نمیرانیں سناء بھار ءِ نام ءَ
نبشتہ کار: سناء بھار
دی بلوچستان پوسٹ
من مروچی نَد دست ءَ کُرتگ ءُ پہ ھَما بامردیں استاد ءَ نبشتہ کرتگ کہ بہ گند ئے من آئی ءِ پاد ءِ ھاک نہ باں بلے استاد ءِ کردار اِنت کہ مئے وڑیں لگوراں مجبور کنت کہ ما پہ آئی ءَ کسانیں جھدے بہ کن ایں ۔
اے دلیریں مرد یا اے زندگیں کردار استاد سناء بھار اِنت۔ واشک ءِ ریگزاریں زمین ءِ سر ءَ ودی بوکیں مرد کہ یک گریبیں لوگے ءَ پیداک بیت ۔ پد ءَ انچیں جاگھے ءَ در آیگ کہ اود ءَ جنگ ءَ سَر نہ بوتگ۔ اے وڑیں ھند ءَ چہ در آیگ ءُ پہ وتی زمین ءَ ندر بوگ من گشاں نہ بوتگیں کارے بلے استاد ءَ اے کار کرت ءُ پہ ما یک بلائیں درورے کہ استاد ھما وھد ءَ جنگ ءَ دراتکگ کہ آ وھد ءَ اے دمگ ءَ کَس ءَ چوشیں گپ وتی دَل ءَ ھم نہ جیڑ اِتگ کہ من رواں پہ زمین جھد کناں بلے استاد ءَ ھما وھد ءَ وتی راجی گلامی مار اتگ ءُ شُت پہ زمین ءِ وشیں روچاں جھد کنان ءَ پہ وتی بھشت رنگیں گلزمین ءَ کربان بوت۔ استاد بہ گند ئے من ترا وت نہ دیستگ بلے من ترا ونتگ ءُ تئی زانگ ءِ باز جھد کرتگ۔
سناء جان من زاناں تو وتی گڈی وھد ءَ ھمے جیڑ اِتگ کہ منی تپنگ ءَ باریں کجام ورنا چِست کنت تو ھمے جیڑ اِتَگ کہ تئی ریگزازیں ھنکین چہ جنگ ءَ سک زبھر انت۔ من زاناں کربان تو گمیگ بوتگ ئے کہ تئی ھنکین بزاں واشک ءِ ورنا چہ راجی جھد ءَ سک دور ءُ گستا اَنت بلے استاد نوں من ترا گُشَگ لوٹاں بژنیگ مہ بئے منی دلیریں کُنگر نوں تئی دَمگ ءِ ورنا گوں راجی جُنز ءَ ھمگرنچ انت۔
بلے استاد اَچ تو یک پھلی یے لوٹاں من زاناں سناء جان من تئی پاد ءِ ھاک نہ باں بلے من ھمے جیڑ اِتگ کہ تئی نام ءَ یکبرے پد ءَ بلوچستان ءِ کوھانی تہ ءَ زندگ کناں بزاں تئی نام زرتگ ءُ سناء بھار نام ءِ سر ءَ گوں دژمن ءَ دیمپاناں۔ سناء پل منی وڑیں لگور تئی وڑ ءَ دژمن ءَ جت نہ کنت بلے منی ایمان اِنت کہ داں گڈی ساہ ءَ گوں تئی پگر ءَ ایماندار باں دانکہ منی بدن ءَ ساہے رؤت ءُ کئیت من ھما یکیں ساہ ءَ ھم پہ بلوچستان ءَ کربان کناں ۔ سناء جان لھتیں دگہ ھم گوں تو گپ ھست ترا گشاں ۔سناء پل نوں تئی ھنکین پہ دژمن ءَ کیامت بیت نوں دژمن ءَ تئی ھنکین ءَ واب ءُ آرام نہ بیت نوں اے لگوریں دژمن چوش دلیر نہ بیت کہ تئی ھنکین ءَ بے ترس بہ بیت۔نوں تئی ھنکین سرجم ءَ سنگرے بوتگ۔ دژمن ھر نیمگ ءَ رؤت گوں جنگولیں ورنایانی دیمپان بیت ءُ پروش وارت۔
استاد سناء جان یکبرے پد ءَ اَچ تو پھلی لوٹاں کہ من تئی نام زرتگ بلے منی ایمان انت گوں تئی پگر ءُ پلسپہ ءَ داں گڈی ساہ ءَ ایماندار باں۔
استاد جان من زاناں تئی وڑ ءَ من دلیر بوت نہ کناں ، بلے جاھے سنگتے گش ایت اود ءَ کہ شش سنگتانی کار بوتگ شھید ءَ اے کار ایوک ءَ کرتگ۔ ھمے سنگت ءَ گشت کہ پنجگور ءِ یک ھندے پوج ءِ ھپت گاڑی سنگتاں جتگ ءُ ھمے روچ ءَ پوج ءَ داں میتگ ءَ آپریشن کرتگ
پد ءَ سنگتاں گشتگ کہ اے گاڑی ءِ جنوک ایوک ءَ سناء بھار بوتگ۔
من اے وڑ کربان ! تئی وڑ ءَ دلیر بوت نہ کناں بلے یک گپے گشاں کہ من پد کِنز نہ باں من تئی نام زرتگ ءُ تئی راہ ءُ کِشک زرتگ گڑا من ءَ مرگ بہ زور ایت اگاں من پد کِنز اتاں۔
استاد اگاں جاھے گوں دژمن ءِ لشکر ءَ دیم پہ دیم بوتاں من ءَ سوگند اِنت تئی کبر ءِ کہ من دژمن ءِ دیم ءَ چو گرند ءُ گروک ءَ ارش کناں ۔
استاد بس ھمے گشاں کہ ما وَ ھِچ نہ کرتگ ما تئی ءُ تئی شھیدیں سنگتانی جوڑ کرتگیں راھاں زرتگ ءُ روان ایں پہ منزل ءَ ءُ داں گڈی ساہ ءَ پہ منزل ءَ جھد کنان بہ ایں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-