ماھل بلوچ ءِ ارزی؛ ناشر کار یا چاگردی باسک؟
ٹی بی پی گچینی
پاکستانی پولیس کاؤنٹر ٹیررازم ڈیپارٹمنٹ (سی ٹی ڈی) ءَ شال ءِ ھنکین سیٹلائٹ ٹاؤن ءَ چہ یک بلوچ زالبولے ماھل بلوچ اے بھتام ءَ دزگیر کُتگ کہ آ گمانی اِنت کہ بلوچستان لبریشن فرنٹ (بی ا یل ایف) ءِ یک وتکُشیں تراککار ءُ جنگولے بیتگ۔ بی ایل ایف ءَ اے بھتام رد کُتگ۔ البت، ماھل ءِ کھول ءُ مردمی اگبالانی ٹولی، باسک ءُ گلانی گُشگ اِنت کہ آ بے میار اِنت ءُ سی ٹی ڈی بے میاریں مردماں جنگی مردم پیش دارگ ءُ آیاں دروگیں میڑانی تہ ءَ کُشگ ءِ یک دپترے ھست۔ ماھل ءِ “زورانسری بیگواھی” ءَ گوستگیں سال ءِ یات تاجگ کُتگ اَنت، وھدیکہ سی ٹی ڈی ءِ سر ءَ دہ بیگواھیں مردم زیارت ءَ یک دروگیں میڑے ئِِے تہ ءَ کُشگ بھتام جنگ بیتگ اَنت۔
ماھل بلوچ ءِ “زورانسری بیگواھی” ءَ مزنیں کچے ءَ زھرشانی ءُ تکانسری ءِ یک درچے ودی کُتگ۔ سیاسی باسک، نودربر رھشون ءُ مردمی اگبالانی گلاں اے وئیل ایر جتگ ءُ پاکستان ءِ پھازگی لشکریاں بگیر داری ءِ گُڈگ ءِ ھاتر ءَ “ھونواریں” ءُ “گیر انسانی” کارشونانی کارمرز کنگ ءِ پد ءَ ایرادگری ءِ نشانگ کنگ بئیگ ءَ اِنت۔ جھدکار چاگردی رسانکدرانی سر ءَ ٹرینڈز ھم جنزینگ ءَ اَنت ءُ ماھل بلوچ پہ سلامتی ءَ یل کنائنگ ءِ ھاتر ءَ زھرشانی ھم کنگ بئیگ ءَ اِنت۔
سی ٹی ڈی ءِ اوشتن چی اِنت؟
کاؤنٹر ٹیررازم ڈیپارٹمنٹ ءَ ماھل بلوچ ءِ دزگیر کنگ ءِ بابت ءَ رسانکدراں شنگ کُتگیں درشانے ءِ تہ ءَ گُشتگ کہ آیاں انٹیلی جنس اھوال رس اتگ کہ آ شال ءَ یک “ھساسیں” ھندے ءَ وتکُشیں اُرش کنگ ءِ جھد کنگ ءَ بیتگ۔
ماھل بلوچ ءِ ھلاپ ءَ سی ٹی ڈی اسٹیشن شال ءَ نبشتہ کُتگیں ایف آئی آر ءِ رد ءَ آ سیٹلائٹ ٹاؤن ءَ اُلسی پارک ئے ءِ نزیک ءَ دِستگ ءُ دزگیر کُتگ ۔ گمانی پئیم ءَ آ یک لیپ ٹاپ بیگ ءِ برگ ءَ بیتگ کہ ایشی ءِ تہ ءَ وتکُشیں جیکٹ بیتگ۔ گیشتر اِیش، سی ٹی ڈی واکداراں آئی ءِ شناختی کارڈ ءُ چہ آئی ءَ 1500 روپیہ رس اتگ اَنت۔
بلوچستان ءِ تھی کارانی وزیر ضیا لانگو ءَ گُشتگ کہ چیریں ادارگاں سرکار گمانی پھازگی تُرس ءِ بابت ءَ ھال داتگ اَت۔ سرکار ءَ پھازگی لشکریاں پرمان داتگ کہ آ زیت گامگیج بہ زیر اَنت ءُ تُرس ءِ دیمپانی ءَ بہ کن اَنت۔
بی ایل ایف ءِ چی گُشگ اِنت؟
بلوچستان لبریشن فرنٹ (بی ایل ایف) ءَ یک درشانے شنگ کنان ءَ گُشتگ ماھل آیانی گل ءَ بندوک نہ اِنت۔ گل ءَ آئی “زورانسری بیگواھی” ایر جتگ ءُ گُشتگ کہ آئی ءِ سر ءَ دروگیں بھتام جنگ بئیگ ءَ اَنت۔
گل ءَ گُشتگ کہ ماھل بلوچ ءِ سیادی بلوچستان ءِ کیچ دمگ ءِ ھند گومازی ءَ اِنت۔ آ نامداریں بلوچ راجدوست ھدا مرزی واجہ محمد حسین ءِ نشار اِنت ءُ ھیومن رائٹس کونسل آف بلوچستان ءِ چیئرپرسن بی بی گل بلوچ ءِ نشار اِنت۔ بی ایل ایف ءَ گُشتگ کہ آ بلوچستان ءَ انسانی اگبالانی بگیر ءَ توار چِست کنگ ءَ بیتگ۔ گل ءَ گُشتگ کہ پاکستانی پھازگی لشکریاں ماھل بلوچ آئی ءِ کھول ءِ سر ءَ زور پِر دیگ ءِ ھاتر ءَ دزگیر کُتگ۔
بی ایل ایف ءَ گیشتر گُشتگ کہ پھازگی لشکریاں آئی ءِ کھول بیھار داتگ ءُ ھاموش کنگ ءِ جھد کتگ۔ ماھل بلوچ، دو چُکانی مات، ءُ آئی ءِ کھول 2018 ءَ پھازگی لشکریانی نیمگ ءَ آیانی لوگ ءِ ماندارگ ءَ پد شال ءَ روگ ءَ لاچار بیتگ اَنت۔
گل ءَ گُشتگ کہ پاکستانی لشکر بی ایل ایف ءِ راستیں جنگولانی دزگیر کنگ ءَ بے سوب اِنت ءُ ایشی ءَ پد بے میاریں شھریاں دزگیر کنگ ءَ اِنت ءُ آیاں جنگول نامینگ ءَ اِنت۔ گل ءَ گُشتگ کہ آ جھان ءَ پیش دارگ ءِ ھاتر ءَ انچُش کن اَنت کہ آ بلوچستان ءَ ودوکیں جنگ ءِ بگیری گامگیج زیرگ ءَ اَنت۔
انسانی اگبالانی گل پیسر ءَ چہ ماھل بلوچ ءِ گوما بیتگیں کردگار ءِ سر ءَ ایرادگری ءِ درشان کنگ ءَ اَنت ءُ بی ایل ایف ءِ درشان ءَ جاورھال ءِ ھساسیت ءَ گیشتر ودین اِیت۔ انسانی اگبالانی گلاں لوٹ کُتگ کہ پاکستانی سرکار ءَ اے بھتامانی پَٹ ءُ پول کنگ ءِ ھاتر ءَ زیت گامگیج زیرگ لوٹ ایت ءُ اَے گپ باوری کنگ لوٹ ایت کہ ماھل بلوچ ءَ کانود ءِ رد ءَ انساپ دیگ بیت۔
ماھل ءِ کھول ءِ چی گُشگ اِنت؟
ماھل ءِ کھول ءِ رد ءَ، ماھل بلوچ چہ پارک ءَ دزگیر کنگ نہ بیتگ، انچش کہ سی ٹی ڈی ٹاہ اِنت، بلکیں آ چہ آئی ءِ لوگ ءَ آئی دو چُکاں ھوار دگہ چار مردم دزگیر کنگ بیتگ اَنت۔ ماھل بلوچ ءِ دُسکیچ بی بی گل بلوچ ءَ بی بی سی اردو ءَ گُشتگ کہ پھازگی لشکریاں آیانی لوگ انگر کُتگ ءُ درپان ھم لٹ شاپی ءِ آماچ کُتگ، وھدیکہ آئی ءَ آیانی دارگ ءِ جھد کُتگ۔
آئی ءَ گُشتگ کہ چاریں دزگیر بیتگیں مردم دومی روچ ءَ یل کنگ بیتگ اَنت۔ آیانی چمانی سر ءَ پُچ بندگ بیتگ ءُ آیانی لوگ ءِ رسگ ءِ مساپری ءَ دراج کنگ ءِ ھاتر ءَ چہ شھر ءَ باز دیر یل کنگ بیتگ اَنت۔ بی بی گل ءَ دیمتر ءَ گُشتگ ماھل داں انگت سی ٹی ڈی ءِ دست ءَ اِنت۔
بی بی گل بلوچ ءَ ھم سی ٹی ڈی ءِ ٹاہ رد کُتگ اَنت کہ ماھل ءِ سیادی گوں کجام ھم “آجوئی لوٹوکیں ” گل ءَ نہ بیتگ ءُ نانکہ آ وتکُشیں تراککارے بیتگ۔
شال ءَ زھرشانی ءَ گوں تران کنان ءَ ماھل ءِ وسیگ ءَ گُشتگ کہ پھازگی لشکریاں آ دزگیر کنگ ءَ پیسر لٹ شاپی ءِ آماچ کُتگ۔ آئی ءَ گُشتگ کہ لشکریاں آ یک جتاھیں کوٹی ءَ بند کُتگ ءُ لٹ شاپی کُتگ۔ ما آئی ءِ کُکارانی توار اِش کُت کُتگ اَنت۔ آئی ءَ چہ واکداراں لوٹ کُتگ کہ ماھل ءِ دو زھگانی سر ءَ رھم کنگ بہ بیت ءُ آ آجو کنگ بہ بیت۔
اُلسی پَدگَرد
ماھل بلوچ ءِ “زورانسری بیگواھی” ءِ ھال چاگردی رسانکدرءَ جنگل ءَ آس ءِ پئیم ءَ شنگ بیتگ، کہ چریشی ءَ لس مھلوک ءِ تہ ءَ باز زھر ءُ گم گندگ ءَ اَتکگ۔ سیاسی باسک، انسانی اگبالانی گل ءُ جھدکاراں وئیل ایر جتگ ءُ واکداراں چہ لوٹ کُتگ ماھل بلوچ پہ سلامتی یل کنائنگ بہ بنت۔
چاگردی باسک ءُ وکیل ایمان زینب مزاری ءَ ٹوئٹر ءِ سر ءَ ماھل ءِ “زورانسری بیگواھی” ایر جتگ ءُ گُشتگ کہ شال ءِ انیگیں کور کمانڈر آصف غفور بلوچستان ءِ تہ ءَ جنگولانی کساس ءَ ودینگ لوٹ ایت۔
آئی ءَ گُشتگ کہ چیریں ادارگانی ءُ پھازگی لشکریانی زالبولانی نشانگ کنگ ءِ مزنیں نھادے دیگ کپ اِیت۔
آئی ءَ گُشت کہ ڈھاکہ ءِ کپگ ھم یاد کنان ءَ گُشتگ پاکستانی لشکریاں ابید کجام ھم میار ءَ ھزارانی کچ ءَ بنگالی زالبولانی شرپ ھراب کُتگ اَنت۔ مئے سر داں انگت ھمے جنگی جرمکاریانی سوب ءَ جھل اَنت۔
مزاری ءَ گیشتر گُشتگ کہ بے میاریں شھریانی دزگیر کنگ ءُ آیانی سرءَ لٹ شاپی کنگ تھنا پاکستانی پوج ءِ بگیر نپرت ءَ ودین اِیت ءُ مردماں “آجوئی لوٹوکیں” گلانی تہ ءَ ھوار کنگ ءِ سکین دنت۔
بلوچستان نیشنل پارٹی مینگل ءَ یک رسانکدری درشان ئے ءِ تہ ءَ ماھل بلوچ ءِ زورانسری بیگواھی ءَ ایرجنان ءَ گُشتگ کہ آ 25 فروری ءَ شال ءَ شُد ھڑتال کنت۔ درشانے تہ ءَ گُشگ بیتگ کہ بے میارانی “بیگواھی” انسانی اگبالانی ترندیں لگتمالی ءُ بلوچستان ءِ جاورانی شوربندی ءَ گوں ھوار کنگ ءِ کوشست اِنت۔
ماھل بلوچ ءِ “زورانسری بیگواھی” ءَ تُربت شھر ءَ زھر ءُ گم ءُ زھرشانی ودی کنگ بیتگ اَنت، وھدے مردماں آئی زیت یل کنگ ءِ لوٹ کنان ءَ دگانی سرءَ درکپتگ اَنت۔ زھرشانی کنوکاں روانک کش اِتگ، کاؤنٹر ٹیررازم ڈیپارٹمنٹ (سی ٹی ڈی) ءِ بگیر ءَ اوگام جنگ بیتگ ءُ انساپ ءِ لوٹ کُتگ۔ زھرشانی کنوکاں سرکار ءُ پھازگی لشکر ءِ بگیر ءَ وتی بے امیتی ءِ درشان کنان ءَ آیانی سر ءَ بھتام جتگ کہ آ بے میاریں شھریاں گیر کانودی ردءَ دزگیر کنگ ءَ اَنت ءُ آیاں جنگول نامینگ ءَ اَنت۔ تُربت ءَ زھرشانیانی درچ یکشلی ءَ برجاہ اَنت۔
پریسکاراں، جھدکاراں ءُ بلوچ راجدوستانی ردءَ پاکستان ءَ کانود برجاہ داروکیں ادارگ بلوچ زالبولاں ھاسیں پئیم نشانگ کنگ ءَ اَنت کہ آ راجدوستیں سیاست ءِ تہ ءَ بھر زیرگ ءَ اَنت ءُ آیانی سروکی ءَ کنگ ءَ اَنت۔ بلوچستان ءِ سیاسی اڑ ءُ کُڑانی دپتر کوھن اِنت ءُ بلوچ آجوئی ءِ جھد ءِ تہ ءَ بلوچ زالبولاں مزنیں کردے پیلو کُتگ۔ پمیشکا کانود برجم داروکیں ادارگ گمانی پئیم ءَ جھدکاریں زالبولاں جسمانی ءُ زھنی زوراکیانی آماچ کنگ ءَ اَنت دانکہ زالبولانی سیاست ءِ تہ ءَ راہ دارگ بہ بنت۔
سیاسی پریسکارانی گُشگ اِنت کہ اے شوربندی نہ تھنا انسانی اگبالانی لگتمالی اِنت بلکیں اے تاوان بار اِنت ھم پرچہ کہ اے تھنا دمگ ءِ تہ ءَ نگیگی ءَ گیشتر ودینگ ءِ سوب بیت۔ بلوچ راجدوستاں اے گامگیجانی ھلاس کنگ ءُ بلوچ زالبولاں وتی راج ءِ باندات ءِ تہ ءَ کرد پیلو کنگ ءِ کرد ءِ گیش ءَ چہ گیش منگ ءِ لوٹ کُتگ۔
پاکستان ءِ کاؤنٹر ٹیررازم ڈیپارٹمنٹ (سی ٹی ڈی) ءِ سر ءَ گوست ءَ ھم ابید آمید گِس کوش ءُ دروگیں میڑانی تہ ءَ ھوار بیگ ءِ بھتام جنگ بیت۔ پمیشکا ابید ءِ ترندیں منانک ءَ تھنا انٹیلی جنس مالوم داری ءِ سر ءَ ماھل بلوچ ءِ دزگیری سی ٹی ڈی ءِ کاروائیانی پلگارگ ءُ گورسیں بیگ ءِ بابت ءِ سنگینیں وسواس ودی کنت۔
چُشیں گامگیج نہ تھنا بے میاریں مردمانی انسانی اگبالانی ھلاپ ورزی کنگ ءَ اَنت بلکیں پیسر ءَ چہ گیر مھکم دمگ ءَ گیشتر گیر مھکم کنگ ءِ ھم کمکار بنت۔ واکدار ءُ انسانی اگبالانی ٹولیاں جاورھالانی سر ءَ گامگیج زیرگ لوٹ ایت ءُ اے گپ ھم باوری کنائنگ بہ بیت کہ ماھل بلوچ ءِ گورسیں ٹرائل کنگ بہ بیت ءُ آئی ءِ بُنکی انسانی اگبال رکینگ بہ بنت۔ اے المی اِنت کہ کانود ءِ رد ءَ گامگیج زیران ءَ انساپ دیگ بہ بیت، ءُ پھازگی لشکری آیانی کردگارانی سر ءَ جوابدار کنگ بہ بنت۔