ھندوستان ءِ چیر دستیں کشمیر ءِ دمگ راجوڑی ءَ ھندوستانی پوجی کیمپ ءِ سر ءَ اُرش ءَ 3 کارمند مُرتگ وھدیکہ یک اپسر یے ءِ پجیگ ءَ پنچ ٹپیگ بیتگ اَنت۔
ھندوستانی رسانکدر ءِ ردءَ کشمیر ءِ دمگ راجوڑی ءِ پرگال پوجی کیمپ ءِ سرءَ وتکُشیں اُرش مروچی سھب ءِ وھدءَ کنگ بیتگ۔
ھندوستانی شنگکاری ادارگ ‘این ڈی ٹی وی’ ءِ رد ءَ ناشرکاراں پوجی کیمپ کے ءِ نزیک ءَ جتگیں ٹٹ گوازینگ ءِ جھد کُتگ گُڑ ءَ ھمے نیام ءَ ھما اوشتوکیں کارمنداں آھانی سرءَ تیرگواری بندات کُتگ۔
دو نیمگی تیر گواری ءِ آسر ءَ ھندوستانی پوج ءِ سئے کارمند مُرتگ وھدیکہ یک اپسر یے پجیگ ءَ پنچ ٹپیگ بیتگ اَنت۔
گوستگیں چار سالانی نیام ءَ جموں ءِ پوجی کیمپ ءِ سرءَ بیتگیں اے اولی اُرش اِنت۔ گوستگیں رندءِ فروری 2018 ءَ ناشرکاراں سنجاوا کیمپ ءِ اُرش کُتگ اَت کہ آئی تہءَ شش پوجی کارمند مُرتگ اَت ءُ چاردہ ٹپی بیتگ اِت اَنت۔ چہ آئی پیسر 2016 ءَ اڑی سیکٹر ءِ سرءَ بیتگیں اُرش ءَ 18 کارمند کُشگ بیتگ اِت اَنت۔