نبشتانک: 11 اگست ءِ شادمانی پَد جنگ
نبشتہ کار: گنی ھیات
دی بلوچستان پوسٹ
11 اگست بلوچستان ءِ آجوئی ءِ یک جوانیں روچے ءِ بستار ءَ زانگ بیت بلے بدواھیں دَریں ڈیھ ءُ وش نہ یتکیں انگریز وش نہ اِت اَنت کہ بلوچ وتی ڈیھ ءِ وت واجہ وت بہ بیت ھمے وڑ ءَ وھدے کہ دَری مُلکانی چم پہ بلوچستان ءِ مسکیں زمین ءَ سَک بیت اَنت گڑا آیاں بلوچستان ءِ سر ءَ کبزہ کنگ ءُ وتی پنجگانی چیر ءَ کنگ ءِ کوشست بنا کُت ۔
ھمے میان ءَ انچوش ھمے ماہ ءِ چاردہ 14 اگست پہ کُل بلوچاں یک سیاہ ءُ تھاریں روچے ءِ بستار ءَ دارگ بیت ءُ اے روچ ءَ ھمے بدنامیں ملک پاکستان جوڑ کنگ بیت ءُ پَد ءَ 7 ماہ ءُ چیزے روچ ءَ پَد 27 مارچ 1948 بلوچانی سر ءَ پہ زور مُشگ بیت ءُ انگریز ءِ سامراج وتی نپ ءُ سیتانی ءِ ھاتر ءَ پاکستان ءِ وڑیں یک گیر پِتری ریاستے چاردہ 14 اگست 1947ءَ جوڑ کنت ءُ ھما اِنت مروچی ءَ 73 سال اِنت پاکستان ءَ پہ زور بلوچستان ءِ سر ءَ وتی چنگل ایر داتگ اَنت ءُ وتی زوراکی برجم داشتگ۔
بلوچ مھلوک ءِ سر ءَ زور گریں پاکستانی ریاست ءِ زلم ءُ زوراکی چہ 1948 ءَ یکشلہ برجاہ انت ،چشیں روچے نیست کہ آ پہ ایمنی ءَ گْوستگ ءُ یک بلوچ پُسگے آوار جنگ نہ بوتگ یا مہ بیت یا تیر باران کنگ مہ بیت ءُ یا آئی ءِ گس ماندارگ مہ بیت ، بلوچ ءِ میتگ ویران کنگ بوگ ءَ اَنت، بلوچ راج ءِ چُک چینی بوْگ ءَ اِنت چیزے سال ءَ نوں گیشتر اے زوراکی ءَ ردوم زُرتگ لَس مھلوک ھم ھمے زوراکی ءِ دیمپان اِنت۔
گوستگیں سال ءِ سیزدہ اگست ءَ بزاں دوھزار بیست ءَ تربت آپسر ءَ پاکستانی زورگریں لشکریانی تیر گواری ءَ چہ ھیات نامیں ورنایے شھید کنگ بوت ، ھیات جاہ منند اَت تربت آپسر کولوائی بازار ءِ آ کراچی ءِ شاھدر برجاہ ءِ نودربرے اَت، ھیات ءِ شھید ءَ پَد بلوچ گیشتر برانز گپت ءُ آجوئی جُھد ءِ بھر جوڑ بوت بلوچ ءَ زانت کہ اِد ءَ کَس بکشگ نہ بیت ھَر کس ءَ کہ بلوچ ءِ نام پر اِنت آ چوں ھیات ءَ مات ءُ پِت ءِ دیم ءَ آئی ءِ دست ءُ پاد بندگ بنت ءُ مات ءِ ءُ پِت ءِ دیم ءَ تیرباراں کنگ ءُ شھید کنگ ءُ چگل دیگ بیت ۔
ھیات مرزا ءَ چہ ابید چُنت بے میاریں ورنا پاکستانی لشکر ءَ شھید کُتگ ءُ چُنت ماتاں اے ندارگ وتی چمّاں گوں دیستگ اَنت ھنی دیر نہ اِنت کہ یک بزگر ءُ نیزگاریں شوانگے ھم ھمے لشکر ءَ گوں بے دردی ءَ شھید کُت آئی ءِ جان ءِ بند ءُ بوگ داگ داگ اِت اَنت ءُ آئی ءِ جان ءِ پوست چہ جان ءَ لکوشتگ اَت، بلے ما بلوچ راج ءِ سر ءَ بیوکیں زُلم ءَ چمشانکے بہ دے ایں گُڑا اد ءَ کس ءَ انساپ نہ رس اِتگ، اے ھپتاد ءُ سئیں سالاں ھزارانی ھساب ءَ بلوچ کشگ ءُ دور دیَگ بوتگ۔
بِلے روچ مروچی بلوچ وتی جھد ءَ پدکنز نہ اِنت بلوچ ءَ وتی جنگ برجم داشتگ ھما روچ ءَ تاں مروچی یکوے پہ وتی آزاتی ءَ جھد ءَ انت پِت وتی بچّاں پہ وتی باندات ءِ ھاتر ءَ آجوئی ءِ بھر جوڑ کن اَنت ءُ مات وتی سالونکیں بچّاں پہ زمین ءَ سالونک کن انت ھمے پیم ءَ ھمے ماہ ءَ بزاں یادزہ اگست ءَ بلوچستان ءِ آجوئی ءِ روچ ءَ شھید جنرل استاد اسلم بلوچ پہ شان ءُ بِچکند وتی سالونکیں بچّ ریھان جان ءَ رُکست کنت ءُ دیم پَہ ماتیں گُلزمین ءِ مُوکگ ءَ راھی کنت، یازدہ 11 اگست دوھزار ھژدہ 2018 ءَ شھید ریھان جان چینی مھندسانی کانوا ءِ سر ءَ پِدائی ئیں ارشے کنت ءُ دگنیا ءَ تچک ءَ اے کلوہ ءَ سر کنت کہ بلوچ ءِ سر زمین ءَ اَبید بلوچ ءِ رزا ءُ واھشت ءَ ھچ وڑیں دری زوراک گوں زورگریں ریاست پاکستان ءَ ھچ وڑیں نام گپتیں دیمروی ءِ کاراں بھر زرت نہ کنت۔
مروچی شھید ریھان جان ءِ داتگیں کُربانی ساڑایگ ءِ مُھتاج نَہ اِنت ءُ اے زمین ءَ درامدیں ڈیھ وتی چمّاں دیر بہ کن اَنت کہ اے زمین ءَ لُمّہ یاسمین ءِ وڑیں ماتے کہ وتی بچّ ءِ دست ءُ پاداں ھِنّی کنت ءُ پہ بانوریں وتن پر بند انت ءُ پہ سالونکی راہ دے اَنت ریھان پہ وتن سالونک بوت ، گوں وتی شیرزالی ءَ پَہ ھَمُک مات ءَ بَشارتے دنت ءُ اُوستانی مُھکمیں کَلات ءُ ھوبینگیں ماتاں چہ واب ءَ پاد کنت کہ ماتیں دیار ءِ مسکیں زمین ءِ آجوئی چہ زندمان ءِ کُلیں وشیاں دیم ءَ تِر اِنت۔
اے ھَبر راجدپتری راستی یے کہ کُجام کوم ءُ راجانی تَہ ءَ اے رَنگیں مات ءُ پِت ساڑی بوتگ گُڑا آ راج مروچی ھچ کَسے گُلام نہ اَنت آ ڈیھانی رُژنائیں سنج ءَ جتگ ءُ آ راج وشھال ءُ وژدل اَنت گڑا اے زمین ءِ سر ءَ ھم کَس وتی چمّاں شانک مہ دنت ءُ ھچ ڈیھ زور مہ جنت کہ ما بلوچاں وتی گُلام جوڑ کن اِیں ، دژمن بہ جزم اِیت کہ وت واجھی ءِ ھاتر ءَ اے گِچنیں سَپر بَرجاہ اِنت ءُ ھَمک مات ءُ پت چو لُمہ یاسَمین ءُ شھید جنرل استاد اسلم ءِ وڑ ءَ وتی بَچّ ءَ ھَمے سکین ءَ دَنت کہ گُلیں بلوچستان ءِ سرزمین تئی مکّھیں مات اِنت ، پَہ اشی ءِ موکگ ءَ نَدر ءُ کُربان بوَگ تئی راجی پَرز اِنت، گڑا آ بَچّ ءَ ھاکمیں وھد ءِ زوراکیں رَستر ھِچّ پیم ءَ اِیرموش کُت نَہ کن اَنت۔
جھد برجم انت ھمے جھد ءَ ھرچ سال ءُ ھرچ ماہ مئے شمئے دیم ءَ سرڈگار ءِ سرنتاب ءُ دلیریں بچ زاھری دے اَنت پری زیتّا یک راستیں تامرے گوں سبوت ءُ منّانکاں راج ءِ دیم ءَ زاھر اَت کہ آئی ءِ تہ ءَ مزاریں بچ وتی دلیری ءُ سرنتابی ءَ ھنچو پیشدارگ ءَ اَنت کہ ھرچ بلوچ ءَ ھمے گمان بیت کہ اگاں چشیں بھادر ءُ نہ ترس مئے راج ءِ تہ ءَ ھست گڑا دگنیا ءِ ھچ تاکتور مارا بندیگ ءُ گلام کت نہ کنت تامر ءِ تہ ءَ شما گِند اِت کہ شھید سنگت شاویز پنّام سارنگ تیر وارت دومی سنگت تیرانی دیم ءَ زدگیں سنگت شاویز پنّام سارنگ ءَ پہ شان بڈ ءَ کنت ءُ بارت ءُ آدگہ سنگت دژمن ءَ سر کشگ ءَ نئیل انت داں دیر ءَ اے جنگ برجاہ بیت دوئیں نیمگ ءِ تیرگواری ءَ رند باجبری ءِ بیرک ءَ سرمچار برز کن انت ءُ وتی سئیں شھیداں پہ پھر ءُ شان دژمن ءِ پروش ءَ رند بر انت پاکیں سرڈگار ءِ دلبند ءَ واپین انت۔
دلیر ھمیش اَنت جنگ ءِ وھد اِنت دژمن جتگ ءُ کیمپ ھالیگ کتگ کموکے ءَ رند بالگرد کاینت سھولت نیست راہ ءُ دگ دراہ دژمن ءَ بستگ اَنت نادراہ جاھاں اے شت نہ کن انت کہ باگی اَنت میتگاں ھم چو ھام ءُ ھاس ءَ شت نہ کن انت کہ دلار ءُ زمیرپروش میتگانی تہ ءَ اَنت۔
ھما دلار کہ یک وھدے ھمے جھد ءِ تہ ءَ بوتگ انت بلے آیاں زاناں چشیں دل مان نہ بوتگ یا آیاں وتی زمیر ءَ پہ دپارے بٹّ ءَ بھا کتگ اے ھم مر اَنت بلے ایشاں ناں راج پہ وت ءَ زیر ایت ناں دژمن ایشاں ازّت ءِ شاھیم ءَ تور اِیت بلے چہ ایشانی لگوری ءَ ناں جھد اوشت اِیت ءُ ناں ایشاں ایمنیں زند رس ایت بلکیں ھنچیں مرگے ءَ مر اَنت کہ مرگ ءَ رند ھم ایشانی تالہ ءَ راھت نبشتہ نہ بیت ءُ نیکہ ایشانی پشپد پہ ایشاں پھر کن انت بلکیں ھرکس گوش ایت کہ دریگتیں اے لانتیگ منی سیاد مہ بوتیں بلے ھمے کہ جھد ءِ تہ ءَ انت ءُ جھد ءَ پہ مردی دیم ءَ بران انت ایشاں راج ءُ راجدپتر کدی پراموش نہ کنت۔
اے دلیر ءُ نہ ترسیں سرکٹاک انچو تکانسری ءُ نہ وشیں جاورانی تہ ءَ وتی شھیداں دور نہ دے اَنت ءُ پہ ازت ءُ شان گوں وت بر اَنت ءُ ماتیں سرڈگار ءِ دلبند ءَ واپین اَنت اِش دروت ءُ سھریں سلام سر بات ھما شھیداں کہ پہ مئے باندات ءَ وتی نگرھیں ساہ ءُ سراں ندر کنگ ءَ انت-
بھشت شمئے ھنکین بات
بلوچستان آجو بات
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔