روس یوکرین ءَ جنگی جاوراں چہ ھزارانی دگہ ڈیھی یوکرین ءَ پَسّتگ اَنت ءُ آیانی تہ ءَ گشیتریں کچ نودربر اَنت-
گوستگیں روچ ءَ ھندوستان ءَ وتی مردمانی درکنگ ءِ ھاتر ءَ ھاسیں بالی گُراب ءِ راہ دیگ ءِ جار جتگ ءُ تنی وھدے یوکرین ءَ جنگ سوب ءَ بُرزی اھد ءُ سیمسر بند بوگ ءِ سبب ءَ ھندوستان بالی گُراب یوکرین ءَ پُترگ ءِ موکل نہ رستگ-
دومی نیمگ ءَ گْوشگ بوگ ءَ اِنت کہ اے وھد ءَ یوکرین ءَ پاکستانی بازیں نودربرے کُمک ءِ راھچار اَنت بلے آیانی ھچ وڑیں ھال پُرسی بوگ ءَ نہ اِنت-
نوکیں ھالانی رِد ءَ گوستگیں چیزے روچاں چہ یوکرین ءِ دارلھکومت کیف میڈیکل یونیورسٹی ءِ نودربراں ھوار ءَ پنچ پاکستانی نودربر ھاسٹل ءِ تہ ءَ بند اَنت – آیانی تہ ءَ بلوچستان ءِ ضلع گوادر ءَ چہ سیادی داروکیں جنید حسین ھم ھوار اِنت-
جنید حسین دفتر خارجہ ءَ چہ زوت ڈیھ ءِ واتری ءِ ھاتر ءَ گامگیج زورگ ءِ دزبندی کتگ ءُ پَستگیں نودربرانی کچ ھپت اِنت آیانی تہ پاکستانی شھری اَنت-
مسلم لیگ ( ن) ءِ نائب صدر مریم نواز ءَ یوکرین ءَ پَستگیں پاکستانی نودربرانی واست ءَ دلپدردی درشان کتگ ءُ چاگردی رسانکدر ٹوئیٹر ءَ وتی یک ٹویٹے ءَ گْوشتگ کہ یوکرین بازیں کچے ءَ پاکستانی نودربر اود ءَ چہ دراھگ ءِ راھچار اَنت-
مریم نواز ءَ ھکومت ءَ را جُست چست کتگ ءُ گْوشتگ کہ یوکرین ءَ پَستگیں مزنیں کچے ءَ پاکستانی نودربرانی پریات ءِ گْوشداروک نیست-