ایرانی سر ءَ روکپتی بلوچستان ءَ بازین سنی بلوچ عالم دین چہ ڈیھ ءَ کش اتگ اَنت، ایشانی توک ءَ عبدالعزیز عمرزئی، مولوی رضا رخشانی ءُ مولوی عبدالروف رخشانی ، مولوی عبدالمجید مراد زئی ءُ مولوی امان اللہ سعدی ھوار اَنت-
روکپتی بلوچستان ءَ ھالانی سر ءَ نگاہ ایر کنوکیں ھال سرکنوک ھال وش ءِ رد ءَ زاھدان ءِ مکی دارالعلوم ءِ پروفیسر مولوی عبدالعزیز عمرزئی دزگیر کتگ ءُ آئی ءِ ودی بوگ ءِ سرٹیفکیٹ پچ گپتگ ءُ آ بیست ءُ شش مئی ءُ اوگانستان ءَ دیم دیگ بیتگ-
ایشی ءَ پیش زاھدان ءِ مکی مسیت ءَ دزگیر بیتگیں دو استاد مولوی رضا رخشابی ءُ مولوی عبدالرؤف رخشانی بیست ءُ چار مئی ءَ اوگانستان ءَ دیم دیگ بیتگ اَنت-
دگہ بلوچ عالم دین مولوی عبدالحمید ءِ مشیر مولوی عبدالمجید مراد زئی ءُ دارلعلوم مکی زاھدان ءِ پروفیسر مولوی امان اللہ سعدی ءُ ھوار دگہ مردم دزگیر کنگ بیتگ اَنت-
بلوچ باسکانی رد ءَ اے دزگیری مکی میست ءُ مولانا عبدالحمید ءِ نیمگ ءَ سرکار ءِ سر ءَ ایرادگری ترانانی پژدر ءَ بیتگ اَنت-