آپریشن الماس
ٹی بی پی شونگال
22اکتوبر ءِ بیگاہ ءِ کساس چار بج ءَ بلوچستان ءِ تیابدپی شھر ءُ چین پاکستان زرکاری ءِ گزرانکی (سی پیک ) ءِ بنجاھی شھر چہ گوادر ءَ سلاہ بندیں مردماں شھر ءِ پترگی راہ ءُ جتاجتائیں جاھاں اُرشانی اھوال دیم ءَ اتکگ انت ۔ اے اُرش ءِ زمہ واری سلاہ بندیں گل بلوچستان لبریشن فرنٹ (بی ایل ایف ) ءَ من اتگ ات ءُ آ “آپریشن الماس “ ءِ نام داتگ ات ۔ اے کاروئی ءَ یک زالبولے ءَ ھوار ھپت فدائی ھوار بیتگ انت، چشکہ بیست اداراں برجاہ بیتگیں جنگ ءَ پد بیران بیتگ انت۔
گوادر ءَ بیتگیں اے کاروائی بلوچستان لبریشن فرنٹ ءِ نیمگ ءَ اے دابیں دومی مزنیں کاروائی انت ۔ ایشی ءَ پیش گوستگیں سال ءِ نومبر ءَ نوکنڈی ءَ ھمے دابیں اُرشے بیتگ ، ھما وھد ءَ گل ءَ وتی فدائی یونٹ ءِ نام دیم ءَ آورتگ ات ۔ اگاں اے وئیلانی یکشلیں درچاں بہ چارے گڑا بی ایل ایف وتی کارانی تہ ءَ مٹی آرگ ءَ انت ءُ لشکری گامگیجی امل پیش ءَ گیش ترندتر بیان انت۔
گوست ءَ بلوچستان ءَ اے دابیں گیشتریں کاروائیانی زمہ واری بلوچ لبریشن آرمی ( بی ایل اے ) ءَ من اتگ انت ، بلے بی ایل ایف ءِ نیمگ ءَ اے دابیں کاروائیانی منگ اے پدراھی ءَ پدر کنت بلوچستان ءَ پرکاریں سلاہ بندیں گل وتی املی رھبنداں گیش زورمندی ودی کنگ ءَ انت۔
گوادر ءَ آپریشن الماس ءُ ایشی ءَ پیش دالبندین ءَ بلوچستان لبریشن فرنٹ ( بی ایل ایف ) ءِ کاروائی بلوچستان ءَ برجاھیں زرمبشت ءِ مٹ بوتگیں نوکتری ءَ بہ چاریں گڑا اے ایوک ءَ دو جتائیں وئیل نہ انت بلکیں سلاہ بندیں گلانی کارشونی، گل ءِ دیمتری ءُ وتی سیاسی ءُ جنگولی املی گامگیج ءِ درگت ءَ یک جھلانکیں املے ءِ بھر انت ۔ گچینی بی ایل اے ءِ نیمگ ءَ مزنیں کچے ءَ کاروائیاں پد بی ایل ایف ءِ نیمگ ءَ اے دابیں کاروائی اشارگ کن انت کہ بلوچستان ءَ پرکاریں آجوئی دوستیں سلاہ بندیں گل وتی روایتی گوریلا دروشم ءَ دیم ءَ جنزگ وتی پرکاریانی توک ءَ دگہ دروشم ھوارینگ ءِ جھد انت۔
بلوچستان ءَ برجاھیں آجوئی زرمبشت ءُ گوستگیں وھداں بلوچستان ءَ سلاہ بندیں گلانی نیمگ ءَ وتی کاروائیانی توک ءَ ترندی آرگ یک گچینی درچے ءِ نشانی ءَ کن انت۔ اے مٹی ءِ سان دمگ ءِ سیاسی باندات ، دمگی آبادی ءِ پھریزگ ءُ آڑ ءِ گشینگ ءِ گمان ءَ یک نیمگے ءَ سر کن انت۔