تربت ءَ آن لائن کلاسانی ھلاپ ءَ زھرشانی روانک ءُ نندانک

تربت ءَ آن لائن کلاسانی ھلاپ ءَ زھرشانی روانک ءُ نندانک

دی بلوچستان پوسٹ

ھائیر ایجو کیشن کمیشن ءِ نیمگ ءَ آن لائن کلاسانی پیسلہ کنگ ءِ ھلاپ ءَ بلوچستان ءِ شھر تربت ءَ بچک ءُ جنکیں نودربراں زھرشانی روانک کش اِتگ ءُ نندانک جتگ –

روانک ءِ بندات پبلک لائبریری ءَ چَہ بیتگ ڈگری کالج دگ ءَ گوزان ءُ بندجاھی دگ ءَ پریس کلب ءِ دیم ءَ زھرشانی کنوکاں نندانک جتگ –

زھرشانی ءَ جنک ءُ بچکیں نودربرانی بازیں کَچے ھوار بیتگ کہ آیانی دستاں پلے کارڈ ءُ بینر بیتگ اَنت کہ آیانی سر ءَ آن لائن کلاسانی ءُ بلوچستان ءَ وانگی درانگ درگان درنگولی ءِ بارو ءَ اوگان نبشتگ بیتگ – نودربرانی ھمدری کنگ ءَ جتائیں تکاں سیادی کنوکیں مردماں بھر زرتگ –

نودربراں آن لائن کلاساں ایچ اے سی ءِ وانشتی دشمنی گوشگ ءُ اے بلوچستان ءِ نودربرانی ھلاپ ءَ پندل سازی ءِ گوشتگ -آیاں گْوشت کہ بیدے بنکی لوٹ ءُ انٹرنیٹ ءِ آن لائن کلاساں رنگ نودبرانی وانگی سال ءِ زوال کنگ ءَ ابید دگہ ھچ نہ اِنت –

زانگ بہ بیت کورونا ویروس ءِ نادراھی ءِ سوب ءَ ایچ اے سی ءَ آن لائن کلاسانی گرگ ءِ ھکم نامہ ءِ جار پرینتگ اے درگت ءَ بلوچستان ءَ ھوار دگہ دمگ ءُ جاھاں نودربر وتی زھر ءِ درشان اِش کرتگ کہ آیانی گوشگ اِنت کہ دور ءُ گستا ھند ءُ دمگاں آسر کاری ءِ نہ بیگ ءِ سوب ءَ آن لائن کلاس چون سرجم بیت کن اَنت –

نودربر الائنس ءِ نیمگ ءَ سندھ ءِ بنجاھی شھر کراچی ءَ پیسلہ ءِ ھلاپ ءَ سَے روچ ءَ شدکشیں ھرتالی بنجل ءِ برجم کنگ بیتگ کہ گوستگیں روچ ءَ ھلاس بیتگ اشی ءَ ابید شال ءُ بلوچستان ءِ دگہ شھراں اے بارو ءَ زھرشانی درچ ھم برجاہ اَنت –

نودربر الائنس ءَ ھواریں گل بلوچ اسٹوڈنٹس ایکشن کمیٹی ءِ بیان ءَ گْوشگ بیتگ کہ بی ایس اے سی ءُ ایشی ءِ ھمسنتیں کونسلز اے پیسلہ ءِ ھلاپ ءَ دلجمی ءَ اے زھرشانی وتی بنکی ھکانی لوٹ سرپد بہ بنت ءُ اے ھکانی پد جنی ءَ کامرد کنان ءَ آیوکیں روچاں زھرشانی دروشماں گیشتر ترندتر بہ کن اَنت –