ بہ زان اَنت ھمیدہ ءِ کار ءُ مکلسی ءَ چہ آ بِساک اوتل ھنکین ءِ ھنکینی کمک کارمستر گیچین کنگ بیت ھمے سپر ءَ برجم دار ایت دیمتر ءَ آ گل کاری ءِ سر ءَ گوں ایمانداری ءَ کار کنت ءُ اوتل گرؤنڈ ءَ یک سیاسی بنجلے جوڑ کنگ ءَ گوں سنگتاں ھمکار بیت ھمے وڑ کامریڈ ھمیدہ کیڈر سازی ءِ امل ءَ ھم جوانیں رنگے ءَ دیم ءَ بران کنت پہ ھنکین ءَ نوکیں کیڈر جوڑ کنگ ءِ جُھد ءَ برجم دار ایت بلے اے ھمے زمانگ اِنت کہ بِساک ءِ تہ ءَ یک ٹولی یے پاد کیت نودربران ءَ بنجاہ ءِ ھلاپ ءَ بدگُمان کنگ ءَ بندات کنت مرکزی سنگتانی کردار کُشی آیانی جَھل جنگ ءُ ڈوبارگ ھالانکہ آیانی زات ءِ سر ءَ لَنکُک چِست کنگءِ وڑیں گیر سیاسی ڈبییٹ ءُ بد زھنی ودی کنگ بیت بلے اے کامریڈ جمیدہ اِنت کہ آ وتی ایمانداری ءَ چہ ایمانداریں سنگتانی کدر ءُ کیمت ءَ زانت ءُ اے وڑیں روشتاں ایر جَنت وتی سنگتاں چہ اے وڑیں ٹولیاں چہ رکینگ ءِ کوشست کنت-
یک رندے منی گوں کامریڈ ءَ ھال ءُ اھوالے ءِ تہ ءَ ھمے جیڑھانی سر ءَگَپ بوت آئی ءِ گُشگ اَت اے مردم کہ مرچی ڈاکٹر سبیہ ءِ وڑیں رھشونے ءِ زات ءِ سر ءَ گَپ کن اَنت تو باید اِنت من ءَ اے وڑیں گیر سیاسی سنگتانی بارو ءَ جُست ھم مہ کن بَس ودار کن وھد دُرستاں پدّر کنت درست تئی دیم ءَ چو آدینک ءَ درا بنت من پَشل بوتاں جُست ءِ جند یلہ کُت بلے مرچی کامریڈ ءِ ھمے گَپ من ءَ یاد اَتک واکی کامریڈ درست پدّر بوت اَنت، سبیہ ھم درا بوت ھما بھتام جنوک ھم درا اَنت، تئی گَپ گَپ بوت اَنت کہ تو گُشت وھد درستاں پدّر کنت بلے تئی ھمے سنجیدگی ءُ مستکل مزاجی بوتگ کہ ھر وھد ءَ تو سبر ءِ دامن داشتگ ءُ وتی سنگتاں مُدام ھمے سکین داتگ بکول ءِ زنتکارانی ءَ کہ ،، یک سیاسی سنگت ءِ تہ ءَ سبر ءُ اوپار ءُ برداشت مہ بیت آ سیاسی بوت نہ کنت ،، پمیشکا تئی ھمے سبر ءُ اوپار داد دیگ ءِ ھکدار اِنت کہ تو انچو جنجالانی تہ ءَ سپر کُتگ بلے پُشت ءَ نہ کنز اتگ ئے، پمشکا مرچی ترا دگہ گَپے ھم گُشگ لوٹاں وھدے تئی نمیران بوگ ءِ ھال من ءَ چہ سوشل میڈیا ءَ سر بیت من ءَ انچو سما بوت پورہ دردانی یک گرانیں بارے منی سر ءَ کپت کَمو ھاموش بوگ ءَ پَد آسردے کش اِت نِشتاں وھدے سوشل میڈیا ءَ چاراں درستیں راج پرسیگ اَت کماشاں بگر داں ورنایاں بیا ھتاکہ ھما ٹولی پرست ھم پَشل پَشل اِت اَنت ، پد ءَ تئی سیاسی ھمسپر چِد ءُ گیش تکاسُر گندگ بوگ ءَ اِت اَنت بلے درس ھمے یکیں درد ءِ دیمپان اِت اَنت کہ ما پہ تو ھچ کُت نہ کُت بلے تو گُوں وتی ایمانداری ءُ بھادری ءَ پہ وت ءَ نامے دَر آؤرتگ تو راجدپتر ءَ مُدام گوں شَریں دانکاں یاد کنگ بہ ئے بلے منی کِر ءَ تئی پشکپتگیں یاتاں چہ تھنا یک سوگاتے پش کپتگ ھما کِتاب ءَ کہ تو لانگ مارچ ءِ وھد ءَ سریاب ءَ من ءَ دَست ءَ داتگ اَت آ انگت منی کِر ءَ اِیر اِنت نو اِیشی ءِ پھریزگ ءُ اِیر کنگ منی واستا چِد ءُ گیش گران اِنت بلے تاں ھستاں تئی اے سوگات ءَ پھریزگ ءِ جُھد کناں گُڈسر ءَ وتی نبشتانک ءَ کازی ءِ اے شیر ءَ گوں آسر کناں:
“مَرگ ءَ کَد ءُ باندات نیست”
“زاناں بلوچاں برات نیست “
رُکست اپ آواران سنگت
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-