بلوچ آجوئی ءِ روچ
نبشتہ کار: البُرز بلوچ
دی بلوچستان پوسٹ
دگنیا ءِ تہ ءَ ھرچ جاندار ءِ ابرم اِنت کہ آ آجو بیگ لوٹ ایت، مُرگ ءُ جناوراں بگر داں انساناں کُل پچیں آزمان ءِ چیر ءَ ساہ کشگ لوٹ اَنت آجوئی یک انچیں سوگاتے کہ انسان ءِ ساچست ءَ ودّینیت، انسان ءَ جیڑگ ءُ دُگنیا ءَ پچیں سسا ءَ گوں چارگ پرمائیت۔
دنیا ءَ مُدام زوراور ءَ ایردست وتی بندیگ کُتگ تُری ڈارون ءِ “Survival of the fittest” بہ بیت یا کالونائزر ءِ نِزوریں راجاں ایردست کنگ، ھر کُجا نِزور بندیگ ءُ ھلاس کنگ ءِ کوشست بیت۔ کسے اشاں ابرمی شئے گوْش ایت ءُ کسے وت ساچستیں امل کہ زوراور مُدام نِزور ءِ سر ءَ زوراکی کنت ءُ آئی ءِ ھرچ بنیاتی ھکاں چہ آئی ءَ پُلیت۔
چوشکہ ھرچ انسان آجو بیگ لوٹ ایت ھمے پیم ءَ دگنیا ءِ تہ ءَ ھرچ راجے کہ ھست آ ھم لوٹ اَنت کہ آجو بہ بنت بلے یک راجے ءِ واستا آجوئی تھنا پچیں آزمان ءَ ساہ کشگ اِنت؟ یک راجے ءِ واستا آجوئی تھنا آجوئی ءَ ساہ کشگ نہ اِنت بلکیں آئی ءِ زند گوازینگ ءِ بنیاتی ھکاں اوار آئی ءِ پجار اِنت۔ پجار ءِ تہ ءَ دود ءُ ربیدگ، زبان،زمین ءُ گوستانک ءَ اوار ھرچ ھما شئے کائینت کہ آ گوں ھما راج ءَ بندوک اَنت۔ اے المی نہ اِنت کہ یک راجے مٹیرئیل بنیاد ءَ کُلیں آسراتیانی واھند بہ بیت ءُ آ راج آجو گُشگ بہ بیت، بلکیں ھما راج کہ آ وتی ھرچ شئے کنگ ءِ وتواجہ بہ بیت-
دُگنیا ءِ تہ ءَ وتی بستار ءِ ھوالہ ءَ چہ زانگ بہ بیت ءُ مستریں چیز کہ آ وتی پیسلہ ءِ وت واھند بہ بیت۔ آجو بیگ ءَ چہ آ راج ءِ ساچستی دود زندگ بنت، راج ءِ مھلوک پچیں سسا ءَ گوں جیڑ ات کنت، آ ذھنی ھوالہ ءَ آجو بیت ءُ وت وتی چاگرد ءِ تہ ءَ انسانی برابری ءُ وشھالی ءِ زمہ وار بیت چہ اشی ءَ آ دگنیا ءِ زانت ءُ زانشتی تک ءُ پھناتانی تہ ءَ بھر زُرت کنت۔
اگست ءِ ماہ ھمنچو بلوچ ءِ واستا بدیں روچے ھمنچو شریں روچے ھم چوش کہ بقول بابا خیر بخش مری” بلوچ وش بھتیں راجے یا بد بھتیں اشی ءِ پسو ءَ نزاناں چوں بہ دیاں، بلے ھو راجانی زند ءِ تہ ءَ وش بھتی ھم کئیت ءُ بد بھتی ھم۔” شریں ماھے اے واستا کہ اے ماہ ءِ یازدہ ءَ مئے سرڈگار بلوچستان آجو بیتگ بلے بدیں گپ ایشیں کہ پد ءَ دوبر گُلام کنگ بیتگ۔ 11 اگست ءَ ماں اولی رند ءَ ریڈیو ھندوستان ءَ انگریز ءِ ایردستیں بلوچستان ءِ آجوئی ءِ جار شنگ کنگ بیت کہ آ وھد ءَ پاکستان ءِ وڑیں ریاستے ءِ بنیات ھم نہ بیتگ۔ بلے سیمی وشیں گپ ایش اِنت کہ اے راج وتی آجوئی ءِ واستا جُھد ءَ اِنت کہ اے راہ ءَ ھزارانی کچ ءَ ورنا، جنین، کماش ءُ چُکانی سرانی کُربانی ءِ یک دراجیں لڑے ھست۔ بلوچ راج ءِ سر ءَ ریاستی زُلم ءُ زوراکی یک ھلاس نہ بیوکیں کسھے ھست۔ ریاستی زوراکی، بلوچ پُسگانی زورانسریں بیگواھی بِگر داں شھیدی ءَ ابید ھم مرچی بلوچ راج وتی آجوئی ءِ روچ ءَ بے ھیال نہ اِنت بلکیں گیشتر بلوچ راجی جُھد گیش بوان اِنت چیا کہ بلوچ سرپد اِنت کہ یک آ یک انچیں استانے ءِ ایردست اِنت کہ آئی ءِ اُمر ءَ چہ مئے یک کماشے ءِ امُر گیشتر اِنت۔ بلوچ راج ءِ وش مزن دلی ءُ ھوسلہ اد ءَ چہ زانگ بیت کہ ایردستیں راجے بلے انگت وتی آجوئی ءِ روچ ءَ گوں وش دلی دار ایت ءُ دنیا ءَ اوار دژمن ءَ اے باور کنت کہ شمئے وت سازتگیں گیر انسانی کانوداں مئے سر ءَ دور دیگ ءَ ابید ھم بلوچ وتی ھکیگیں راہ ءَ زانت ءُ وتگڑیں زوراور ءِ بندشاں پد ھم بلوچ وتی آجوئی ءِ روچ ءَ دارگ ءَ اِنت۔ مرچی بلوچ راج ءَ دنیا ءِ سیاست ءُ زانشتی پڑ ءَ مزنیں بھرے نیست ءُ دنیا ءِ سیاست، زانشتی ءُ سائنسی پڑاں بگر بیگ ءُ دنیا ءِ تہ ءَ آدگہ راجانی پیم ءَ وتی کرد ادا کنگ ءِ مانزمان مئے آجوئی اِنت۔
اے روچ مارا یاد گیجیت کہ ما یک مزن ءُ شاھگانیں زمین ، زبان ءُ دود ءُ ربیدگے ءِ واھند اِنت۔ ھما نیلیں زر ءِ واھندیں کہ ھمل جیئند ءَ پَرنگانی گون ءَ جنگ دیان ءَ ساہ داتگ بلے بلوچستان نہ داتگ ءُ دوبر ودی بیتگیں زِر پھازاں(گوادر ءَ پی سی ھوٹل ءِ سر ءَ پدائی اُرش کن انت کہ پاکستان ءُ چین ءِ بنجل بیتگ) کہ زر ءِ پھازگ ءِ واستا دژمن ءَ جنگ دیان ءَ کلوہ داتگ کہ اے نیلیں زر بلوچ ءُ بلوچستان ءِ میراس اِنت ءُ بلوچ اشی ءِ پھریزگ ءَ ھون ءِ گُڈی ترمْپ ءَ گوں دژمن ءَ جنگ کنت۔
اے روچ ءِ دارگ ءَ گوں بلوچ اے پھم ایت کہ آ یک آجوئیں راجے کہ مرچی ءِ اھد ءِ دنز ءُ مجُاں گپتگ ءُ ایردست کنگ بیتگ کہ آئی ءِ سیاسی، چاگردی، وانگی ءُ زرکاری ءِ راہ ءُ رھبند تباہ کنگ بیتگ اَنت بلے بہ کول ءِ شھید بانُک کریمہ بلوچ “بلوچ چو سیمُرگ ءِ زات ءَ اِنت کہ مرگ ءَ پد ھم زِندگ بیت۔” بلوچ ءَ گوں وتی آجوئی جُھد ءِ تہ ءَ ھزارانی کچ ءَ مردمانی کُربانی ءَ اے پْدر کُتگ کہ راج پہ کُشگ کار نہ بیت بلکیں گیش زِندگ بیت۔ مرچی بلوچ ءِ ھرچ دمک ءُ کوچگاں اے ھال رس اتگ کہ آ یک جُتائیں ءُ آجوئیں راج ءُ بلوچستان آئی ءِ سرڈگار اِنت کہ زورانسری کبزہ کنگ بیتگ ءُ بلوچ پہ وتی آجوئی ءِ دوبر گِرگ ءَ گوں استان ءَ جنگ دیگ ءَ اِنت۔ من سدکاں کہ بلوچ جھدکارانی ءُ شھیدانی جُھد ءُ کربانی ءِ مُز آزاد بلوچستان اِنت ءُ زیت یا دیر آ وتی سرڈگار ءِ وت واھُند بیت ءُ دنیا ءِ نکش ءِ تہ ءَ دو بر وتی آجوئیں استان ءِ بیرک ءَ بُرز کنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔