TBP Balochi

دی بلوچستان پوسٹ

چہ گچگ ءَ پاکستانی پوج ءِ دست ءَ دو زالبول ءُ چکاں ھوار نُھ مردم بیگواہ کنگ بیتگ اَنت –

ٹی بی پی پتر ءَ سر بیتگیں ھالانی رد ءَ بلوچستان ءِ دمگ پنجگور ءِ ھند گچک ٹوبہ ءَ درمھمد ءِ پیرزالیں لوگبانک بی بی مریم ءُ آئی ءِ دو کسان سالیں نماسگ راشد ء عواض ءُ اجمل ء شھجان ءِ ھمراھی ءَ پنجگور ءَ دیم پہ گچک ءِ روگ ءَ ٹوبہ ءِ ھند ءَ پاکستانی پوج ءَ پاسینجری گاڑی ءَ ایر گپتگ ءُ دزگیر کنگ ءَ پد ناشناسیں زنداناں برتگ اَنت –

دمگی مردمانی رد ءَ کسان سالیں راشد ءُ اجمل ھردوک نودربر اَنت ءُ کیچ ءَ وانگ ءَ بیتگ اَنت ءُ وتی موکلانی آیگ ءَ کھول ءِ گِندوک ءَ بنکی ھنکین ءَ روگ ءَ بیتگ اَنت کہ نیمراہ ءَ پوج ءَ دزگیر کرتگ ءُ بیگواہ کرتگ اَنت –

زانگ بہ بیت گچک ءَ اگست ءِ ماہ ءَ ٹوھیں کچے ءَ لشکر کشی بندات کنگ بیتگ اَنت کہ چریشی ءَ جانی تاوانانی ھواری ءَ لوگ ءُ کشت ءُ کشار ماندارگانی وئیلانی ھال اتکگ اَنت –

دمگی مردمانی رد ءَ پوجی لشکع کشی ءِ زوراں بازیں مردماں لَڈ ءُ بار کرتگ ءَ جتا جتائیں جاھاں لاچاری زند ءِ گوازینگ ءَ لاچار اَنت –

دگہ یک ھالے ءِ رد ءَ گچک ءِ دمگ ءَ سِی نومبر ءَ پاکستانی پوج ءَ گچک ءِ جھمنندیں مھمد کریم ء یار مھمد ءُ آئی ءِ لوگی بی بی شاہ پری کہ آئی ءِ لوگ ءَ دزگیر کنگ ءُ ناشناسیں زنداناں برگ بیتگ اَنت کہ چریشی ءَ پد آیانی بارہ ءَ ھچ وڑیں ھال نہ بیتگ –

چریشی ءَ پد ھمے ماہ ءَ گچک ءِ جھمنندیں سلیم ء مھمد جمعہ، واحد ء قادر بکش، نزیر ء اُمیت ءُ یار جان ء دلمراد ھم پوج ءَ دزگیر کرتگ ءُ ناشناسیں زنداناں برتگ اَنت –

گوک رودان ءَ پاکستانی پوج ءِ پانگس ءِ سر ءَ اُرش کتگ دو کارمند کُشتگ یکے زدگ کُرتگ – میجر گْوھرام بلوچ

دی بلوچستان پوسٹ

سربیتگیں ھالانی رِد ءَ ناشُناسیں سلاہ بندیں مردماں کیچ ءِ دمگ مند گوَک ءَ رودان ءِ کوہ ءِ سر ءَ برجاھیں پاکستانی پوج ءِ پانگس ءِ سر ءَ اُرش کتگ- اُرش ءَ پاکستانی پوج ءَ جانی تاوان رس اِتگ – اُرش ءَ پد سلاہ بندیں مردم درآیگ ءُ رؤگ ءَ سوبین بوتگ انت وھدیکہ چہ پاکستانی پوج ءِ بنجاھی پانگس ءِ نیمگ ءَ چہ ھم سک باز تیرگواری کنگ بوتگ بلے ھچ وڑیں جانی ءُ مالی تاوانانی ھال نیست – زانگ بہ بیت ھردیں پاکستانی پوج ءِ سر ءَ اُرش بیت دومی نیمگ ءَ پاکستانی پوج لس مھلوک ءِ سر ءَ تیرگواری کنت –

دومی نیمگ ءَ بلوچ سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ ءُ گوشتگ کہ مروچی سھب ادار یازدہ ءَ مئے سرمچاراں کیچ ءِ دمگ مند گوک ءَ رودان کوہ ءِ سر ءَ برجاھیں پاکستانی پوج ءِ پانگس ءِ سنگر ءَ یک پوجی کارمندے دور جنگیں توپکے گون ءَ نشانگ کرتگ ءُ کُشتگ –

جارکش ءَ دیمتر ءَ گوشتگ کہ ھمے میان ءَ پانگس ءِ سر ءَ وتکاریں سلاھاں گون اُرش کُتگ اُرش ءَ یک دگہ کارمندے مرتگ ءُ یکے زدگ بیتگ –

گڈسر ءَ جارکش ءَ گوشتگ کہ اے اُرش بلوچستان ءِ آجوئی تاں برجاہ مان انت-

دی بلوچستان پوسٹ

بلوچستان ءَ بیست ءُ چار ادارانی تہ ءَ کورونا ءِ نادراھی ءِ کمتری ھال دیم ءَ اتکگ اَنت –

اُستانی جانسلامتی ءِ رد ءَ چار شمبے ءَ سرجمیں بلوچستان ءَ 425 مردمانی کورونا وائرس ءِ ٹیسٹ کنگ بیتگ اَنت کہ چریشی ءِ آسر ءَ اُستان ءِ 4 دمگاں 53 نادراھانی نادراھی ءِ ھال دیم ءَ اَتکگ اَنت –

بلوچستان ءَ کورونا وائرس ءِ نوکیں نادراھانی دیم ءَ آیگ ءَ پد نادراھانی کَچ 17ھزار 268 ءَ سر بیتگ اَنت –

ھال ءِ رد ءَ گوستگیں بیست ءُ چار ادارانی تہ ءَ کورونا ءَ آماچ بیتگیں 81 نادراہ وش بیگ ءَ پد بلوچستان ءَ دراہ بیتگیں مردمانی کچ 16 ھزار 547 ءَ سر بیتگ اَنت –

ھال ءِ رد ءَ بلوچستان ءَ بیران بیتگیں مردمانی کچ 169 ءَ سر بیتگ اَنت –

جانسلامتی ءِ رد ءَ بلوچستان ءِ وانگجاھاں کورونا ءِ یک دگہ نوکیں نادراھی ءِ دیم ءَ آیگ ءَ پد کورونا وائرس ءَ اسرمند بیتگیں نودربر ءُ استادانی کچ 1027 ءَ سر بیتگ اَنت –

نبشتانک: بیگواھی

نبشتہ کار: جاوید اکبال

دی بلوچستان پوسٹ

مردمانی بیگواھی اے ملک ءِ بادشاہ ءَ بندات کُتگ بَلے شَریں کارے نَہ اِنت۔ بادشاہ نَزانت کہ تھنا ھما مردم کہ چست کنگ بیت بیگواہ نَہ بیت آئی ءِ دراھیں لوگ ءِ وشی بیگواہ بنت۔ ھما انت کہ من اِش کتگ بادشاہ نودربراں بیگواہ کنگ ءَ اِنت من وتی چُک چہ وانگجاہ ءَ کشتگ ءُ کار ءَ پرماتگ۔ بیزار اِنت دگہ وانگ ءُ زانگے نَہ بیت منی چُک منی چمانی دیم ءَ وَ بِہ بیت،
شَر اِنت واجُل من نی رواں زندگ بیت آں الم تئی نیمگ ءَ کایاں۔
من داں دیراں ھمود ءَ نشت آں ناکو ءِ گپاں جیڈگ ءَ اتاں۔ من چون ناکو ءَ سرپد بِہ کناں؟ چہ وانگ ءِ کَشگ ءَ چہ بیگواھی دارگ نہ بیت اد ءَ بازیں چُک بے وانگ ءُ زانگ ءَ بے گپ ءُ تران بیگواہ کنگ بیتگ اَنت بادشاہ ءَ را مئے وانگ ءُ زانگ ءَ ھچ متلب نیست آئی ءِ متلب دگرے۔

لھتیں مُدت ءَ چہ رند من پہ شال ءَ روگ ءَ بس ءِ ودار ءَ اِتاں من ناکو دیست کہ سک گَل اَت۔ من ءَ گُشت ئِے مرچی من سک گَل آں۔ پرچاکہ باندا منی چُک ءِ اولی پگار رس اِیت۔ زان ئے منی چُک اولی پگار ءَ چون کنت؟
منی چُک گش اِیت من ءَ سمسنگ(Samsung) ءُ اوپو(Oppo) نہ لوٹ اِیت آ گُش اِیت آ وتی پت ءِ واستا اڑے من تئی گنوکیں ناکو ءِ واستا کوش گراں وتی مات ءِ واستا چادرے گراں۔ ھمےگپاں گوں ناکو ءِ ارس رتک انت ءُ پہ گریوگ گشت ئِے من سک گَل آں منی چُک ءَ منی سِستگییں کوش ءُ آئی ءِ مات ءِ درتگیں چادر یات انت ۔ ءُ پد ءَ ناکو ءَ گشت من مرچی پلُان ءِ گور ءَ وتی چُک ءِ گپ ءَ بَراں۔ کمو دور روگ ءَ رند ناکو اوشتات ءُ پہ کوکار گشُت ئِے سور ءَ الم بیا اِت پد ءَ دو ماہ ءَ رند من ناکو دیست کہ بیگواہ بیتگیں مردمانی کیمپ ءَ وتی چک ءِ اکس ئِے دست ءَ اِنت۔ من ناکو دیست ناکو ءِ گور ءَ شُتاں ناکو ءَ من ءَ امباز کت ءُ گشت ئِے منی چک اِش برت۔۔۔ منی وشی بیگواہ کنگ بیت اَنت۔ من وتی چک پرچاکہ وانگ ءَ نہ اِشت بلے ۔
ناکو ءِ گپ سرجم نہ بوت انت آئی ءِ گریوگ ءُ گپ ھوار بوت انت۔ من ناکو ءِ چک ءِ اکس ءِ چارگ ءَ چم جھلا کت اَنت داں دیست ناکو ءِ چُک ءِ اکس ءِ کَش ءَ ناکو ءِ سِستگیں کوش اِیر ات اَنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ کرونا ویروس ءِ نادراھی ءَ دگہ دو سد ءُ چار مردم نادراھی ءِ آماچ بیتگ اَنت، نادراھی ءَ آماچ بیتگیں مردمانی کَچ بیست ءُ سے ھزار ءَ ھپت سد ءَ سر بیتگ اَنت –

اھوالکار ءِ رد ءَ روکپتی بلوچستان ءَ بیست ءُ چار ادارانی تہ ءَ کرونا ویروس ءِ نادراھی ءَ دگہ دو سد ءُ چار مردم ھمے نادراھی ءِ آماچ بیتگ اَنت ءُ ویروس ءَ گپتگیں مردمانی تہ ءَ مروچی شش مردم بیران بیتگ اَنت-

سرجمیں بلوچستان ءَ کرونا ویروس ءَ بیران بیتگیں مردمانی کچ یک ھزار ءِ کچ ءِ نزیک ءَ سر بیتگ اَنت –

دمگی مردمانی رد ءَ روکپتی بلوچستان ءَ ویروس ءِ شنگ ءُ شانگی مردمانی بے پھریزی اَنت ءُ دمگدارانی دلگوش نہ دیگ ءِ سوب ءَ مردمانی جان ءُ ساھاں تاوان بیگ ءَ اِنت –

اھوالکار ءِ رد ءَ روکپتی بلوچستان ءِ دو مزنیں شھر دُزاپ ءُ نسر آباد دمگداراں بند کرتگ اَنت ءُ روکپتی بلوچستان ءِ آ دگہ جاھانی گِر ءُ داری نیست اِنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ بنجاھی شھر دُزاپ “زاھدان ءَ ناشناسیں مردماں تیرگواری کرتگ ءُ چار مردم زدگ کرتگ اَنت –

اھوالکار ءِ رد ءَ دُزاپ ءَ ناشناسیں مردماں” تبلیغیانی ” بنجل ءَ ناشناساں تیرگواری کرتگ ءُ چار مردم زدگ کرتگ کہ زدگ بیتگیں مردمانی تہ ءَ دو کسانیں چُک ھوار اَنت –

اھوالکار ءِ رد ءَ تیرگواری کنوک گاڑی ءَ سوار بیتگ اَنت تبلیغیانی بنجل ءَ اُرش اِش کرتگ اِش –

وئیل ءَ پد پھزداراں دمگ انگیر ءَ کرتگ ءُ اُرشکارانی پَٹ ءُ پول بندات کرتگ-

تیرگواری ءِ سوب تنی وھدی زانگ نہ بیتگ –

وئیل ءَ دو گاڑیاں ٹکر وارتگ ءُ چریشی ءَ دَہ مردم زدگ بیتگ اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ دگ ءِ وئیلے ءَ دَہ مردم زدگ بیتگ اَنت –

اھوالکار ءِ رد ءَ مروچی روکپتی بلوچستان ءِ دمگ کلاگنج کنھوج ءَ دو گاڑیاں ٹکر وارتگ کہ چریشی ءِ سوب ءَ ھردوکیں گاڑیاں سواریں دَہ مردم زدگ بیتگ اَنت –

وئیل ءَ پد زدگ بیتگیں مردم کنھوج ءِ نادراہ جاہ ءَ سر کنگ بیتگ اَنت –

روکپتی بلوچستان ءَ بندوکیں مردمانی گوشگ اِنت دگانی شر جوڑ نہ بوگ ءِ سوب ءَ گیشتریں وئیل بیگ ءَ اَنت ءُ دومی مردمانی تاوان ھما وھد ءَ گیشتر بیگ ءَ اَنت وئیلاں پد آسراتی ءِ دیراں سر بیگ ءَ بازیں مردم زندگی ءَ نہ رک اِتگ اَنت –

دی بلوچستان پوسٹ

سر بیتگیں ھالانی رد ءَ پاکستان ءِ گوست ءِ سروزیر میر ظفر اللہ خان جمالی دل ءِ دورہ ءِ گرگ ءَ بیران بیتگ –

میر ظفر اللہ خان دل ءِ نادراھی ءِ گرگ ءَ پاکستان ءِ بنجاھی شھر اسلام آباد ءَ ھواریں شھر راولپنڈی ءَ آمڈ فورسز انسٹی ٹیوٹ آف کارڈیالوجی نادراہ جاہ تھتیگ بیتگ –

سینیٹر ثنا جمالی ءَ پاکستان ءِ پیسریگیں سر وزیر ظفر اللہ جمالی ءِ بیرانی ءِ ھال راست کرتگ-

میر ظفر اللہ جمالی 1جنوری 1944 ءَ بلوچستان ءِ دمگ نصیر آباد ءَ ودی بیتگ –

سال 2002 ءَ پاکستان ءِ سروزیر گچین کنگ بیتگ ءُ داں 2004 ءَ سروزیری ءِ اگدو ءَ بیتگ –

دو سال ءَ پیسر زامران ءَ بیگواہ بیتگیں عبید اللہ یلہ کنگ بیتگ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ 4149 روچ سرجم بیتگ – پشتون تھپز مومنٹ ءِ باسکاں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ پدردی درشان اِتگ –

وی بی ایم پی ءِ رھشون ماما قدیر بلوچ ءَ ھمے وھد ءَ گْوشت کک پاکستان ءِ زُلم ءَ پُرایمنیں جد ءُ جھد آؤکیں پدریچ ءَ وت سر کرتگ ءُ زانت سرپدی ءَ سیاسی پاٹیاں ھم دیم ءَ بران اِنت ءُ ریاستی زوراکی ءِ پِڑ ساپ بیتگ، نِی جد ءُ جھد تچکی ءَ گچین کرتگیں منزل ءِ نیمگ ءَ تُرندی ءَ روان کنت –

آئی ءَ گْوشت کہ پوجی آپریشن ءِروک کرتگیں آس سرجمیں بلوچستان ءَ برجاہ اِنف – وھدیکہ پوج ءِ گوشگ ءَ ڈیتھ اسکواڈ ءِ زوراکی ھم برجاہ اَنت –

آئی ءَ گْوشت کہ زورانسری آوار جنگ بیتگیں مردمانی کھولاں بازیں پریس کانفرنساں گوشتگ کہ مئے چُک فرنٹیئرکور ءُ چیریں ادارھانی کارمنداں لوگانی تہ ءَ چِست کرتگ اَنت ءُ آ دگہ بلوچ پُسگانی رنگ ءَ ھم شھید کنگ ءِ گمان ھست اِنت اِش –

ماما قدیر ءَ گْوشت کہ بیگواھیں مردمانی کھولاں انسانیت ءِ ھمک در ٹُک اِت اَنت بلے اد ءَ درست گُنگ اَنت ءُ کور اَنت، کَر بیتگ اَنت – بیگواھیں مردماں کس گوشدارگ ءَ نہ اِنت – ریاست ءِ زوراکی بلوچ ڈیھ ءَ کجام نا کجام رنگ ءَ برجاہ اَنت اے راستی ءِ اے ریاست ءِ واستا ود یک دردے جوڑ بیت اِنت –

ھمے وڑ ءَ چہ زامران ءَ دو سال ءَ پیسر بیگواہ بیتگیں عبید اللہ یلہ کنگ بیتگ –

وائس فار بلوچ مسنگ پرسنز ءَ اے راستی پدر کنان ءَ گْوشتگ کہ یازدہ اکتوبر دوھزار ءُ ھژدہ ءَ زامران ءَ وتی آروس ءِ شپ ءَ زورانسری آوار جنگ بیتگیں عبید اللہ ء غلام رسول دو روچ ءَ پیسر یلہ کنگ بیتگ ءُ وتی لوگ ءَ سر بیتگ –

وی بی ایم پی ءِ نیمگ ءَ گوشگ بیتگ کہ بیگواھیں مردمانی یلہ بیگ جوانیں گامگیجے، ما اُمیت کن ایں سرکار آ دگہ بیگواھیں مردمانی واستا وتی کرد ءَ پیلو کنت –

کولواہ چمبر ءَ پاکستانی پوج ءَ یک مردمے زورانسری آوار جتگ ءُ بیگواہ کرتگ –

دی بلوچستان پوسٹ

بلوچستان ءِ دمگ آواران ءُ کولواہ ءِ میانی میتگ چمبر ءَ پاکستانی پوج ءَ یک مردمے زورانسری آوار جتگ ءُ بیگواہ کتگ – آوار جنگ بوتگیں مردم ءِ پجار عصاء ءِ نام ءَ چہ بوتگ-

دمگی اھولکار ءِ رِد ءَ گوستگیں روچ ءَ چہ اواران ءُ کولواہ ءِ جتا جتائیں دمگاں پاکستانی پوج ءِ زوراکی برجاہ انت – اے میان ءَ پوجی کارمنداں دمگ وتی انگیر ءَ کرتگ انت رؤگ ءُ آیگ ءِ سرجمیں راہ ءُ در بند کرتگ انت –

لشکر کشی ءَ دنیگت ءَ ھچ وڑیں جانی ءُ مالی تاوان ءِ ھال نیست –