چہ چیک پوسٹ ءَ اتکگیں تیر گوھار ءَ لگ اِتگ اَنت ، ناشناسیں مردمانی نام ءَ ارزی نکش کنگ ءَ ھچ سر پِر نہ بیت- تاج بی بی ءِ برات

بلوچستان ءِ کیچ ءِ بُنجاھی شھر تربت ءِ دمگ آبسر ءَ ھمے ماہ ءَ پاکستانی پوج ءِ تیرگواری ءَ چہ بیران بوتگیں بلوچ زالبول تاج بی بی ءِ برات طارق بلوچ ءَ گْوستگیں روچ ءَ ناشناسیں مردمانی نام ءَ ارزی ءِ نکش کنگ رد کرتگ ءُ گْوشتگ کہ ڈی سی ءَ اے مستری نیست کہ آ منی نام ءِ سر ءَ ناشناسیں مردماں منی گوھار ءِ کوش ءَ نام دپ بہ کنت-

چاگردی اھوال ءِ ویب سائٹ ءَ یک تامُرے ءِ تہ ءَ تاج بی بی ءِ برات طارق بلوچ گْوش اِیت منی گوھار ناشناسیں مردماں اناں بلکیں چیک پوسٹ ءِ سر ءَ کُشگ بوتگ آ گْوش اِیت کہ من اے وئیل ءِ چمّ دیستیں گواہ آں-

آئی ءَ گْوشتگ کہ ھشت روچ ءَ رند ناشناسیں مردمانی بگیر ءَ ایف آئی آر نکش کنگ چہ سمج ءَ ڈن اِنت-

تامر ءِ تہ ءَ طارق بلوچ گوش اِیت من انتزامیہ وئیل جاہ ءُ چار ٹپاس ءِ ھاتر ءَ ھما روچ ءَ کُتگ گُڑا آئی ءَ وڑ وڑیں دروگ بستگ ءُ آ جاہ ءَ نہ شتگ-

آئی ءَ گْوشتگ اگاں ضلعی انتزامیہ زوراوریں کُتگکار ءِ سر ءَ ایف آئی آر نکش کُت نہ کنت گُڑا ناشناسیں مردمانی بگیر ءَ ایف آئی آر ءَ واتر بزور اِیت-

زانگ بہ بیت 21 ستمبر ءَ پوج ءَ کیچ ءِ دمگ آسکانی بازار ءَ تیرگواری کتگ ءُ یک پیرزالیں زالبولے کشتگ-

اے وئیل ھما وھد ءَ بوتگ کہ وھدے کہ کُشگ بوتگیں زالبول دگہ مردمانی ھمراھی ءَ دار چنگ ءَ جنگل ءَ روگ ءَ بوتگ اَنت ءُ پاکستانی پوج ءَ آیانی سر ءَ تیرگواری کتگ – تیرگواری ءِ وئیل ءَ کُشگ بوتگیں زالبول ءِ لوگ ءِ واجہ ھم ٹپی بوتگ-

زانگ بہ بیت اشی ءَ چہ ھم پیش ھم چُشیں وئیل بوتگ اَنت پاکستانی پوج ءِ نیمگ ءَ چہ بہ بیت آئی ءِ داشتگیں کُشندہ ٹولیانی نیمگ ءَ بلے آیانی بگیر ءَ ایف آئی آر نکش کنگ ءَ دمگی انتزامیاں مہ کن کتگ ءُ نکش ءِ نہ کتگ اَنت ئِے –