لچہ
شاری
هسابجار
دی بلوچستان پوسٹ
اے چونیں گریشگے
ءُ سیاه شپے
کہ جن ءُ جاتواں یلا
گوں هون واریں رستراں
بگند
بگند !
من چینچک بے وساں
اے مردمانی جنگل ءَ بُگش
اے چونوکا تچ انت ؟
من اشکتگ وتی چہ پیروک ءِ دپ ءَ
کہ آسے روک کنگ بہ بیت
پہ آس ءَ دار ءُ بُنڈُکے پکار
یا بُوچ ءُ بُوٹگے پکار
من چون کناں کہ دار نیست ادا
ءُ نیکہ بُوچ ءُ بُوٹگے ءِ گواه
پہ سنگ کرمُشے جنگ بہ بیت
پہ زند ءِ دارگ ءَ وتی
پہ ماندارگ ءَ وتی
کہ بِلّے آس روک بیت ءُ اندر ءَ بلیت
همک دمّگ ءَ چمیت
جہان بیت رُژناں
تاں
دیست کنت من ءَ
منی مزاریں پُشت پداں پُلیت
چہ هون واریں رستراں
چہ جن ءُ انسیں جاتواں