آپریشن ھیروپ فیز 2 پنچمی روچ ءَ برجاہ ، بازیں جاھاں کنٹرول برجاہ – بی ایل اے

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں یک جارے ءِ تہ ءَ گْوشتگ کہ آپریشن ھیروپ فیز ٹو پنچمی روچ ءَ سر بوتگ ءُ بلوچستان ءِ جتاجتائیں دمگاں انگت ءَ برجاہ اِنت۔ بلوچ لبریشن آرمی ءِ سرمچاراں بازیں جاھاں مھکمیں پوزیشن ءَ اَنت ءُ بازیں جاھاں کنٹرول برجاہ اِنت۔ گوستگیں روچانی وڑ ءَ زورگیریں لشکر جتا جتائیں میداناں سکیں بَھ ءُ بکڑی، پُشت کشّی ءُ تچ ءُ تاگ ءِ آماچ اِنت ءُ بلوچ سرمچارانی یکشلیں گھگیری ءَ دژمن ءِ جنگی دیمروئی ءَ ناکام کنگ ءَ اَنت۔

جارکش ءَ گوشت کہ بنداتی ءُ کچ ءُ کسانی رد ءَ تاں انوگ ءَ کم چہ کم سئے سد ءُ دہ زورگریں پاکستانی فوج، ایف سی، پولیس، سی ٹی ڈی ءُُ فوج ءِ چیردستی ءَ جوڑ بوتگیں ڈیتھ اسکواڈ ءِ کارندہ کشگ بیتگ انت۔ اے کچ ءُ کساس ھلاس نہ اَنت ءُ زمینی جاوراں چہ دژمن ءِ دیم ءَ بوتگیں تاوان ءُ مالی تاوان ءِ تہ ءَ گیشی ءِ گمان ھست۔ دژمن وتی فوجی شکست ءُ کُشگ بوتگیں کارندھاں چہ دگنیا ءِ چماں شموشگ ءِ جھد ءَ اِنت، بلے اگاں آزاتیں رسانکدر اے گپانی پدر کنگ ءُ زمینی راستیانی آزاتیں رنگے ءَ چار ءُ تپاس کنگ لوٹ اِیت گڑا آ ھرچ فوجی کیمپے ءَ شُت کنت کہ آھانی تہ ءَ نوشکی، دالبندین، شال، خاران، مستونگ، گوادر ،پسنی ءُ تمپ ھوار اَنت۔

آئی ءَ گوشت کہ تاں انوگ ءَ آپریشن ھیروپ ءِ وھد ءَ بلوچ لبریشن آرمی ءِ چل ءُ شش دلیریں سرمچار شھیدی ءِ تک ءَ سر بوتگ اَنت۔ اے رد ءَ مجید بریگیڈ ءِ بیست ءُ نُھ فدائین، فتح اسکواڈ ءِ دہ سرمچارءُ STOS یونٹ ءِ 7 سرمچار ھوار اَنت۔ شھیدانی بابت ءَ سرجمی ءُ گڈی ھال رند ءَ شنگ کنگ بنت۔

آئی ءَ گوشت کہ زانگ بہ بیت اے درستیں کچ ءُ کساس بنداتی ءُ ھلاسی نہ انت ءُ ایشانی تہ ءَ چہ گیش گیشی بوت کنت۔ دژمن ءَ بوتگیں تاوان ءُ آپریشن ءِ بابت ءَ سرجمیں ھال ھما وھد ءَ رسانکدر ءَ گوں شنگ کنگ بنت۔