روکپتی بلوچستان ءَ برجاھیں زھرشانیانی پُشدر ءَ – میار بلوچ

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

نبشتانک: روکپتی بلوچستان ءَ برجاھیں زھرشانیانی پُشدر ءَ

نبشتہ کار: میار بلوچ

دی بلوچستان پوسٹ

بلوچستان ءَ چُشیں یک روچے ھم نہ گوز ایت کہ یک ھندے ءَ چُک، جنین، کماش، ورناہ، لوگ واجہ، لوگ بانُک، برات، گھار، مات، پِت ءُ دانکہ ساہ دار چہ ایرانی ءُ پاکستانی زوراکیاں رکیتگ اَنت۔

بلوچستان ءَ زوراکیانی درچ چہ ھما روچ ءَ بندات بیتگ وھدیکہ برتانیہ ءَ بلوچستان دزگیر کُتگ، برتانیہ ءِ دزگیری ءَ بگر داں مروچی بلوچستان ءِ سر ءَ یکشل ءَ زوراکیانی سیاھیں جمبر ساھیل اَنت۔

ھمک روچی زوراکیاں ھوار برے برے بلوچستان ءَ انچیں وئیل ھم بنت کہ آ وئیل مزنیں کساس ءَ لس مھلوک ءِ دگانی سر ءَ درکپگ ءِ سوب جوڑ بنت، اے وئیل برے بلوچستان ءِ دمگ کیچ ءَ ملک ناز ءِ کوش ءُ کسانسالیں برمش ءِ ٹپی بوگ ءِ دروشم ءَ کئیت برے اے وئیل چابھار ءَ ایرانی پولیس ءِ سروک ءِ دست ءَ سیلکاری ءِ آماچ بیتگیں بلوچ گونڈو ءَ پہ انساپ ءِ لوٹگ ءِ ھاتر ءَ دیم ءَ کئیت۔

اے وئیل بلوچ چاگرد ءَ مزنیں مٹ آرگ ءِ سوب اَنت اے وئیل مھلوکانی تُرس ءِ ھلاس کنگ ءِ سوب بنت، مھلوک ءِ دگانی سر ءَ درکپگ ءِ سوب بنت، چُش کہ پاکستان ءِ چیردستیں بلوچستان ءَ مزنیں مدتے ءَ چہ سیاسی جھدکار ءُ باسک کارکنگ ءَ اَنت ءُ سیاسی جھدکاراں جوانیں رسانکدر کارمرز کنگ ءُ وتی گپانی سر کنگ ءِ آسراتی ھست پمیشکہ اود ءَ بیتگیں زھرشانی ءُ مراگش گیشتر سیاسی دروشم ءَ گندگ دے اَنت۔ ترانکار گیشتر وتی گپانی تہ ءَ وتی لوٹ ایر کن اَنت دگ بند کن اَنت بلے گیشتر پر ایمن بنت ءُ دگانی سر ءَ پوج ءُ لشکریانی گوم ءَ دیم پہ دیمی جنگ نہ کن اَنت بلکیں گوں زھرشانی، گوں مھکمی وتی کلوہ ءَ جھان ءَ سر کنگ ءِ کوشست ءَ کن اَنت، برے آیانی توار جھان ءَ سر بیت ءُ برے آیانی توار دگہ وئیلانی آماچ بیت بلے پاکستانی زیردستیں بلوچستان ءِ بلوچ سرجمیں سالے دراجی ءَ گیشتر زھرشانی بنجلانی تہ ءَ گندگ بنت۔

دومی نیمگ ءَ ایرانی زورگپتگیں بلوچستان ءِ جاور چہ پاکستانی دزگیر کُتگیں بلوچستان ءَ باز جتا اَنت، روکپتی بلوچستان ءَ سیادی داروکیں ورناہ ءُ کماشانی رد ءَ اود ءَ سیاسی دروشم ءَ توار چِست کنگ ءِ اگبال نیست، سیاسی گل ءُ پاٹی اڈ دیگ ءِ اگبال نیست، مردم اگاں وتی لوٹانی ھاتر ءَ زھرشانی کنگ ءَ تُرس اَنت۔ بلے گوستگیں لھتیں روچاں چہ زانگ بیت کہ روکپتی بلوچستان ءِ مھلوک نہ تھنا زوراکیانی بگیر ءَ پاد آیگ زان اَنت بلکیں آ پہ وتی اگبالاں داں نمیران بیگ ءِ کچ ءَ ھم شُت کن اَنت۔ گوستگیں سئے روچاں چہ زاھدان، ایرانشھر ءُ دگہ دمگانی تہ ءَ ایرانی ملا رجیم ءُ پولیس ءِ بگیری ءَ ھونریچیں زھرشانی، پُرشت ءُ پروش ءُ درانگازی کنوک ءُ پھازگی لشکریانی نیام ءَ جنگ دروشمیں جاور ھال برجاہ اَنت۔

اے جاورانی تہ ءَ زھرشانی کنوکانی رھشونی کنوک کس ھم گندگ نہ بیگ ءَ اِنت۔ اے زھرشانی ابید ءِ سیاسی رھشونی ءُ راھبند نہ باز روچ جل اِت کن اَنت ءُ نانکہ اے زھرشانی ءَ پد دگہ سیاسی بدلی ءِ گندگ ءَ اتک کنت داں ھما وھد ءَ کہ روکپتی بلوچستان ءِ مھلوک پہ وت ءَ یک مھکمیں سیاسی پاٹی اگاں گل ءِ اڈ مہ دے اَنت۔ الم کمپین ءُ درملکاں روکپتی بلوچستان ءِ نمائندگی کنوکیں گل ھست بلے المی اِنت یک انچیں گلے سرڈگار ءَ ھست بہ بیت دانکہ مھلوک ءِ ھمراھداری کنگ ءَ ھوار آیاں کِشک پیش بہ داریت، آیاں پہ رژناھی ءِ چیدگ ءِ کار ءَ بہ کنت دانکہ مروچیگیں مھلوکانی زھر باندات ءَ شعور ءُ زانت ءِ کار ءَ بہ کنت ءُ مردم ایرانی رجیم ءِ بگیر ءَ سیاسی دروشم ءَ مھکم بہ بنت ءُ ساڑی بہ بنت۔

پرچہ کہ ابید سیاسی لیکہ ءُ راھبند ءَ اے زھرشانی تھنا جزباتانی درشانی بیت کن اَنت بلے مھکمیں جھدانی چیدگ بوت نہ کن اَنت۔

ھما اِنت کہ روکپتی بلوچستان ءَ نگیگیں جاورھال بندات بیتگ اَنت یک ھاسیں تکے نیمگ ءَ وتی سیاسی دکانداری ءِ برجاہ دارگ ءِ ھاتر ءَ بلوچ نیشنل موومنٹ ءِ بگیر ءَ وتی دنتان دُرشتگ اَنت ءُ دروگیں گپ ءُ پندل برجاہ داشتگ اَنت، اے پندلانی تہ ءَ گیشتر ھما مردم ھوار اَنت کہ اِشانی سیادی گوں پاکستانی دزگیریں بلوچستان ءَ اِنت۔ اِشانی سیادی یک ھاسیں سیاسی پگر ءَ گون اِنت اِے ٹولی مدام بلوچ راجی گل، بلوچ راجی جھدکار ءُ نمیرانانی بگیری کنگ آیانی ڈوبارگ ءُ ھمے کردگاراں گوں وتی پولنگیں کرد ءَ پاک کنگ ءِ بے سوبیں جھد کنگ ءَ اَنت۔

چُش کہ اے مردمانی زندمان تھنا چاگردی رسانکدر ءَ داں بندوک اِنت، پمیشکہ اِشانی گمان اِنت کہ اِشانی ھمک نبشتگیں گپ، ھیال، لیکہ راستی ءِ درشانی اِنت ءُ دگہ مردمانی کردانی پولنگ کنگ ءَ گوں اِشانی ءُ اِشانی رھشونے کرد کہ آ آئی ءَ اے ساھت ءَ وتی ھند ءُ دمگانی تہءَ مھلوک تُشیں ھم باور نہ کن اَنت، آ کرد جوان بیت کنت۔

اے پندل ساز وتی سرجمیں تاگت ءَ ھمے گپے منارینگ ءِ ھاترءَ کارمرز کنگ ءَ اَنت کہ مردم چاگردی رسانکدر ءَ بہ چار اَنت کہ روکپتی بلوچستان ءَ بیوکیں زھرشانیانی درگت ءَ مئے کاگدی گل کہ آئی بلوچستان ءَ نہ کرد ءِ ھست نانکہ بلوچستان ءَ وجود داریت ھمے کاگدی گل ءِ نیمگ ءَ شنگ بیتگیں درشان مزنیں جھد اِنت۔ چوناھاں اے گل ءِ سروک ءَ بگر دانکہ یک باسکے ءَ درست مدام راجی جھدکارانی بگیر ءَ پندل سازگ ءُ راجی بامردانی ڈوبارگ ءِ جھد ءَ نشتگ اَنت۔

ھیر پندل سازوک پندل ساز اَنت باور کنوک باور کن اَنت، سرپدی داروک اِشاں چہ دیراں زان اَنت، بلے اِشی ھچبر بزانت اے نہ اِنت روکپتی بلوچستان ءَ بیوکیں مزنیں ھونریچیں زھرشانی، پھازگی لشکریانی نیمگ ءَ مھلوکانی نمیران کنگ ءِ جیڑہ ڈالچار کنگ بہ بنت پرچاکہ راستی ھچبر ڈالچار کنگ نہ بیت اِنت۔

گُڈسر ءَ تھنا ھمینچوک گُشاں کہ روکپتی بلوچستان ءَ روکیں آس ءَ مھکمیں جھد ءِ دروشم دیگ ءِ ھاتر ءَ روکپتی بلوچستان ءِ رھشوناں مستریں کرد پیلو کنگی اِنت، ءُ رودراتکی بلوچستان ءِ سیاسی پاٹی ءُ گل اگاں پہ کجام ھم جیڑہ ءُ لاچاریانی سوب ءَ روکپتی بلوچستان ءِ مھلوک ءِ کمک ءُ ھمراھداری کُت نہ کن اَنت بلے آیانی سر ءَ بیوکیں زوراکیاں راستیں دروشم ءَ پدر الم بہ کن اَنت پرچاکہ زوراکیانی آماچ بیوکیں مردم منی ءُ تئی راج ءُ برات ءُ گھار اَنت۔


دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نوکتریں

فیفا ورلڈ کپ: گھانا، برازیل ءُ پرتگال ءَ گوازی کٹ اِتگ انت

دوحہ قطر ءَ فیفا ورلڈ کپ ءِ گوازی برجاہ ، گوستگیں روچ ءَ قطر ءِ جتا جتائیں پٹاں ھشت ٹیمانی میان...

شال: زورانسری آوار جنیانی بگیری ءَ زھرشانی برجاہ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، وی بی ایم...

بلیدہ ءُ گومازی ءَ پاکستانی پوج ءُ ایف ڈبلیو او ءِ سر ءَ اُرش، اُرشانی زمّہ واری بی ایل ایف ءَ منّ اِتگ انت

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں بلوچستان ءِ دمگ تمپ گومازی ءَ پاکستانی پوج ءِ بنجل...

زاھدان، ایرانشھر، چھبار ءُ زابل ءَ ایرانی آمیدگس ءِ ھکم ءَ نُھ کس پاھو دیگ بیتگ اَنت

سر بیتگیں ھالانی رد ءَ روکپتی بلوچستان ءِ جتا جتائیں زنداناں ایرانی آمیدگس ءِ ھکم ءَ نُھ کس پاھو دیگ بیتگ...