پاکستان ءَ بلوچ چکچینی ءِ تہ ءَ گیشی آرتگ – ماما قدیر بلوچ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل برجاہ ، زھرشانی بنجل ءَ مروچی چار ھزار ءُ شش سد ءُ ھپتاد ءُ ھپت روچ سرجم بوتگ انت – مروچی الکوزی مومنٹ ءِ سرکماش عبدخان ماسٹر اختر جان پہلوان ءُ دگہ مردماں بنجل ءَ اتکگ ءُ ماما قدیر بلوچ ءِ گون ءَ دلپدردی درشان اتگ –

بنجل ءَ اتکگیں مردمانی گوم ءَ تران کنان ءَ وی بی ایم پی ءِ کمک سرکماش ماما قدیر بلوچ ءِ گوشگ ات کہ میاں استمان ءِ منظرنامہ ءِ سرا بوتگیں بدلیاں چہ میاں استمانی تاکتانی مپادات بدل بوان انت – ھمے رِد ءَ پاکستان ھم وتی کاونٹر انسرجنسی پالیسیانی تہ ءَ بدلی آرگ ءُ بلوچ چکچینی ءِ تہ ءَ آرگ انت -ھمے دمگ ءِ تہ ءَ پاکستان ءَ وتی سرپُر ءُ زوراکی ءِ رویش برجاہ داشتگ ءُ گوں چین ءَ نزیکی کنگ ءَ انت –

ماما قدیر بلوچ ءَ گوشتگ کہ پاکستان بلوچ چکچینی ءَ میاں استمان ءِ کمک ءُ میاں استمانی ادارھانی ھچ نگوشگ ءَ شریں وڈی ءَ کارمرز کنگ ءَ انت ءُ ھنگت ھمے کوشست انت کہ میاں استمان ءَ ھست بوگ ءَ بہ رکینیت ءُ بلوچ چکچینی ءِ تہ ءَ وتی دستاں مھکم بہ کنت –

ماما قدیر بلوچ ءَ گوشتگ کہ پاکستان میان استمان ءِ ھچ نگوشگ ءَ بلوچ چکچینی پالیسی برجاہ داشتگ انت ءُ پرایمنیں جھد کنوکانی بگیری ءَ بجن چگل دیے پالیسی رِد ءَ پاکستان ءَ لھتے سالانی تہ ءَ ھزارانی کچ ءَ بلوچ زورانسری آوار جتگ ءُ شھید کرتگ انت آھانی زانگولیں جون چگل داتگ انت بلے میاں استمانی ادارہ ءُ انسانی ھکانی منوگریں ملکانی نیمگ ءَ پہ اشی ءِ گرءُ دار ءَ ھچ وڈیں گامگیج زورگ نہ بوتگ –