تربت ءَ دستی بمب اُرش ءَ پنجاب جھمنندیں مردمے ٹپی بیتگ

بلوچستان ءِ ضلع کیچ ءَ دستی بمب اُرشے ءَ یک مردمے ٹپی بیتگ-

ضلع کیچ ءِ بُنجاھی شھر تربت ءَ صلالہ بازار ءَ ھستیں گیراج سر ءَ ناشناسیں مردماں دستی بمبے چگل داتگ ءُ تتکگ اَنت-

پولیس رِد ءَ اے اُرش ءِ آسر ءَ سفیان میسح ء اسلم نامیں مردمے ٹپی بیتگ چریشی ءَ آ نادُراھجاہ ءَ برگ بیتگ-

پولیس رِد ءَ اے مرد ء سیادی پاکستان استان چہ پنجاب گوجرانوالہ ءَ اِنت بلے پولیس اے درگت ءَ گیشیں پٹ ءُ پول کنگ ءَ اِنت –

زانگ بہ بیت گوستگیں روچاں ھم کیچ ءِ شھر تربت ءَ ناشناسیں سلاہ بندیں مردماں جاوید ء اسلم نامیں مردمے سر ءَ تیرگواری کتگ اَت ءُ کُشتگ اَت آ ھم پنجاپ جھمنند اَت ءُ اے اُرش زمہ واری بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ زرتگ اَت-

بلے مروچگیں اُرش زمہ واری انگت ھچ گل ءَ نہ زرتگ-