بالی ووڈ ءِ نامداریں ازمکار بیران

بالی ووڈ ءِ نامداریں ازمکار نتیش پانڈے دل ءِ دورہ ءَ گپتگ ءُ پنجاہ سالے اُمر ءَ بیران بوتگ –

بھارت ءِ رسانکدرانی رِد ءَ نتیش ریاست مہاراشترا ءِ شھر ناشیک بیران بوتگ کہ آ اودا ءَ ھوٹل ءِ کوٹی ءَ بوتگ –

بنداتی ھالانی رِد ءَ نتیش پانڈے ءِ مرگ دل دورہ ءِ سوب ءَ بوتگ –

ازمکار ءِ مرگ ءِ ھال سربوگ ءَ پولیس ءَ وت ءَ ھوٹل ءَ سر کتگ ءُ ھوٹل ءِ واکدار ءَ ازمکار ءِ نزیکیں کس ءُ سنگتاں جست ءُ پد کنگ بوگ ءَ انت بلے تنی وھدی پولیس اژردی چار ٹپاس ءِ رپورٹ ءِ ودار کنگ ءَ انت –

وشکندیں بھارتی ازمکار نتیش پانڈے ءَ بھارت ءِ بازیں نامداریں تامرانی تہ ءَ کار کتگ، آئی نود ءِ دھک ءَ تھیٹر ءِ تہ ءَ وتی ازمکاری ءِ بندات کتگ –

آئی ءَ کسانیں ٹی وی پروگرام یک مھرے ءِ کسہ( ایک پریم کہانی) منزل وتی وتی (منزلیں اپنی اپنی) ساھگ (سایہ) ءُ جستجو ءِ تہ ءَ ھم کار کتگ –

اشاں ابید آئی ءَ بولی ووڈ نامداریں تامرانی تہ ءَ ھم وتی ازم درانگاز اِتگ کہ آھانی تہ ءَ بدھائی ہو شادی کے سائیڈ افیکٹ ، رنگون ءُ شاہ رخ خان ءِ تامر اوم شانتی اوم ھوار انت ءُ آئی ءَ سلمان خان ءِ تامر دبنگ ٹو ءُ عرفان خانءِ تامر ماداری ءِ تہ ءَ ھم وتی ازم درانگاز اِتگ –