بلوچستان ءِ دمگ موسیٰ خیل ءَ یکے ءَ پد دگہ بیگواہ بیتگیں سَے جنکوانی تہ ءَ یکے ءِ لاش دزکپتگ-
ڈپٹی کمشنر موسیٰ خیل کلیم اللہ کاکڑ ءِ رد ءَ بیست ءُ پنچ جولائی ءَ آوار جنگ بیتگیں پنچ سالی ئیں شبانہ ءِ لاش ھپتگ ءِ شپ ءَ آبادی ءَ دور یک جنگلے ءَ دزکپتگ آئی ءِ پوسٹ مارٹم رپورٹ ءِ بنداتی ءَ سرگ ءَ ٹپ ءُ گٹ ءِ دارگ ءِ نشان پر اَنت-
انتزامیہ ءِ رد ءَ کسان سالیں جنکو لٹ ءُ کُٹ کنگ ءَ پد کُشگ بیتگ جنکو ءِ لاش موسیٰ خیل بازار ءَ آرگ بیتگ ءُ اشی ءِ کھول بھیڈسٹرکٹ ھیڈکوارٹر ھسپتال ءَ سر بیتگ ءُ اود ءَ جنکو ءِ لاش پوسٹ مارٹم ءِ واستا شال ءَ برگ بیتگ-
موسیٰ خیل قبائلی ٹکاں دمگی میڈیا ءَ گوں گوشتگ کہ زھگ ءِ گون ءَ جنسی زوراکی بیتگ زھگ ءِ آوار جنگ ءُ یل نہ کنگ ءِ ھلاپ ءَ دمگ ءِ مردم گوستگیں بازیں روچاں زھرشانی ءَ نندوک بیتگ اَنت-
ڈپٹی کمشنر موسیٰ خیل ءَ گوشتگ کہ ڈی این اے ءِ نشان لاھور ءَ دیم دیگ بیتگ اَنت ءُ آیانی سرجمی ءَ پد وئیل ءِ ھلاپ ءَ گامگیج زورگ بیت اِنت ءُ جرمکارانی گرگ ءَ اسانی بیت اِنت داں انگت ءَ ھچ دگہ راہ ءُ در نیست اِنت-
ڈپٹی کمشنر ءِ رد ءَ بیگواہ بیتگیں دگہ دو زھگانی عمر چار ءُ پنچ سال ءِ میان ءَ اِنت چریشانی تہ ءَ یکے سِی مارچ ءُ دومی دَھ اپریل ءَ بیگواہ اَنت-
موسیٰ خیل پولیس انتزامیہ ءِ رد ءَ دویں کیسانی ارزی نبشتہ کنگ ءَ کھول رازی نہ بیتگ اَنت کہ آیانی گمان بیتگ کہ زھگاں گیش تاوان دے اَنت دمگ ءِ سروکاں گوشتگ کہ اے زھگانی یل کنائینگ ءِ لوٹ ءَ کن ایں ءُ انتزامیہ سرجم ءَ ناکام بیتگ دروگانی پشت ءَ زندگ اِنت-
بیگواہ کنگ بیتگیں ھرائیں جنکوانی سیادی موسیٰ خیل ءَ اِنت ءُ پولیس کیس ءِ چار ءُ ٹپاس ءَ کنگ ءَ اِنت ءُ شبانہ ءِ گرگ بیتگیں نمونھانی آیگ ءَ پد گامگیج زورگ بیت اِنت-