نبشتانک:کولواہ پد ءَ پہ نازاں بوت
نبشتہ کار: ماھکان بلوچ
دی بلوچستان پوسٹ
راجدپتر ءَ ھما نبشتہ کنت کہ چہ وتی واھگ ءِ جنّت ءَ در کَیت ءُ زِندگی ءَ نوکیں نامے شکسائیت ، زِندگی ءَ ابدمانیں زِندمان ءِ سمبھینگ ءَ ندْر ءُ کُربان کنت۔ پہ آ نامانی پُولگ ءَ مارا ویتنام ، الجزائر ، نیدرلینڈ ،کوریا ، بنگلہ دیش ءُ اے دِگہ مُلکانی بامرد ءُ راجی داستان وانگ نہ لوٹ اَنت ۔
وانگ اے ھاتر ءَ نہ لوٹ اَنت کہ بلوچ راج ءَ وت انچیں سر ودی کُتگ آ پہ مئے آکبت ءِ سمبھینگ ءَ چیدگ ءُ بے درور اَنت ، اگاں ما آیانی رند پد ءُ رستگیں دگ ءَ سپر بِہ کن اِیں، آیانی پند بُرّ اِتگیں دگ مارا مئے مِنزل ءِ ڈسّ ءَ دنت ۔
آ نامانی تہ ءَ بلوچ نیشنل موومنٹ ءِ بانی رھشُون واجہ گُلام مھمد بلوچ گوں سنگتاں ، واجہ ڈاکٹر منّان بلوچ گوں سنگتاں ، اُستاد جنرل اسلم بلوچ گوں سنگتاں ، پِدائیگیں ورنایانی گچینیں کِشک ءُ لیکہ وت درونتے اگاں کسے در بِہ بارت ءُ وت ءَ ، وتی راجی ڈُبّہ ءَ بِہ زانت ءُ سرپد بِہ بیت۔
مرچی ھما کاروان ءِ دو ورنائیں بلوچ ءِ پُسّگ پہ ماتیں وتن ءِ آجوئی ءِ ھاتر ءَ ندْر بوتگ اَنت بلے سرجھل اِش نہ کُتگ ، نیکہ زِیکّیں لگورانی وڑ ءَ ھمُک دیواناں مزن مزنیں بٹاک جت ءُ دومی ءَ را اِیرجت کہ پِلانی ءِ سر ءَ مارا شک اِنت اے کمبھت وتی دیم ءَ سْیاہ مہ کنت۔
بلے پِلانی پہ ڈیھ ءَ کُربان بوت ءُ تو پہ سرجھلی نامے نوک کُت ، اے دوئیں نام راجدپتر ءِ تاکانی دیم ءَ نبشتگ بنت گوں وتی کِرد ءُ کارپداں ۔
آیوکیں پدریچ وھدے راجدپتر ءِ تاکاں لیٹینان کنت ءُ وان اِیت گُڑا دوئیں کارِست آئی ءِ چمّانی زینت بَہ اَنت ، بلے وژنام ھما نام بَہ اَنت کہ دُژمِن ءِ گونڈلیں تیر سینگ ءَ وارتگ اَنت ءُ ھونانی ھار مِسکیں ڈگار ءِ دِلبند ءَ تاتکگ ۔
آیاں کہ دُژمِن ءِ دیم ءَ سرجھل کُتگ ءُ سلامی داتگ ، آیانی زھگ ءُ پسائندگ داں زِندگاں گوں بدّیں نام ءَ یات کنگ ءُ گیر آرگ بنت ، بلے کسے کہ شھید کامریڈ اسد جان ءُ شھید راشد سوبین ءِ زھگاں گِند اِیت پہ پھر ءُ شان گْوش اِیت اِیشیانی پِت ماں ڈیھ پاسپانی ءِ جنگ ءَ شھید کنگ بیتگ اَنت ۔
پرے ھاتر ءَ دنیا ءِ زانتکار گْوش اَنت کہ مرگ ءَ پد ھما نام زندگ مان اَنت کہ آیاں زندگی ءِ ھکّ ءُ کیمت اَدا کُتگ ۔ مرچی پمیشکا من اے گپ ءِ گْوشگ ءَ چکّ ءُ پد نہ باں ، بلکیں پہ پھر گْوش آں کہ شھید اسد جان ءُ شھید راشد جان ءَ زندگی ءِ ھکّ ءُ کیمت اَدا کُتگ ۔
آیاں زانتگ کہ اے دو روچی زند ءَ پد مرگ پہ بنی آدم ءَ الم اِنت ، بلے وژنامیں مرگ ءِ گچین گوں ھرکسی جِند ءَ بندوک اِنت کہ آ وتی لیکہ ءِ پُشت ءَ وت ءَ کُربان کنت بلے لیکہ ءِ کُربانی کدی نہ دنت ۔
گُڑا اے گپ ءِ تہ ءَ ھِچّ شک نیست کہ راجدپتر نویس ھمے بامرد بنت کہ وتی ھوناں گوں اے داستان ءَ نبشتگ کن اَنت پہ آیوکیں پدریچ ءَ کہ ما پہ شُمئے وشیں باندات ءَ وتی سر کُربان کُتگ ، نوں گْرانیں بار شُمئے کُوپگان اِنت کہ داں آپسرے ءَ وت ءَ سر بِہ کن اِت ۔
اگاں لگوری ءِ بدّیں نام پہ وت شات کُت گُڑا پہ جزم بِہ زان اِت کہ آجوئی وابے مان اِیت ءُ شُمئے نام ءُ توار چہ جھان ءِ دمکاں زُوت گار ءُ بیگواہ بیت ،کس شُمے نام ءَ نہ گیت اے دمگ ءِ تہ ءَ بلوچ نامیں راجے بوتگ ۔
اے پیسلہ مرچی بلوچ ءِ ھر زھگ ءِ وتی جِند ءِ دست ءَ اِنت کہ آ کُجام داستان ءَ وتی راج ءِ نام نویسگ لوٹ اِیت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔