پاکستانی لشکر ءَ سرچ آپریشن ءِ وھد ءَ لوگانی تہ ءَ مانرتکگ، نندوکیں مردمانی سر ءَ آزار ءُ اذیت دیگ ءِ بھتام۔
چہ بلوچستان ءِ شھر سوراب ءَ رس اِتگیں ھالانی رد ءَ مرچی سھب ءَ پاکستانی لشکر سوراب ءِ دمگ رودینی ءُ دمب ءَ پٹ ءُ پول ءِ وھد ءَ لوگانی تہ ءَ شُتگ اَنت۔
دمگی مردمانی گشگ ءِ رد ءَ ھمے وھد ءَ فورسز ءِ کارندہاں لوگ پٹ ءُ پول کتگ ءُ دمگی مردماں بیھار دیگ، لٹ شاپی کنگ ءِ وئیل ھم بوتگ اَنت۔
بلے اے آپریشن ءِ وھد ءَ تاں انوگ ءَ ھچ وڑیں دزگیر کنگ ءِ ھال سر ءَ نہ بیتگ اَنت۔
یات بہ بیت کہ پیسر ءَ پاکستانی لشکر ءَ سوراب ءَ وتی کیمپ ءِ نزیک ءَ جاہ منندیں آبادی ءِ نندوکاں چہ سوراب بازار ءَ 20 ءَ گیش شہری دزگیر کنگ ءُ کیمپ ءَ برتگ بوتگ اَنت۔
مھلوک ءِ گشگ انت کہ فورسز ءِ واکدار آہاں وتی لوگ ءُ زمیناں یلہ دیگ ءَ مجبور کنگ ءَ انت۔
آئی ءِ گشگ ءِ رد ءَ فوجی آپریشن ءِ بھانگ ءَ شہریانی لوگانی تہ ءَ مانرچگ ءَ ابید شہری آبادی ءِ سر ءَ ڈرون ءِ اُرش ءِ بازیں وئیل ھم بوتگ اَنت۔
ھمے سال ءِ اگست ءَ فوجی بمبتراک ءِ آسر ءَ بازیں کچے ءَ شہری بیران ءُ ٹپی بوتگ انت بلے شہریاں شکایت کتگ کہ انگت ءَ مہلوک ءِ آزار ءُ اذیت برجاہ انت۔