بلوچستان: دگ ءِ وئیلاں سیل ءُ سواد ءَ اتکگیں پُرتگالی ءَ ھوار چار مردم بیران، یک مردمے ءِ جونے دست کپتگ

سربوتگیں ھالانی رِد ءَ بلوچستان ءِ دمگ دالبندین، گوادر، شال ءُ کراچی شھدگ ءِ سر ءَ بوتگیں دگ ءِ وئیلاں چہ پُرتگال ءَ اتکگیں سیل سوادی ءَ ھوار چار مردم بیران دو زدگ بوتگ انت –

گیشیں ھالانی رِد ءَ بلوچستان ءِ دمگ چاگی ءَ دالبندین ءِ نزیک ءَ دگ ءِ وئیل ءَ سیل ءُ سواد ءَ اتکگیں پرتگالی ءِ بیران بوتگ – سرکاری واکداراں آئی ءِ بیرانی ءِ ھبر راست کُتگ ءُ گوشتگ کہ بلوچستان ءِ بنجاھی شال ءُ تپتان ءِ آر سی ڈی شھدگ (N40) ءِ سر ءَ ایرانی زمباد گاڑی ءِ ڈیکر کنگ ءَ مونو میگوئل ولاؤ کاسٹانہیر بیران بوتگ –

ھالانی رِد ءَ سیل ءُ سواد ءَ اتکگیں بیست ءُ ھشت سالی پرتگالی ءِ گور ءَ CD233459 پاسپورٹ بوتگ ءُ آ تر ءُ تاب ءَ اتکگ بوتگ – تپتان ءُ شال ءِ سپر ءِ میان ءَ آئی ءَ جرمنی ءِ دوھمراہ ٹونی پینکراز لنڈر ءُ نکولس لینگ ھم گون بوتگ انت کہ پرپٹ اش گون بوتگ وھدیکہ لیوز ھم آھانی نگھپانی ءَ گون بوتگ – وئیل ءَ گاڑی ءِ ڈرائیور ءُ کلینڈر ھم زدگ بوتگ انت –

وئیل ءَ پد واکداراں ھما دمان ءَ مونو میگوئل ویلاؤ کاسٹانہیرا دالبندین ءِ پرنس فہد نادراھجاہ ءَ سرکتگ بلے پدا ھم آ نہ رک اِتگ وھدیکہ زدگ بوتگیں ڈرائیور ءُ کلینڈر درمان کنگ بوتگ ءُ گیشیں جست پُرس کنگ ءِ ھاتر ءَ لیویز ءَ آ دزگیر کتگ انت –

سرکاری واکداراں اے ھبر راست کتگ کہ اے سیل سوادی یک ءُ دو اگست دوھزار ءُ بیست ءُ چہ تپتان پی آئی بی، ایف آئی اے گیٹ ءَ پاکستان ءَ اتکگ انت واکدار وئیل ءِ درگت ءَ گیشیں پٹ پول کنگ ءَ انت –

دومی نیمگ ءَ شال ءُ کراچی شھدگ ءِ سر ءَ جنگل کراس ءِ نزیک ءَ مزدا بسے ءَ پرپٹ ءِ ڈیکر کتگ ، وئیل ءَ پرپٹ ءَ سواریں عبدالباسط جھمنند زیارت بیران بوتگ –

بیران بوتگیں باسط ءِ جون اژدری چار ءُ ٹپاس ءِ ھاتر ءَ نواب غوث بخش رئیسانی نادراھجاہ ءَ برگ بوتگ –

چہ گوادر ءَ ھم دگ ءِ وئیلے ءِ ھال آیگ انت کہ مکران کوسٹل ہائی وے ءَ شنکانی در ءَ آپ ءِ ٹینکر ءُ گوں پرپٹے ءَ ڈیک وارتگ –

وئیل ءَ پرپٹ ءَ سواریں ھردو مردم بیران بوتگ انت ءُ ٹینکر ڈرائیور ھما دمان ءَ دزگیر کنگ بوتگ انت –

بیران بوتگیں مردمانی پجار محمد یاسین ء محمد عثمان ءُ محمد علی ءِ سبزل ءِ ناماں چہ بوتگ انت ھردو کیچ ءِ جھمنند انت –

دومی نیمگ ءَ بلوچستان ءِ دمگ اوستہ محمد حیدر شاہ کبرستان ءِ نزیک ءَ یک مردمے جون ءِ دست کپتگ –

واکدارانی رِد ءَ دمگی مردماں جون ءِ ھال مارا سرکتگ، گندگ ءَ آئی ءِ اُمر شست سال انت ءُ جان ءَ ھچ وڈیں نشان پرنیست –

جون ءِ پجار تنی وھدی کنگ نہ بوتگ ءُ واکدار آئی ءِ مردمانی شوھاز انت –