بلوچستان ءِ دمگ کیچ ءَ پاکستانی پوج ءَ لشکر کشی ءِ میان ءَ دو مردمانی جنگ ءِ ٹاہ جتگ-
پاکستانی پوج ءِ بنشون ( آئی ایس پی آر) رِد ءَ چیریں ھالانی رسگ ءِ سرءَ بلوچستان ءِ دمگ ھوشاپ ءِ بلور ھند ءَ بیڑبرتگ-
جارکش رِد ءَ سلاہ بندیں مردمانی اوتاک ءِ نزیک ءَ پوجی کارندھانی ایر گیجگ ءِ ھاتر ءَ بالگرد کارمرز کتگ- ھمے میان ءَ پوج ءُ سلاہ بندانی میان ءَ تیرگواری ءِ تُرندیں رِد برجاہ بیتگ-
آئی ایس پی آر رِدءَ جنگ بیتگیں مردم پوج ءِ سرءَ اُرشاں اَبید سکھر، لاڑکانہ ءُ گوادر موٹر وے ایم ایٹ ءِ سرءَ تراکناکیں شورو کل کنگ ءَ ھم ھوار بیتگ اَنت-
آئی ایس پی آر ءَ دیمتر ءَ ٹاہ جتگ کہ اے مردمانی اوتاک ءَ چہ تراکناکیں شورواں ھوار سلاہ ءُ گولہ دزکپتگ اَنت-
لیویز فورس رِد ءَ جنگ بیتگیں مردمانی داں انگت پجّار بوگ ءَ نہ اِنت، ءُ لاش ٹیچنگ نادُراھجاہ تربت سردجاہ ءَ پجّار ءِ ھاتر ءَ ایر کتگ اَنت-