بلوچستان ءَ زورانسری آوار جنگ بوتگیں پنچ مردم یل بوتگ انت

بلوچستان ءِ جتا جتائیں دمگاں پاکستانی پوج ءِ دست ءَ زورانسری آوار جنگ ءُ بیگواہ بوتگیں پنچ مردم یل بوتگ ءُ وتی گِساں سربوتگ – یل بوتگیں مردم دگہ دگہ وھداں آوار جنگ ءُ بیگواہ کنگ بوتگ انت –

گیشیں ھالانی رِد ءَ ھمے سال ءِ بیست ءُ پنچ اپریل ءَ تربت آپسر ءَ آوار جنگ بوتگیں نودربر کلیم شریف ءُ بیست ءُ سَے اپریل ءَ گومازی ءَ پوج ءِ دست ءَ آوار جنگ بوتگیں یوسف اکبر یل بوتگ انت –

ھردو ورنا بلوچستان ءِ دمگ کیچ ءِ نندوک انت کہ گوستگیں روچ ءَ یل بوتگ ءُ وتی گساں سربوتگ انت-

پنجگور ءَ ھم ھال آھگ انت کہ بیگواھیں راشد ء واحد بخش مروچی یل بوتگ وتی گِس ءَ سربوتگ آئی ءِ یل بوگ ءِ ھبر آئی ءِ نزیکیں مردم ءَ راست کتگ –

ھمے وڈ کیچ ءِ دمگ مند ءَ ھم ھال آھگ انت کہ گوبرد ءِ جھمنند وسیم ء سلیم ءُ وسیم ء شوکت ھم یل بوتگ انت وتی گِساں سربوتگ – ھمے ماہ ءَ یل بوتگیں مردمانی کچ شانزدہ ءَ سربوتگ انت –

اشاں پیش بیست ءُ یک جون ءَ بلوچستان ءِ جتا جتائیں ھند ءُ دمگان زورانسری آوار جنگ بوتگیں ھشت مردم دیما آرگ بوتگ انت کہ آھانی تہ ءَ چار مردم یل کنگ بوتگ انت وھدیکہ چار مردم نوشکی ءَ سی ٹی ڈی ءِ دست انت – چہ کراچی ءَ زورانسری آوار جنگ بوتگیں سَے مردم بیست ءُ سَے جون ءَ یل بوتگ ءُ وتی گساں سربوتگ انت کہ آھانی تہ ءَ علی ء بخشی، اسرار ء انور عمر نواز علی ء ناصر ھوار انت –

نوشکی ءَ سی ٹی ڈی ءِ دست ءَ دیگ بوتگیں مردمانی تہ ءَ پیرجان ء سردو جھمنند ایرو، پسند علی ء چارشمبے جھمنند کساک بلیدہ، عبدالصمد ء رحیم بخش جھمنند ایرکان ، پھلان خان ء خدابخش ھوار انت – بلے تنی وھدی اے مردمانی درگت ءَ ھچ وڈیں کیس پولیس ءَ رسانکدراں نہ داتگ –

زانگ بہ بیت بلوچستان ءِ جتا جتائیں دمگاں زورانسری آوارجنیانی درچ یکشل ءَ برجاہ انت کہ یک نیمگے چیزے مردم یل بوتگ ءُ وتی گساں سر بوتگ انت دومی نیمگ ءَ دگہ بازیں مردمے زورانسری آوار جنگ ءُ بیگواہ کنگ بوتگ انت – ھمے ماہ ءَ بازین دمگے ءَ پانزدہ مردمانی آوار جنی ءِ ھال رسانکدراں شنگ بوتگ –

زورانسری آوار جنیانی بگیری ءَ توار چست کنوکیں گل وائس فار بلوچ مسنگ پرسنز ءِ رِد ءَ سدانی کچ ءَ زھگ ءُ زالبول پاکستان ءِ چیریں ادارھاں بندیگ انت کہ ناشناسیں جاہ ءَ بندیگے کرتگ انت –