گوادر: عظیم دوست ءِ زورانسری آوار جنی ءَ نُھ سال سرجم بوگ ءَزھرشانی

بلوچستان ءِ تیاب دپی دمگ گوادر ءَ نُھ سال ساری پاکستانی پوج ءِ دست ءَ زورانسری آوار جنی ءَ پد بیگواھیں عظیم دوست ءِ یل نہ کنگ ءِ بگیری ءَ مروچی زھرشانی کنگ بوتگ –

صدف ھوٹل ءَ بگر تاں پریس کلب گوادر ءَ درنگاز کنوکاں اوگام جنان ءَ زورانسری آوار جنی ءِ بگیری ءَ نارہ جتگ –

زھرشانی روانک ءَ عظیم دوست ءِ کھول ءَ ھوار ایندگہ بیگواھیں مردمانی کھول ءُ سیاسی ءُ چاگردی باسکاں بھر زرتگ –

روانک ءَ درنگاز کنوکاں عظیم دوست ءَ ھوار درسیں بیگواھیں مردمانی یل کنائینگ ءِ ھاتر ءَ نارہ جتگ ءُ رورانسری آوار جنی ءِ دارگ ءِ لوٹ کتگ -.

روانک ءَ بھر زوروکیں مردمانی گوم ءَ تران کنان ءَ عظیم دوست ءِ گھار رخسانہ بلوچ ءَ گوشتگ کہ مروچی مئے ودار ءَ نُھ سال پرگوستگ بلے منی برات عظیم دوست ھنگت ازیت جاھاں بندیگ انت – اے نُھ ایں سال پہ منی واست ءَ ھما دردناکیں ساھت بوتگ انت کہ منی زند ءَ ھوار منی کھول زند سرجمی ءَ بدل کتگ –

آئی ءَ گوشتگ کہ اے نُھیں سالاں ما ھچ وڈیں وشی نہ دیستگ منی پیرزالیں مات شپ ءُ روچ وتی زھگ ءَ یات کنت – اے نُھیں سالاں مئے گس ءَ ائید نہ اتکگ – ھر وھد ءَ کہ ائید ءِ وشیانی روچ کئیت ھمے سما بیت کہ مئے ٹپاں کسے واد پریچگ ءَ انت پرچا کہ ھر یکے ائید ءَ وتی کھول ءِ گوم ءَ شاتکامی کنت بلے مئے اے روچ دگانی سر ءَ گوز انت –

آئی ءِ گوشگ ات کہ ریاست مارا گوشت کنت کہ منی پیرزالیں کماش ءُ مئے کھول ءَ کجام کتکاریانی سزا دیگ بوگ ءَ انت؟ مروچی کساس ھر یک گِسے ھمے آس ءِ تہ ءَ سُچگ ءَ انت – پرچاکہ ھچ چُشیں گس ءِ نیست کہ اودا یک گھارے ءِ برات، زالے ءِ لوگواجہ، ماتے ءِ چمے چراگ، پتے ءِ پیری ءِ اسا یا یک زھگے ءِ سر ءَ پتے ءِ ساھگ پچ گرگ نہ بوتگ – برات ءِ یل کناءینگے ھاتر ءَ ھر وڈیں دروازگ ٹُک اِتگ، زھرشانی کتگ، نندانکاں نشتگیں ءُ چہ اے ریاست ءَ لوٹ کُتگ کہ منی برات زاھر کنگ بہ بیت اگاں آئی ءَ جرمے کتگ آمیدگس ءَ آرگ بہ بیت ءُ سزا دیگ بہ بیت – ما ھمے جست ءَ کنگ لوٹیں مارا پرچا اے وڈ ازیت دیگ بوگ ءَ انت؟

آئی ءَ گوشتگ کہ من چہ اے ریاست ءَ وتی پیرزالیں مات ءِ وشیاں لوٹاں، ھدایا بہ چارے منی برات ءَ واتر کن ات منی کھول ءَ ھوار درسیں بیگواھیں مردمانی کھولاں چہ اے دردناکیں ودار ءَ آزات بہ کن ات عظیم دوست ءَ ھوار درسیں بیگواھیں مردم یل کنگ بہ بنت –

رخسانہ دوست ءَ گوشتگ کہ منی برات عظیم دوست ءَ کجام جرم کُتگ کہ آئی ءِ جست ءُ پُرس نُھ سال گوزگ ءَ پد ھم سرجم نہ بوتگ انت؟ آئی ءَ آمیدگساں پیش نہ کنگ منی برات ءِ بے گناھی ءَ زاھر کنت – اگاں کسے ھمے ماریت ما چہ وتی دوستیگیں مردمانی لوٹ ءَ دزکش بہ ایں گڈا اے آیانی وھم گمان انت –