بلوچستان ءِ جتاجتائیں دمگاں پاکستانی پوج ءُ ڈیتھ اسکواڈ کارندھانی سر ءَ اُرش جانی تاوان ھال

بلوچستان ءِ جتاجتائیں دمگ سوراب، ھاران، ھُزدار ءُ چاگی ءَ پاکستانی پوج ءُ ڈیتھ اسکواڈ کارندھانی سر ءَ اُرش کنگ بیتگ جانی تاوان ءِ ھال-

گیشیں ھالانی رِد ءَ سوراب ءَ تارکی ڈیم ءِ ھند سر ءَ پاکستانی پوج ءِ بُنجل ڈرونز ءَ چہ نشانگ کتگ، اود ءَ بُنجل ءِ تہ ءَ کساس دہ تراکانی توار اش کنگ بیتگ اَنت-

دمگی ھالانی رِد ءَ ڈرون ءِ سر ءَ کتگیں اُرشاں پد بُنجل ءَ بازیں تراک بیتگ، واکدار تنی وھدے ھچ وڑیں درشان شنگ نہ کتگ-

ھمے وڑ ھاران شھر ءِ نزیک ءَ باب ھاران ءِ ھند سر ءَ سلاہ بندیں مردماں پاکستانی پوج یک اُرشے ءَ نشانگ کتگ- ھالانی رِد ءَ سلاہ بندیں مردماں نوک جوڑ بؤکیں ڈی آئی جی پولیس کارگس ءِ سر ءَ اُرش کتگ کارگس تراک ءَ چہ تباہ کتگ وھدے کہ اود ءَ کارکنوکیں پوریاگر یل داتگ اَنت-

دومی نیمگ ءَ ھُزدار ءِ دمگ کرخ سلاہ بندیں مردماں یکرندے پد ءَ ناکہ بندی برجاہ داشتگ گاڑی پٹ ءُ پول کتگ اَنت،اے میان ءَ سلاہ بندیں مردماں پاکستانی پوج ءِ کساس سی گاڑیانی ھمگرنچیں کاروان سر ءَ سنگر گپتگ ءُ اُرش کتگ-

اُرش ءِ آسر ءَ پاکستانی پوج ءِ کارندھاں جانی تاوان ءِ ھال اِنت

ھمے وڑ چاگی ءِ دمگ دالبندین ءَ ناشناسیں سلاہ بندیں مردماں سرکاری پلامرزی ٹولی کہ آ دمگ ءَ ڈیتھ اسکواڈ گوشگ بنت، کہ آئی ای ڈی تراک ءَ پد تیرگواری ءِ نشانگ کتگ-

وئیل ءَ شاھجان پنّام ءِ شاھو بیران بیتگ وھدے کہ آئی ءِ پھازدار ٹپی بیتگ بلے گیش بیرانیانی ھال اِنت-

زانگ بہ بیت مروچی بلوچستان ءِ جتاجتائیں دمگاں پوج ءِ سر ءَ اُرش کنگ بیتگ آیانی تہ ءَ لھتے اُرشانی زمہ واری بی ایل اے ءُ بی آر جی ءَ منّ اِتگ اَنت بلے اے اُرشانی زمہ واری انگت ھچ گل ءَ نہ زرتگ-