ھُشتر دزی ءِ الزام ءَ گزین مری ءِ گوزانکی زمانت منگ بوتگ

کوھلو ءِ سیشن کورٹ ءَ گزین مری ءَ گوزانکی زمانت منّ اِتگ – گزین مری ءِ گوزانکی زمانت ءِ ھاتر ءَ کوھلو بار ءِ سرکماش ایڈوکیٹ میر عطاء اللہ مری آمیدگس ءَ پیش بوتگ –

گوستگیں روچ ءَ چنگیز مری ءَ وتی برات نواب گزین مری ءَ ھوار دگہ پنچ مردمانی بگیری ءَ ارزی نبشتہ کنائینتگ ات کہ آئی ءِ تہ ءَ پی پی سی دفعہ 149 ءَ ھوار 392 , 365, 147 ھوار انت –

چنگیز مری ءَ ارزی ءِ تہ ءَ نبشتگ کہ آئی ءِ ڈرائیور ءُ بیست ءُ نُھ ھشتراں ھوار یک ٹویوٹا گاڑی ءِ دُزگ بوتگ انت، کہ چنگیز مری ءَ وتی برات گزین مری ءَ ھوار دگہ پنچ مردمانی نام ءَ ارزی نبشتہ کنائینتگ بلے پدا ھم اے ارزی ءَ نواب گزین مری ءَ مرچی کوھلو سیشن کورٹ ءَ گوزانگی زمانت رستگ –

دومی نیمگ ءَ نواب گزین مری ءَ نیشنل پریس کلب ءَ اھوالکاراں گوں تران کنان ءَ گوشتگ کہ منی سر ءَ جنگ بوتگیں الزام درست رد انت من لوٹاں اشی ءِ پٹ پول کنگ بہ بیت اگاں منی سرے الزام راست بوتاں گڈا ھر وڈیں شزایے ورگ ءَ ساڑی آں، مروچی ھم من وتی وکیل ءَ گوشتگ کہ گوزانکی زمانت ءَ مہ کنائیں من جیل روگ ءَ ساڑی آں –

آئی ءَ گوشتگ کہ من اے گپ ءَ پدر کناں کہ نواب چنگیز مری ءِ گوں منی پت نواب خیربخش مری ءَ گوں ھچ وڈیں سیادی نیست – آئی ءَ اے مرد وتی ھر چیز ءَ چہ جتا کتگ –

آئی ءَ دیمتر ءَ گوشتگ کہ مروچی مئے مری ٹک سندھ پنجاپ ءُ دگہ ھند ءُ دمگاں درپہ در بوگ ءَ انت، منی واھشت اِنت کہ آوتی ھند ءُ دمگاں بیا انت ءُ بہ نند انت – گڈسر ءَ آئی ءِ گوشگ ات کہ کاھان ءِ آبادکاری ءِ ھاتر ءَ مئے نہ منّوک ھر وڈیں اڈاند بیار انت بلے ما کاھان ءَ آباد کن ایں ءُ نندیں –