TBP Balochi

پاکستانی پوج ءَ کاروائی ءِ میان ءَ بازیں لوگاں چہ گرانبھائیں ساز ءُ سامان وتی ھمراھی ءَ برتگ اَنت-

بلوچستان ءِ دمگ کیچ ءِ تھسیل تمپ ءَ چہ پُل آباد ءَ سر بیتگیں ھالانی رِد ءَ دوشمبے ءُ سے شمبے ءِ میانی شپ ءَ پاکستانی پوج ( ایف سی) ءِ کارندھاں ولی محمد نامیں شھری ءِ لوگ سر ءَ بیڑبرتگ-

اے دمگ ءَ محبوب بلوچ، دودا بلوچ آیت اللہ ءُ نیاز نامیں مردمے ءِ لوگ سر ءَ ھم بیڑبرتگ اود ءَ اے میان ءَ کارندھاں لوگاں ساڑی ئیں مردمانی سر ءَ زوراکی کتگ ءُ آ سنگین ءِ بیھار داتگ اَنت-

چمّگد ءُ دمگی اِھوالکار ءِ رِد ءَ کارندہ لوگ ءَ پُترتگ اَنت پروشت ءُ پروش بندات کتگ اِت، چریشی ءِ آسر ءَ دروازگ، دریگ ءُ لوگانی گرانبھائیں سامان تباہ بیتگ اَنت-

اِھوالکار ءِ گْوشگ اِنت کہ پاکستانی پوج ءِ کارندھاں لوگاں چہ گرانبھائیں سامان، موباھل پون، پریج ءُ ای سی ھم وتی ھمراھی ءَ برتگ اَنت-

ولی محمد ءِ درگت ءَ گوشگ بیگ ء اِنت کہ آ بلوچ راجی زرمبشت ءِ سروکیں رھشون ءُ زورانسری بیگواہ واحد کمبر ءِ نزیکیں سیاد اِنت-

دمگی پارٹیانی گوشگ اِنت کہ اے کاروائی بلوچستان ءَ برجاہ، مچی سزا ” پالیسی ءِ دْرچ بھر اِنت، چریشی ءِ بُنیاد ءَ ھما مردماں نشانگ کنگ ءَ اَنت کہ آیانی سیاد بلوچ آجوئی لوٹوکیں زرمبشت ءِ بھر اَنت-

تمپ ءِ جتاجتائیں دمگاں کہ اود ءَ ملانٹ، گومازی، کوشنکلات، ملک آباد ءَ ھم پاکستانی پوج ءِ نیمگ ءَ چہ مزنیں کچے ءَ لوگانی سر ءَ بیڑبرتگ ءُ آپریشن ءِ ھال اِنت-

زانگ بہ بیت کہ اشی ءَ ساری ھم پاکستانی پوج ءَ نوشکی، گوادر ءُ کیچ ءَ آجوئی لوٹوکانی لوگ سر ءَ اُرش ءُ لوگانی لوڈینگ ءِ بازیں وئیلاً ھمگرنچ بیگ ءِ بھتام جنگ بیتگ، وھدے اے میان ءَ آجوئی لوٹوکانی نزیکیں سیاد ءُ پت ءُ مات ھم زورانسری آوار جنی ءِ نشانگ کنگ بیتگ اَنت-

بلوچستان ءِ جھمنندیں بھتام اِنت کہ پاکستانی سیکیورٹی ادارہ، آیانی تہ ءَ ایف سی ءُ چیریں ادارہ ھوار اَنت، وتی لوٹ ءِ آسر کنگ ءُ سیادانی سیاسی یا سلاہ بندیں پُرکارانی گر ءُ دار ءِ ھاتر ءَ آیانی کھولاں نشانگ کن اَنت-

ھمے وڑ اے ماھاں پاکستانی پوج ءِ واکدار نیمگ ءَ چہ سلاہ بندیں گلاں چہ ھمگرنچیں مردمانی کھولاں اے کلوہ دیگ بیتگ کہ آ پریس کانفرنس ءَ چہ وتی سیاداں گوں دزکشی ءِ جار ءَ بہ جن اَنت، چریشی ءَ بلوچستان ءِ سیاسی پارٹی ءُ انسانی ھکانی گلاں دلپدردی درشان اِتگ-

بلوچ ریپبلیکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ءَ چہ تھی سندھ ءُ پنجاب ءَ رؤکیں راجی شھدگ سبی ءِ دمگ لیمجی ءِ ھند سر ءَ ناکہ بندی کتگ ھرچ وڑیں ٹرانسپورٹ سرجمی ءَ پٹ ءُ پول کتگ اَنت- سرمچاراں پٹ ءُ پول ءِ میان ءَ سامان بروکیں چار گاڑیانی سر ءَ تیرگواری کتگ ءُ ناکارہ کتگ اَنت، ءُ ڈرائیور کڈن کتگ ءُ یل داتگ اَنت-

جارکش ءَ گوشتگ کہ بلوچ ریپبلکن گارڈز ءِ سرمچاراں بولان ءِ دمگ ڈھاڈر ءِ نزیک ءَ اوچ پاور پلانٹ ءَ چہ آؤکیں لین ءِ دو مزنیں ٹاور تراکناکیں شورو پٹ کتگ ءُ تراکینتگ ءُ سک تاوان داتگ اَنت-

جارکش ءَ گوشتگ مئے گل بلوچ ریپبلکن گارڈز اے اُرشانی زمہ واری ءَ منّ اِیت ءُ اے وڑیں اُرش ءَ بلوچستان ءِ وتواجھی ءَ تاں برجاہ دار اِیت-

بلوچستان ءِ جتا جتائیں جاھاں سلاہ بندیں گلانی نیمگ ءَ پاکستانی پوج ءِ سر ءَ ترندیں اُرش برجاہ انت کہ اود ءَ بکتر بندیں گاڑی ءَ ھوار پوجی کارندہ نشانگ کنگ بیتگ انت-

گیشیں ھالانی بلوچستان ءِ دمگ مستونگ ءَ سلاہ بندیں اُرش ءُ بمب تراک ءَ پاکستانی لشکر نشانگ جوڑ کنگ بوتگ اَن کہ ایشی ءِ سبب ءَ لشکر ءَ جانی تاوان رس اتگ وھدے کہ یک بکتر بندین گاڑی یے تباہ بوتگ۔

مستنگ ءِ دمگ اسپلنجی ءَ سلاہ بندیں مردماں سلاہ بندیں اُرش ءَ پاکستانی لشکر ءِ پیادگیں کارندہ نشانگ جوڑ کتگ ءُ پد ءَ بمبتراک ءِ آسر ءَ بکتر بندیں گاڑی یے تباہ کتگ۔

دمگی مردماں ٹی بی پی ءَ گْوشتگ کہ پاکستانی لشکر ءِ پیادگیں کارندہ گوستگیں روچ ءَ یک اُرشے ءَ سلاہ بندیں مردمانی نشانگ جوڑ کتگ اَنت وھدے کہ لشکر دمگ ءَ ایریں ’بلوچستان ءِ بیرک‘ ءِ لُڑینگ ءَ سر بوتگ اَنت۔

اُرش ءَ پد پورسز ءِ گاڑی ءُ موٹر سائیکل ءِ سر ءَ دمگ ءَ دیم ءَ شتگ اَنت کہ ایشی ءِ سر ءَ ناشناسیں مردماں لورسز ءِ بکتر بندیں گاڑی ءَ را تراک ءِ تہ ءَ نشانگ جوڑ کتگ ءُ تباہ کتگ ءُ تراک ءِ تہ ءَ فورسز ءِ موٹر سائیکل سواریں کارندہ ءِ ٹکر ٹکر بوگ ءِ ھال ھم ھست انت۔

ھمے ڈول ءَ نوشکی ءِ دمگ احمد وال ءَ گوستگین روچ ءَ پاکستانی پوج ءِ کارندھاں بروکیں بس ءُ آئی ءِ سیکورٹی دیوکیں پوجی گاڑی سلاہ بنداں نشانگ کتگ انت-

دمگی مردمانی رد ءَ پوجی کارندھانی بروکیں یک بسے اُرش ءِ زد ءَ اتکگ ءُ چریشی ءَ بازیں کچے ءَ جانی تاوانانی دیمپانی ءِ ھال انت-

ھمے ڈول ءَ مروچی نوشکی ءِ ھند مَل ءَ شال – تپتان دگ ءَ سَے گاڑی سلاہ بندیں مردماں نشانگ کتگ انت-

دمگی مردمانی رد ءَ سلاہ بنداں بوزر ءُ دگہ گاڑیانی ٹائر بشٹ کتگ ءُ ناکارہ کتگ-

ھمے وڑ ءَ تربت ءَ بنجاھی شھدگ ءِ سر ءَ غلام نبی چوک ءِ نزیک ءَ پاکستانی پورسز ءِ یک چوکی یے سلاہ بنداں نشانگ کتگ-

پولیس ءِ رد ءَ تراک ءِ آسر ءَ دو رھگیر زدگ بیتگ انت کہ آ نزیکیں ھسپتال ءَ سر کنگ بیتگ انت – زدگ بیتگیباں ارمان ء مختار ءُ شمشیر خان ھوار انت-

ڈیرہ بگٹی ءِ دمگ سوئی رنگ دگ ءِ مندر کالونی ءِ نزیک ءَ ناشناسیں سلاہ بندیں مردم ءُ فرنٹیئر کور (ایف سی) ءِ نیام ءَ تیرگواری بوتگ کہ ایشی ءِ آسر ءَ ایف سی ءِ دو کارندہ ٹپیگ بوتگ اَنت۔

دمگی مردمانی رد ءَ اے وئیل ھما وھد ءَ بوتگ کہ مندر کالونی ءِ نزیک ءَ ناشناسیں سلاہ بندیں مردم ءُ ایف سی ءِ کارندہ دیم پہ دیم بوتگ اَنت کہ ایشی ءِ پد ءَ دوئیں نیمگاں چہ مزنیں تیرگواری بوتگ۔

بنشون ءَ گشتگ کہ تیرگواری ءَ ایف سی ءِ دو کارندہ ٹپیگ بوتگ انت کہ یکے ءِ جاور ھال نگیگ انت۔ ٹپیگیں کارندہ نزیکیں نادراھجاہ ءَ پہ جاندراھی ءِ واستا دیم دیگ بوتگ اَنت۔

وئیل ءَ پد پاکستانی لشکر ءَ دمگ ءَ سرچ آپریشن بندات کتگ بلے تیر گواری ءَ ھواریں سلاہ بندیں مردم چہ جاہ ءَ درکپگ ءَ سوبین بوتگ اَنت۔

انگت ءَ ھچ گل ءَ اے وئیل ءِ زمہ واری نہ زرتگ ءُ واکداراں گیشتریں ھال شنگ نہ کتگ اَنت-

بلوچ یکجھتی کمیٹی بُنجاھی رھشون سمی دین بلوچ ءَ گْوشتگ کہ مروچی بلوچستان ءَ انچیں مردم ھست اَنت کہ اود آئی ءِ زورانسری آوار جنی ءِ وھد ءَ چہ ھم کسان تر اَنت-

آئی ءَ گوشتگ کہ آ ھمے وڑ مزن بیتگ اَنت آیاں اے چھرگ پوسٹرانی سر ءَ، زھرشانی بُنجلاں، ءُ یک انچیں کھولے ءِ دست ءَ دیستگ اَنت کہ آیاں سال پہ سال ھمے جُھد کتگ کہ آ ساڑی اِنت، کہ آ دوستانک بیتگ، ھمے ھاتر ءَ برگ بیتگ ءُ کسے ناں کسے الّم زانت ئِے کہ آ کجا اِنت – ھپدہ سال ھساب نہ بنت- اے مید اسپیت بیگ- اے یک ماتے ءِ ھرچ در ءَ توار ءَ سر کنگ ءُ پد ءَ ھم در ءِ نیمگ ءَ چارگ- اے ھرچ عید ءِ لوگ ءِ بھر بیگ اِنت کہ آئی ھچ کس پُر کنگ نزانت – اے یک انچیں کھولے یک نا سرجمیں زند ءِ گوازینگ ءَ لاچار کنگ بیتگ اَنت-

آئی ءَ گوشتگ کہ مروچی، بلوچستان ءَ بیگواھیں مردمانی روچ ءَ ما ذاکر مجید ءُ ھما سرجمیں مردماں یات کن ایں کہ آیانی نام سالانی سال بے تواری ءَ کشگ بیتگ اَنت- بلے یات کنگ ھم بس نہ اِنت وھدے یک مردمے اینچو سالاں چہ بیگواہ بہ بیت کہ یک پدریچے آئی ءِ بے ساڑی بیگ ءَ وارسی ءَ بہ زور اِیت-

دیمتر ءَ گوشتگ کہ ذاکر مجید کجا اِنت؟ ھپدہ سال ءَ پد ھم اے جُست ھما جاہ ءَ ایر اِنت اود ءَ اے کھول ءَ اولی رند ءَ کتگ : واکدار ءِ دیم، آمیدگسانی دیم ءَ، ءُ یک انچیں ڈیھے ءِ زمیر دیم کہ نو بیگواھیں مردمانی گپ ءَ دلگوش گور نہ کنگ دبرتگ-

یک زورانسری آوار جنی اے وھد ءَ تاں ھلاس نہ بیت وھدے راج آئی ءِ درگت ءَ اش اشنگ ءَ دمبر اَنت یا کہ وھدے ریاست وتی” بیگواھیں مردمانی ” درشاناں مٹ کنگ ءِ پیسلہ بکنت-

سمی ءَ گوشتگ کہ اے وھد ءَ ھلاس بیت وھدے راست واتر کنگ بیت- اے وھد ءَ گیشتر مردم تھنا وتی دوستاناکانی کبرانی نشانی ءَ لوٹگ ءَ اَنت-

پنجگور ءَ ڈیتھ اسکواڈ کارندھاں دو ورنا آوار جتگ ءُ بیگواہ کتگ اَنت-

گیشیں ھالانی رِد ءَ پنچ جون 2026 ءَ چہ پنجگور ءَ ھاجی یاسین مارکیٹ ءَ پاکستانی پوج ءِ چیر دستی ءَ کارکنوکیں ڈیتھ اسکواڈ ءِ کارندھاں بیست ءُ دو سالی ئیں نبیل ء رحیم بخش جھمنند چتکان پنجگور ءَ آوار جتگ ءُ بیگواہ کتگ اَنت-

ھمے وڑ ھپت جون 2026 ءَ پاکستانی پوج ءِ جوڑ کتگیں ٍڈیتھ اسکواڈ کارندھاں پنجگور ءَ سی پیک دگ سرسند ءَ بیست ءُ دو سالی ئیں مجاھد ء ھبیب جھمنند کلری پروم پنجگور آوار جتگ ءُ بیگواہ کتگ اَنت-

زانگ بہ بیت اشی ءَ ساری ھم بلوچستان ءِ جتاجتائیں دمگاں پاکستانی پوج ءِ چیردستی ءَ کارکنوکیں ڈیتھ اسکواڈ کارندھانی دست ءَ آوار جنگ ءُ بیگواہ کنگ ءَ پد آیانی تیرسُپتگیں لاش دزکپتگ اَنت –

سیاسی پارٹیانی نیمگ ءَ ھمے بھتام جنگ بیتگ کہ ڈیتھ اسکواڈ کارندھاں پاکستانی پوج ءُ چیریں ادارھانی پلارمرزی گون اِنت-

شال ءِ دمگ چہ کلی الماس ءَ بالی پٹ دگ ءَ پانزدہ سالی ئیں قدرت اللہ بلوچ ء سفر خان بلوچ زورانسری ءَ بیگواہ کنگ ءِ کیس پدر بوتگ۔ ھالانی رد ءَ قدرت اللہ کہ پیشہ ءِ رد ءَ مزدورے 17 مئی 2026 ءَ یک بج ءِ نزیک ءَ سی ٹی ڈی ءُ انٹیلی جنس ایجنسیاں چہ آئی ءِ لوگ ءَ دزگیر کتگ ءُ ھاندان ءِ گشگ اِنت کہ دزگیر کنگ ءَ پد آئی ءَ را ناشناسیں جاھے ءَ برگ بوتگ وھدے کہ آئی ءِ بابت ءَ انگت ءَ ھچ وڑیں ھال ءُ اھوال دیگ نہ بوتگ۔

دومی نیمگ ءَ نیشنل کالج آف آرٹس ( این سی اے) لاھور ءِ فلم سازی ءِ تک ءِ نودربر محراب خالد یل کنگ بوتگ ۔ بیست ءُ نُھ مئی ءِ شپ ءَ ساھت 12:30 ءِ نزیک ءَ محراب خالد زورانسری ءَ بیگواہ کنگ بوتگ۔

بنشون ءِ رد ءَ آئی ءِ ھمراھی ءَ ھشت دگہ ھمکلاس ھم دزگیر کنگ بیتگ اَنت کہ رند ءَ آ یلہ کنگ بوتگ اَنت بلے مھراب خالد بازیں روچاں بیگواہ بوتگ۔ آئی ءِ یل بوگ ءِ ھال راست کنگ بیتگ۔

دومی نیمگ ءَ ھرنائی ءِ دمگ جلال آباد ءِ نندوکیں میر چاکر مری ء الاھی بخش ھم یل کنگ بوتگ۔ 14مئی 2026 ءَ زورانسری ءَ بیگواہ کنگ بوتگ ءُ آئی ءِ لوگ ءِ مردمانی گشگ ءِ رد ءَ 3 جون 2026 ءَ لورالائی ءَ یل کنگ بوتگ۔

بلوچ نودربرگل آزاد ( بی ایس او آزاد) ءِ بنجاھی جارکش شولان بلوچ ءَ ھشت جون زورانسری آوار جنگ بوتگیں مردمانی روچ ءِ درگت ءَ رسانکدراں وتی شنگ کرتگیں درشانے ءِ تہ ءَ گوشتگ کہ ھشت جون گل ءِ نیمگ ءَ زورانسری آوار جنگ بوتگیں مردمانی نام ءَ ایر کنگ بوتگ کہ اشی ءِ مول زورگیریں پاکستانی پوج ءِ دست ءَ زورانسری آوارجنگ بوتگیں بلوچ پرزندانی یات کنگ انت ءُ آیانی ھاتر ءَ توار چست کنگ ءَ ھوار ھوار بلوچستان برجاھِیں انسانی ھکانی جرمے پدر کنگ انت ۔ بلوچستان ءَ زورانسری آوارجنی ھمک روچی کارے جوڈ بوتگ کہ ھر روچ بلوچستان ءَ بازیں بلوچے زورانسری آوار جنگ ءُ بندیگ جاھاں ازیت دیگ بیت انت ۔ آیانی تہ ءَ ھر تکاں سیادی داروکیں نودربر ، سیاسی باسک ، اھوالکار ، ماسٹر ، دھکانکار ، دکاندار ، ڈریور ، باپاری مردم ءُ لس مھلوک ءَ ھوار زھگ ءُ زالبول کماش ھوار انت ۔

جارکش ءَ گوشتگ کہ رپورٹانی رد ءَ سال 2025 ءَ 1223 مردم پاکستانی پوج ءَ آوار جتگ ءُ بیگواہ کتگ کہ آیانی تہ ءَ 832 ھنگت ازیت جاھاں بند انت ۔ اے رپورٹاں ابید دگہ بازیں کیس ءِ ھست کہ آیانی کھولاں ریاست ءِ ترس ءُ بیھاراں رپورٹ نبشتہ نہ کنائینتگ انت چریشی ءَ اے جیڑہ انسانی نیستی ودی کنگ ءَ انت ۔

جارکش ءَ گوشتگ کہ زورانسری آوار جنی سنگینیں جرمے کہ اشی ءِ گر ءُ دار ءَ اقوام متھدہ ءَ ھوار ایندگہ انسانی ھکانی ادارہ سر ءُ پر کنگ انت بلے بلوچستان ءَ زورانسری آوار جنی بگیری ءَ توار چست کنگ ءُ اے کتکاریانی وکالت ابید اے ادارہ اشی ءِ گر ءُ دار ءَ بے سوب انت ۔ ھما زوراکیاں گوں زورگیریں پاکستان بلوچ ءِ چکچینی ءَ کنگ ءَ انت ءُ مردماں آوار جنگ ءُ بندیگجاھاں ازیت دیگ ءَ انت ۔ آیانی تہ ءَ اگاں کسے یل ھم بہ بیت آئی ءِ سرجمیں زند ٹراما ءِ تہ گوز ایت ۔ بوت کنت جھان ءَ چشیں درور ءِ بہ بیت بلے میان استمانی ادارھانی منافقت ءِ ھم ھد ایں کہ اے وڈیں زورگیریں ریاست ءِ گرءُ دار وتی زمہ واریانی پیلو کنگ ءَ بے سوب انت ۔

شولان ءَ گوشتگ کہ پاکستان ءِ ٹارچر سیلاں ھر بلوچ ءِ کہ در اتکگ آیانی پدردی کسھاں سرجمیں بلوچ سرپد انت بلے اے کسہ ناکہ مزنیں پردہ ءِ سرا پیشدارگ بنت ناکہ میان استمانی ادارہ اے نیمگ ءَ دلگوش دئینت ۔ بلے زمینی راستی ھمیش انت کہ بلوچ راج ٹراما ءِ تہ ءَ زندگی کنگ ءَ انت ۔ بلوچستان ءَ ھر یک کھول ءِ ھمے ترس ءِ تہ ءَ انت کہ آئی ءِ دوستیگیں مردم واتر گس ءَ کئیت یا ناں ۔ پرچاکہ بلوچ وتی گساں ، وانگجاہ ءُ شھدربرجاھاں ، سپر ، باگاں ھچ جاہ پھریز نہ انت ۔ زورگیریں استان چہ بلوچ راجی زرمبشت ءَ ھنچوش ترس ایت کہ آ بلوچاں وتی جوڈ کتگیں آمیدگسانی تہ ءَ آرگ ءَ ھم ترس ایت پرچاکہ آ سرپد انت کہ اے جھد ءَ ھواریں مردمانی بگیری ءَ ھچ وڈیں کانودی کاروائی بوت نہ کنت ۔ بلوچ راجی زرمبشت ءَ چیردئیگ ءُ وتی زورگیری ءِ برجاہ دارگ ءِ ھاتر ءَ زورانسری آوارجنی ءِ سھارگ ءَ زورگ ءَ انت. بلے بلوچ راج ءَ ھچبر زورگیر ءِ دیم ءَ سرجھل نہ کتگ ءُ ناکہ ایردستیں بلوچستان ءَ چہ دزبردار بوتگ ۔

جارکش شولان بلوچ ءَ گوشتگ کہ بلوچستان ءَ ھشت جون زورانسری آوار جنگ بوتگیں مردمانی یات ءَ دارگ بیت کہ اے روچ بی ایس او آزاد ءَ ایر کتگ ھمے روچ ءَ زورگیریں استان ءِ پوج ءُ چیریں ادارھاں گل ءِ گوستگیں کمک سرکماش زاکر مجید بلوچستان ءِ دمگ مستونگ ءَ زورانسری آوار جتگ ءُ بیگواہ کتگ کہ روچ مروچی پاکستان ءِ ازیت جاھاں بندیگ انت ۔ ھمے روچ ءَ ما ھر ھما بلوچ پرزنداں یات کنیں کہ آیانی زند زورگیریں پاکستان ءَ تباہ کتگ انت ۔ ھزارانی کچ کھول ازیت تہ ءَ کتگ انت ۔ اے روچ مارا مردمگری ءُ زند ءِ ارزشت کنگ ءِ یاتاں دنت ءُ ما زندگیں راجے ءِ وڈا وتی مردمانی یل کنائینگ ءِ ھاتر ءَ مدامی جھد کن ایں ۔

ھزدار ءِ دمگ نال ءَ آجوئی لوٹوک ءُ پاکستانی لشکر ءِ نیام ءَ مزنیں جنگ ءُ چوپ دوشمبے ءِ روچ ءَ برجاہ بوتگ ءُ دمگی مردمانی رد ءَ آجوئی لوٹوکاں سرکاری گچینی جاھانی سر ءَ کنٹرول برجاہ داشتگ۔

دمگی مردم ءُ چمدیستگیناں گشتگ کہ آجوئی لوٹوکاں سرکاری کارگس، بینک، لیویز بنجل ءُ تھانہ دستیگ کتگ انت۔ ھالانی رد ءَ اے بنجلانی سر ءَ کنٹرول ءِ گرگ ءَ پد لھتیں سرکاری ماڑی سوچگ بوتگ انت کہ ایشی ءِ آسر ءَ دمگ ءِ جتا جتائیں دمگاں دوت چو جمبر ءَ چست بوھگ ءَ گندگ بوتگ انت۔

چمدیستگیں مردمانی رد ءَ سرجمیں روچ ءَ جتا جتائیں جاھاں تیرگواری ءُ جنگ ءُ چوپانی توار وھد وھد ءَ گوشدارگ بوتگ انت۔ بلے بیران ءُ ٹپیانی کساس ءِ بابت ءَ ھچ وڑیں پدریں ھال ءُ اھوال شنگ نہ بیتگ انت۔

انگت ءَ سرکاری واکدارانی نیمگ ءَ چہ اے جاور ھال ءِ سر ءَ ھچ وڑیں سرجمیں سرکاری بیان شنگ نہ بوتگ۔ ھمے رنگ ءَ اے ھال سرکاری تک ءَ ھم نہ پدر ءُ رد کنگ بوتگ اَنت۔

تیابدپی شھر گوادر ءِ دمگ سنٹسر ءَ ناشناسیں سلاہ بندیں مردماں پولیس ءِ چیک پوسٹ ءِ سر ءَ اُرش کتگ ءُ اود ءَ پوسٹ بوتگیں کارندہ آوار جتگ ءُ سرکاری سلاہ ءُ سرکاری گاڑی دستیگ کتگ انت۔

دمگی مردمانی رد ءَ سلاہ بندیں مردماں چیک پوسٹ انگیر کتگ ءُ کارندہ دزگیر کنگ ءَ پد سرکاری سلاہ ءُ یک سرکاری گاڑی یے برتگ۔ اے وئیل ءِ تہ ءَ ھچ وڑیں تاوان ءِ ھچ وڑیں ھال ءُ اھوال نہ بوتگ۔

ھمے ھپتگ ءَ گوادر ءَ اے وڑیں دومی وئیل بیت۔ ایشی ءَ چہ پیسر 4 جون 2026 ءِ بیگاہ ءَ گوادر ءِ دمگ کنٹانی ھور ءَ بیڑ ءِ وھد ءَ پولیس ءِ چار کارندھانی دزگیر کنگ ءِ ھال بیتگ۔ سلاہ بندیں گل بلوچستان لبریشن فرنٹ ءَ اے وئیل ءِ زمہ واری زرتگ ات ءُ گشتگ ات کہ ارش کنوکاں چہ کارندھانی دست ءَ سرکاری کلاشنکول گوں میگزین ءُ گاڑی یے ءَ دست گپتگ۔

گل ءِ نیمگ ءَ چہ شنگ بوتگیں بیان ءَ گشگ بوتگ کہ گپتگیں کارندہ دمگی گاڑیاں چہ زرّ ءِ زورگ ءَ ہوار بوتگ انت۔

گوستگیں روچاں جتاجتائیں دمگاں سلاہ بندیں چست ءُ ایر ءُ پاکستانی لشکر ءَ نشانگ جوڑ کنگ ءِ وئیل گیش بوتگ انت۔