سر بیتگیں ھالانی رد ءَ روکپتی بلوچستان ءِ جتا جتائیں جاھاں چار کس ایرانی لشکر ءَ آوار جنگ ءَ پد بیگواہ کرتگ اَنت-
گیشیں ھالانی رد ءَ گوستگیں روچ ءَ ایرانشھر ءَ ایرانی لشکر ءَ کسان سالیں ورنایاں ھوار یک مردمے آوار جتگ ءُ برتگ-
آوار جنگ بیتگیں مردمانی پجار عبیداللہ ھیبتان، شانزدہ سالی ئیں مبین حسین زئی، چاردہ سالی ئیں عبداللہ میر بلوچزئی ءِ ناماں زانگ بیتگ اَنت ھر سَے ایرانشھر ءِ نندوک اَنت گوستگیں روچ ءَ آوار جنگ ءَ پد بیگواہ کنگ بیتگ اَنت-
ھالانی تہ ءَ گوشگ بیتگ کہ عبیداللہ ایرانی بنجاھی شھر تھران ءَ یک بیکری دکانے ءَ کار ءَ اِنت کہ انی وتی موکلاں اتکگ بیتگ-
مبین ءُ عبداللہ ابوذر ایرانشھر ءِ نندوک اَنت کہ ایرانی لشکر ءَ آوار جتگ ءُ برتگ اَنت-
ھمے وڑ ءَ تیابدپی شھر چھبار ءَ ایرانی لشکر ءَ یک ورنایے آوار جنگ ءَ پد بیگواہ کرتگ –
آوار جنگ بیتگیں ورنا ءِ پجار ھبدہ سالی ئیں سلیم بلوچ نژاد ء اسماعیل جھمنند چھبار ءِ نام ءَ زانگ بیتگ-