کیچ: حق دو تحریک ءِ نیمگ ءَ باسکانی دزگیری ءِ ھلاپ ءَ زھرشانی روانک

الم بوانیت

بلوچستان ءِ دمگ کیچ ءَ حق دو تحریک کیچ ءِ نیمگ ءَ باسکانی دزگیری ءُ لوگانی سر ءَ بیڑ برگ ءِ ھلاپ ءَ زھرشانی کنگ بیتگ –

زھرشانی روانک ءَ زالبول ءُ مردیناں ھوار حق دو تحریک ءِ باسک ھوار بیتگ اَنت –

زھرشانی روانک تربت پریس کلب ءِ دیم ءَ کنگ بیتگ کہ اود ءَ روانک ءِ دارگ ءَ پولیس ءُ زھرشانی کنوکانی میان ءَ دپ جاکی بیتگ اَنت چریشی ءَ پد زھرشانی کنوکاں دگ ءِ سر ءَ نندانک جتگ ءُ تران کتگ –

اود ءَ تران کنوکاں تران کنان ءَ گوشتگ کہ سرکار ءَ حق دو تحریک ءِ بازیں باسک ءُ رھشون دزگیر کتگ اَنت چریشی ءِ پژدر ءَ پولیس آیانی گسانی سر ءَ ھم بیڑ برگ ءُ اود ءَ جاڑیگیں زالبولاں لٹ ءُ کُٹ کنگ اِنت-

آیاں گوشتگ کہ اے جاورانی ھراب کنگ ءِ زمہ وار سرکار اِنت کہ آ پر ایمنیں زھرشانی ءِ ھلاس کنگ ءَ تاکت ءَ کارمرد کنگ اِنت-

آیانی گوشگ ات کہ بلوچانی واستا پُر ایمنیں راہ بند کنگ بیتگ اَنت ھما ھساب ءَ کنگ بیگ ءَ اِنت کہ بلوچ نی تیوگی ءَ سلاہ چست بہ کن اَنت-

آیاں گوشتگ کہ سرکار درستیں گپتگیں باسکاں یلو بہ کنت اگاں ناں گڑا دیم ءَ مئے آیوکیں بنگپ گیش ترند بیت کن اَنت-

زانگ بہ بیت بلوچستان ءِ تیابدپی شھر گوادر ءَ گوستگیں چار روچاں زھرشانی یکشل ءَ برجاہ اَنت کہ اود ءَ نیٹ ورکاں ھوار انٹرنیٹ سروس ءُ دگہ رھوتی ھال بند کنگ بیتگ اَنت-

گوادر ءَ گوستگیں روچ ءَ زھرشانی کنوک ءُ پولیس ءِ میان ءَ بازیں جاھاں جنگ ءُ چوپ ھم بیتگ اَنت

شنگ بیتگیں تامراں گندگ بیت اِنت کہ گوادر ءِ دمگ ءَ دگانی سر ءَ آس روک اِنت ءُ شھر ءَ رو ءُ آ نیست اِنت ءُ دگانی سر ءَ گیشیں پولیس دارگ بیتگ اَنت-

حق دو تحریک ءِ نوکتریں زھرشانی ءِ لوٹ اِنت کہ ایانی بازیں باسکانی یک کنگ ءَ داں اے زھرشانیانی درچ برجاہ بنت-

گوادر ءَ مروچی چارومی روچ ءَ ھم دگ بند ءُ رھوتی ھال نیست اَنت ءُ اود ءَ جاور گیش ناگیگی ءِ دروشم پیش کنگ ءَ اَنت-

نوکتریں