بلوچستان ءِ تیاب دپی شھر گوادر ءَ ھک دے تھریک ءِ بگیری ءَ کریک ڈاؤن ءِ میان ءَ گوادر پریس کلب مزنیں اِھوالکار حاجی عبیداللہ ھم دزگیر کتگ کہ آ گوستگیں روچ ءَ سینٹرل جیل تربت ءَ برگ بیتگ-
اِھوالکارانی رِد ءَ حاجی عبیداللہ ءَ اَبید سینٹرل جیل تربت ءَ سے ایم پی او ءِ درگت ءَ پانزدہ مردم بندیگ اِنت-
ھک دے تھریک رِد ءَ آیانی مزنیں کچے ءَ دزگیر کنگ بیتگیں باسک بلوچستان ءِ جتائیں دمگاں برگ بوگ ءَ اَنت-
وھدے کہ تربت پریس کلب ءِ جارکش ءَ گوادر ءِ مزنیں اھوالکار ءُ گوادر پریس کلب ءِ باسک عبیداللہ ءِ دزگیری ءِ دلپدردی درشان کتگ-
یک درشانے ءَ تربت پریس کلب ءَ حاجی عبیداللہ ءِ دزگیری ھیالانی درشان ءُ آجوئی ءِ بگیری ءَ زوراکی ءِ راھبندانی بھر گوشتگ کہ ڈیھ ءَ اے وھد ءَ یک جمھوری ھکومتے ھست اِنت ءُ جمھوری سیاسی پارٹی اکتدار ءَ اَنت کہ آیاں پی ٹی آئی ءِ ھکومت سر ءَ آزاتیں اِھوالکاری ءِ بگیری ءَ بیڑبرگ ءُ اِھوالکارانی دزگیر کنگ ءِ بھتام جتگ اَت-
جارکش ءَ گْوشتگ کہ بلوچستان ءِ صوبائی ھکومت وت مستر نہ اِنت ھمے ھاتر ءَ ما وفاقی ھکومت ءَ گوں اے لوٹ ءَ کن ایں کہ ڈیھ ءِ آجوئی لیکہ ءِ سر ءَ گر ءُ دار کنگ ءَ چہ اھوالکاری آجوئی ءِ ازت ءُ شرپ ءَ بکن اَنت حاجی عبیداللہ ءَ یل بکن اَنت-